Kapitulo 20
Sakey ya Agnabilang a Baleg ya Ulop
1. Kayarin deneskribe nen Juan so impantatak ed 144,000, anton sananey a grupo so anengneng to?
KAYARIN deneskribe nen Juan so impantatak ed 144,000, intuloy to ya inreport so sakey ed saray makapasagyat a tuloy a panangiparungtal ed interon Kasulatan. Seguradon say puso to so peteg a manliket legan ya irereport to itan, a kuanto: “Kayari sarayan bengatla ninmengneng ak, tan nia, so sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita, a manal-alagey ira’d arap na trono, tan ed arap na Kordero, a nankawes ira na kawekawes ya amputi, tan wala so palmas ed saray kalimaan da.” (Apocalipsis 7:9) On, say pamopokpok ed apatiran dagem so mangipapagamor na kilalaban ed sananey nin grupo nilikud ed 144,000 a membro na espiritual ya Israel: a tugyopen na dakerakel a lenguahe ya internasyonal a baleg ya ulop.a—Apocalipsis 7:1.
2. Panoy impangipaliwawa na saray minumundon komentarista ed baleg ya ulop, tan diad apalabas, panon so impanmoria na anggan saray Estudyante na Biblia ed sayan grupo?
2 Impasen na saray minumundon komentarista iyan baleg ya ulop bilang aliwan-Judios ya akomberte ed Inkakristiano odino saray Kristianon martir ya onla ed tawen. Anggan saray Estudyante na Biblia ed apalabas so angipasen ed saratan bilang segundaryon mangatatawen a klase, unong a nibaga nen 1886 ed Tomo I na Studies in the Scriptures, The Divine Plan of the Ages: “Abalang da so premyo a pan-ari tan say madibinon kipapasen, balet diad kaunoran et nadampot da so kianak bilang espiritun pinalsa ed uksoyan ya abebbeba nen say madibinon kipapasen. Anggaman saraya so peteg a dedikado, atalonaan ira na minumundon espiritu ya anggad punton sinmaew iran mangisaklang na saray bilay da bilang bagat.” Tan angga’d sanen 1930, sayan abaloan so nibalikas ed Light, Libro Uno: “Saramay manugyop ed sayan baleg ya ulop so agkinmiwas ed imbitasyon a magmaliw a magunaet iran tasi na Katawan.” Adeskribe ira bilang matunong-ed-dili a grupo a walaan na pikakabat ed katuaan balet ta samet so ginawa ran impangipulong ed satan. Sikara so onla ed tawen bilang segundaryon klase ya agmibiang ed pananguley nen Kristo.
3. (a) Anton ilalo so intarya ed saray pigaran matunong-impanpuso a totoo a diad saginonor et nagmaliw a maseseg ed panagpulong a kimey? (b) Panoy impangipaliwawa na The Watch Tower nen 1923 ed parabolo na saray karnero tan saray kanding?
3 Balet, walaray arum a kakaiba na alanaan a Kristiano a diad saginonor et nagmaliw a maseseg ed panagpulong a kimey. Agda pirawat so onla ed tawen. Peteg, say ilalo ra so mitunosan ed paulo na sakey a paliwawa ed publiko ya imparungtal na saray totoo nen Jehova manlapu’d 1918 angga’d 1922. Dati, saya et “Say Mundo So Angangga—Minilyon a Manbibilay Natan so Aglan Balot Ompatey.”b Ag-abayag kayari na satan, say magasin a Watch Tower na Oktubre 15, 1923, so angipaliwawa ed parabolo nen Jesus nipaakar ed saray karnero tan saray kanding (Mateo 25:31-46), a kuanto: “Say karnero so mangirerepresenta ed amin a totoo na nasyones, ya aliwan nailalak ed espiritu ingen ta nikiling ed inkatunong, a mamibidbir ed si Jesu-Kristo diad nonot da bilang say Katawan tan manaanap tan maniilalo ed magmaong a panaon diad leksab na pananguley to.”
