Espisyal ya Imbitasyon
1. Kapigan onggapo so kampanya na pangimbita parad 2014 ya regional a kombension?
1 No walay planom ya mangiparaan na espisyal a panangan parad kakaaro odino kapamilyam ya talagan nansagpotan tan nanggastosan mo, seguradon maligligsa kan mangimbita. Mipadpara, nansagpotan a maong so impangiparaan ed espiritual a piesta ya ipresenta diad 2014 ya regional a kombension tayo. Taloran simba antis na kombension tayo, pribilehyo tayon imbitaan so arum ya onatendi. Antoy ontulong pian maligligsa tayon mangimbita?
2. Antoy mamakiwas ed sikatayo pian sigpot tayon makapibiang ed kampanya?
2 Napakiwas tayon sigpot a mibiang ed kampanya no nonoten tayo no panon tayon nagugunggonaan a mismo ed saray espiritual a ponsia ya itatarya nen Jehova ed saray kombension tayo. (Isa. 65:13, 14) Kaukolan tayo met a nonoten ya wala ray maabig a resulta na tinaon ya kampanya tayo. Arum ed saray imbitaan tayo et makaatendi ed kombension. Balet, anggano pigaray onatendi ed sikara, say impansagpot tayo legan na kampanya et mangiter na dayew ed si Jehova tan nipatnag tayoy inkamabunlok to.—Sal. 145:3, 7; Apo. 22:17.
3. Panon so pangibunog ed saray imbitasyon?
3 Akauley so kada ulop na mamatatken no panon a malaknab ya naibunog na kongregasyon iray imbitasyon, no kasin mangitilak na imbitasyon ed saramay anggapod abung odino iyopresi iratan legan na panagpulong ed publiko diad teritorya. No iyopresi iray magasin diad saray weekend, nepeg ya ilaktip iray imbitasyon no matukoy. No say unonan Sabado na bulan et ompetek ed saray petsa na kampanya, nepeg ya iprayuridad so pangibunog na imbitasyon imbes ya mangigapo na panangiyaral na Biblia. Kayari na kampanya, seguradon malikeliket tayo ta amta tayon maligligsa tayon akapibiang tan akapangimbita na dakel a totoo anggad posible ya midungo a kaiba tayo diad espiritual a ponsia ya intarya nen Jehova!