4. Panoy insinag a nagkalalo na liwawa nipaakar ed mangaraldalin a klase nen 1931? nen 1932? nen 1934?
4 Pigaran taon ed saginonor, nen 1931, siningbat na Vindication, Libro Uno, so Ezequiel kapitulo 9, a mangipapabidbir ed saramay totoon tinandaan ed moling parad kililiktar ed anggaan na mundo bilang saray karnero ed parabolon sinalambit ed tagey. Say Vindication, Libro Tres, ya impaway nen 1932, so aneskribe ed maptek ya awawey ed puso na aliwan-Israelitan laki a si Jehonadab, ya akiulop ed alanaan ya Ari na Israel a si Jehu diad karwahe to tan akila pian nanengneng so seseg nen Jehu a mamatey ed saray palson relihyonista. (2 Arari 10:15-17) Onia so inkomento na libro: “Legan na panaon a say kimey nen Jehu [a panangiyabawag ed saray panangukom nen Jehova] so nagagawa, si Jehonadab so angirepresenta odino angiyanino ed satan a klase na totoo natan ed dalin a walaan na maong a linawa, ya agmitutunosan ed organisasyon nen Satanas, a dinmapag ed inkatunong, tan saray iliktar na Katawan legan na panaon na Armagedon, a sikara so ipaway to ed satan a gonigon, tan pagamoran to ira na andi-anggaan a bilay diad dalin. Saraya so manugyop ed ‘karnero’ a klase.” Nen 1934 et impabitar na The Watchtower a sarayan Kristiano a walaan na mangaraldalin ya ilalo so nepeg a manggawa na dedikasyon ed si Jehova tan nabautismoan. Say liwawa nipaakar ed sayan mangaraldalin a klase so lalon sinminag.—Uliran 4:18.
5. (a) Anton panangipabidbir so ginawa ed baleg ya ulop nen 1935? (b) Nen 1935, sanen kinerew nen J. F. Rutherford ya onalagey iray kombensionista a walaan na ilalon manbilay na ando lan ando ed dalin, anto so agawa?
5 Say pakatalos ed Apocalipsis 7:9-17 so ngalngali la natan ya onsinag ed sigpot ya inkamasnag! (Salmo 97:11) Aminpigan imbalikas na Watchtower a magasin so ilalo a say kombension a niyeskedyul ed Mayo 30 anggad Hunyo 3, 1935, ed Washington D.C., E.U.A., so magmaliw a “peteg a ligliwa tan gunggona” ed saraman so inrepresenta nen Jehonadab. Peteg ya ontan so agawa! Diad makapaligsan paliwawa ed teman “Say Baleg a Karaklan,” ya impaliwawa ed ngalngalin 20,000 a kombensionista, si J. F. Rutherford, a diad saman et angidaulo ed sankamundoan a panagpulong a kimey, so angiter na Makasulatan a prueba a say modernon-agew ya arum a karnero so mipara ed baleg ya ulop ed Apocalipsis 7:9. Diad pantok na sayan paliwawa, intepet na espiker: “Nayari pan onalagey so amin na saramay walaan na ilalo a manbilay na ando lan ando ed dalin?” Sanen inmalagey so dakel a kabiangan na dumerengel, inyabawag na espiker: “Nia! Say baleg a karaklan!” Nagmaliw a marendeen, insan tinmumbok so maksil a kelyaw na panliket. Agaylan aliketan so Juan a klase—tan ontan met ed Jehonadab a grupo! Diad tinmumbok ya agew, 840 a balon Tasi so abautismoan, maslak ed saraya so mangibabagan kabiangan na satan a baleg ya ulop.
Panamekder ed Pakabidbiran na Baleg ya Ulop
6. (a) Akin a malinew tayon natatalosan a say baleg ya ulop et say modernon-agew a grupo na dedikadon Kristiano a maniilalon manbilay na ando lan ando ed dalin? (b) Anto so isisimbolo na saray amputin kawes na baleg ya ulop?
6 Panon tayon mapekpekder a nibaga a say baleg ya ulop et sayan modernon-agew a grupo na saray dedikadon Kristiano a maniilalon manbilay na ando lan ando diad dalin na Dios? Diad akauna, anengneng nen Juan ed pasingawey so mangatatawen a grupo a “sinaliw [para] ed Dios . . . [a nanlapu] ed balang kailalakan, tan salita tan baley tan nasyon.” (Apocalipsis 5:9, 10) Say baleg ya ulop so walaan na miulibay a nanlapuan balet ta duman destino. Aliwan singa say Israel na Dios, say bilang da so agnigeter ya akauna. Anggapo so toon makapangipasakbay ed no kaunongan ira karakel. Saray kawes da so naurasan ya apaputi ed dala na Kordero, ya isisimbolo na satan a sikaray walaan na matunong a talindeg ed arap nen Jehova base ed pananisia ra ed bagat nen Jesus. (Apocalipsis 7:14) Tan sikara so mangipapayapay na saray sanga na palma, ya itatandoro ra so Mesias bilang Ari ra.
7, 8. (a) Say panangipayapay ed saray sanga na palma et seguradon angipanonot ed si apostol Juan ed antoran agawgawa? (b) Anto so kabaliksan na pangipapayapay na saramay baleg ya ulop ed saray sanga na palma?
7 Legan ya onnenengneng si Juan ed sayan pasingawey, nayarin nipapanonot ed sikato imay agawa masulok a 60 taon ed apalabas diad samay unor a simba nen Jesus ed dalin. Nen Nisan 9, 33 C.E., sanen nantitipon iray karaklan pian mangabrasa ed si Jesus diad Jerusalem, “angala ra na sangasanga na kiew na palma, tan pinmaway iran onabet ed sikato. Tan imbelyaw da, Hosanna! Bendito so onla dia ed ngaran na Katawan, salanti say Ari na Israel!” (Juan 12:12, 13) Mipadpara, say pangipapayapay na saray sanga na palma tan pankekelyaw na baleg ya ulop so mangipapanengneng na agnapokpokan a liket da diad impangawat ed si Jesus bilang tinuron Ari nen Jehova.
8 Segurado, saray sanga na palma tan maliket a kelyaw so angipanonot met ed si Juan ed Piesta na Kubongkubong na Israel nensaman. Nipaakar ed sayan piesta et ingganggan nen Jehova: “Tan nepeg yo a yalaan so inkasikayo na bungay maong a kiew, saray sangasanga na kiew a palma, tan sangasanga na masalompapak a kiew, tan saray sauces na ilog; tan nepeg yo so manggayaga ed kinen Jehova a Dios yo a pitoy agew.” Saray sanga na palma so inuusar bilang tanda na panliket. Saray temporaryon kobongkobong et panonot a si Jehova so angiliktar ed totoo to manlapud Ehipto, pian manayam ed saray tolda ed kalawakan. “Say sansankaili, tan saray ulila, tan say bii a balo” so akibiang ed sayan piesta. Amin ya Israel so nepeg a magmaliw a “masayaksak.”—Levitico 23:40; Deuteronomio 16:13-15.
9. Diad anton magayagan kelyaw so pibiangan na baleg ya ulop?
9 Matukotukoy sirin, a say baleg ya ulop, anggaman aliwan kabiangan na espiritual ya Israel, so mangipayapay na saray sanga na palma, lapud sikaray malikeliket tan misalsalamat a mamibidbir a say pananalo tan panangilaban et utang da ed Dios tan ed Kordero, unong a naimano dia nen Juan: “Tan manakis ira ed baleg a boses, a kuanda, Say inkilaban [“et utang tayo,” NW] ed Dios tayo a wala a manyurong ed trono, tan dia ed Kordero.” (Apocalipsis 7:10) Anggaman imbiig ira ed amin na saray etnikon grupo, say baleg ya ulop so mankelyaw ed saksakey a “baleg a boses.” Panon dan nagawaan iya, anggaman nanduruma so nasyon tan pansasalita ra?
10. Panoy pakapankelyaw na baleg ya ulop a nankakasakey diad “baleg a boses” anggaman nanduruma so nasyon tan lenguahe ra?
10 Sayan baleg ya ulop so kabiangan na alenleneg a peteg a nankakasakey ya organisasyon ed dalin natan a nanlapud dakerakel a nasyon. Aliwan nanduruma so estandarte ra ed nanduruman bansa noagta pareparehon iyaaplika ra so maptek iran prinsipyo na Biblia ed inerman a panaayaman da. Ag-ira mibabali ed nasyonalistiko, rebolusyonaryo iran kurang noagta talagan ‘pinitpit da iray kampilan da ya impagmaliw dan dingding na lukoy.’ (Isaias 2:4) Ag-ira naapag-apag ed saray sekta odino denominasyon, a mangikekelyaw na magotgot odino mansusumlangan iran mensahe a singa gagawaen na saray relihyon na Kakristianoan; nisay ipipia ra ed saray propesyonal a kleron klase so panagdayew da. Agda ikekelyaw ya utang da so kilalaban ed masanton espiritu, lapud aliwa iran lingkor na trinidad a dios. Diad manga 200 a heograpikon teritorya ed interon dalin, nankakasakey iran ontatawag ed ngaran nen Jehova legan dan sasalitaen so puron lenguahe na katuaan. (Sofonias 3:9) Duga so mapublikon pamibidbir da a say kilalaban da et utang da ed si Jehova, say Dios na kilalaban, diad panamegley nen Jesu-Kristo, say Manunan Ahente To ed panangilaban.—Salmo 3:8; Hebreos 2:10.
11. Panoy intulong na modernon teknolohiya ed saramay baleg ya ulop pian lalon nikasil so boses da?
11 Say modernon teknolohiya so akatulong ed lalon inkasil na boses na nankakasakey a baleg ya ulop. Anggapo lay arum a relihyoson grupo ed dalin a mankaukolan a mangipalapag ed saray katulongan ed panagaral na Biblia ed masulok a 400 a lenguahe, lapud anggapo lay sananey a grupo ya interesadon mangipasabi na nankakasakey a mensahe ed amin a totoo ed dalin. Bilang kaaruman a katulongan ed saya, diad panangasikaso na alanaan a Mananguley ya Ulop na saray Tasi nen Jehova, ginawa so Multilanguage Electronic Phototypesetting System (MEPS). Diad panaon na impangimprinta ed saya, saray nanduruman porma na MEPS so nausar ed masulok a 125 iran lugar ed interon dalin, tan saya so tinmulong ed posiblin kipalapag na mamidua ed sakey bulan a palapagan, Say Panag-Bantayan, a manbabansag ed masulok a 130 a lenguahe. Saray totoo nen Jehova so bansa-bansag met a mangipapalapag ed saray libro, a singa sayan libro, diad pigaran lenguahe. Kanian, saray Tasi nen Jehova, a say karaklan ed satan et manugyop ed baleg ya ulop, so tinaon a makapangibubunog na nilasus milyon iran publikasyon ed amin a kabat iran lenguahe, ya ontutulong ed dakerakel ni manlapu’d amin a tribu tan pansasalita a naaral so Salita na Dios tan ikasakey so boses da diad maksil a boses na baleg ya ulop.—Isaias 42:10, 12.
Diad Tawen Odino Diad Dalin?
12, 13. Diad anton paraan a say baleg ya ulop so “manal-alagey [ed] arap na trono, tan ed arap na Kordero”?
12 Panoy pikabat tayo a say ‘panal-alagey ed arap na trono’ et agto kabaliksan a say baleg ya ulop et walad tawen? Wala so nagkalalon mabitar ya ebidensya ed sayan punto. Alimbawa, say Griegon salita a nipatalos dia ya “arap” (e·noʹpi·on) et literal a mankabaliksay “diad pakanengneng [na]” tan nausar ed pigaran danay ed totoo diad dalin a walad “arap” odino “diad pakanengneng nen” Jehova. (1 Timoteo 5:21; 2 Timoteo 2:14; Roma 14:22, NW; Galacia 1:20) Diad sakey ya inkagawa sanen saray Israelita so walad kalawakan, inkuan nen Moises ed si Aaron: “Ibagam ed amin a muyong na saray anak na Israel, a kuan mo, Onasingger kayo ed arapan nen Jehova, ta nadngel to so saray panngengem yo.” (Exodo 16:9) Diad satan a kipapasen, agkinaukolan ya awiten iray Israelita ed tawen ta pian onalagey ed arap nen Jehova. (Ikompara so Levitico 24:8.) Imbes, diman a mismo ed kalawakan so inalageyan da a nanenengneng nen Jehova, tan say imano to so walad sikara.
13 Niarum ni, nabasa tayo: “Sano onsabi so Anak na too ed gloria to . . . natipon naani ed arap to so saray amin a nasyon.” Say interon rasa na too et agniwala ed tawen sano nasumpal iyan propesiya. Seguradon saramay ‘onla ed andi-anggaan a kadusa’ so ag-onla ed tawen. (Mateo 25:31-33, 41, 46) Imbes, say katooan so onalagey ed dalin a nanenengneng nen Jesus, tan ipaarap to so imano to diad pangukom ed sikara. Mipadpara, say baleg ya ulop so “manal-alagey [ed] arap na trono, tan ed arap na Kordero” unong ta sikara so akaalagey diad pakanengneng nen Jehova tan say Ari to, si Kristo Jesus, a pakagamoran da na paborablin panangukom.
14. (a) Sioparay adeskribe bilang walad “kaliberliber na trono” tan “ed tapew na [mangatatawen a] Palandey na Sion”? (b) Anggaman say baleg ya ulop so manlilingkor ed Dios “ed templo to,” akin a saya so agmanggawa ed sikaran sakey a makasaserdoten klase?
14 Saray 24 a mamasiken tan say alanaan a grupo na 144,000 so adeskribin walad “kaliberliber na trono” nen Jehova tan “ed tapew na [mangatatawen a] Palandey na Sion.” (Apocalipsis 4:4; 14:1) Say baleg ya ulop so aliwan sakey a makasaserdoten klase tan agto nadampot itan a nitandoron posisyon. Tua, adeskribe itan ed saginonor diad Apocalipsis 7:15 bilang manlilingkor ed Dios “ed templo to.” Balet sayan templo et ag-ontutukoy ed akindalem a santuaryo, say Sankasantosan. Imbes, satan so mangaraldalin a lolooban na espiritual a templo na Dios. Say Griegon salitan na·osʹ, a nipatalos dia a “templo,” so mabetbet a manutukoy ed interon paalagey parad panagdayew ed si Jehova. Natan, saya so espiritual ya istruktura a mangisasakop ed tawen tan dalin.—Ikompara so Mateo 26:61; 27:5, 39, 40; Marcos 15:29, 30; Juan 2:19-21, New World Translation Reference Bible, paimano’d-leksab.
Sankatalbaan a Kelyaw na Panangidayew
15, 16. (a) Anto so reaksion ed tawen diad inkipatnag na baleg ya ulop? (b) Panon so inkiwas na saray espiritun pinalsa nen Jehova ed kada balon panangiparungtal ed gagala to? (c) Panon a sikatayon wadia ed dalin so makapibiang ed pankanta na panangidayew?
15 Say baleg ya ulop so mangidadayew ed si Jehova, balet walara met so arum a mankakanta na saray panangidayew ed sikato. Inreport nen Juan: “Tan lapag na anghel wala ra ya akaalagey ed kaliberliber na trono, tan saray mamasiken tan saramay apatira a mabilay ya ayep; et indakmomo ra so lupa ra ed arap na trono, tan inggalgalang da so Dios, A kuanda, Amen. Say bendisyon, tan say gloria, tan say kakabatan, tan say pisasalamat, tan say dayew, tan say pakayari, tan say biskeg, so niiter komon ed Dios tayo ed ando lan ando. Amen.”—Apocalipsis 7:11, 12.
16 Sanen pinalsa nen Jehova so dalin, amin na saray masanton anghel to so “nankanta ra a bansag, tan amin iray anak na Dios inmeyag ira lapu ed liket.” (Job 38:7) Kada balon panangiparungtal ed gagala nen Jehova et mamawala na miulibay a kelyaw na panangidayew na saray anghel. Sanen saray 24 a mamasiken—say 144,000 ed mangatatawen a gloria ra—so kinmelyaw a maksil diad panamidbir ed Kordero, amin nin arum ed mangatatawen iran pinalsa na Dios so akibansag ya angidayew ed si Jesus tan ed si Jehova a Dios. (Apocalipsis 5:9-14) Sarayan pinalsa so manggagayaga la diad pakakaimaton ed pakasusumpal na gagala nen Jehova diad impamaoli to ed saray matoor ya alanaan a totoo ed maglorian pasen ed espiritun ayaman. Natan, amin na saray matoor a mangatatawen a pinalsa nen Jehova so maksil a mangikakanta na panangidayew diad inkipatnag na baleg ya ulop. Petepeteg, parad amin na saray lingkor nen Jehova, say agew na Katawan et sakey a makapalikliket a panaon a pambilayan. (Apocalipsis 1:10) Diad dalin, agaylan sikatayo so apribilehyoan a mibiang ed kanta na panangidayew diad pantasi ed Panarian nen Jehova!
Say Baleg ya Ulop so Pinmatnag
17. (a) Anton tepet so pinalesa na sakey ed saray 24 a mamasiken, tan anto so isusuheri na katuaan a nayarian na masiken ya anapen so ebat? (b) Kapigan so inkaebatan na tepet na masiken?
17 Manlapud panaon nen apostol Juan ya anggad agew na Katawan, saray alanaan a Kristiano so nawewetwet no nipaakar ed pakabidbiran na baleg ya ulop. Matukotukoy sirin, a sakey ed saray 24 a mamasiken, a mangirerepresenta ed saray alanaan a wala la’d tawen, so mamaliing ed kanonotan nen Juan diad pamalesa na matukoy a tepet. “Tan inmebat so sakey ed saray mamasiken, a kuanto ed siak, Saraya a nankawes na kawekawes ya amputi, siopara, tan iner so nanlapuan da? Tan siak inkuanko ed sikato, Katawan ko, sika antam.” (Apocalipsis 7:13, 14a) On, nayarian na satan a masiken ya anapen so ebat tan iter to itan ed si Juan. Isusuheri na saya a saray apaoli ed saray 24 a mamasiken a grupo so nayarin nalanor diad panangipasabi ed saray madibinon katuaan natan. Diad biang na saramay kabiangan na Juan a klase ed dalin, sikaray akaamta ed pakabidbiran na baleg ya ulop diad maapit a panangobserba ra ed gagawaen nen Jehova ed pegley da. Tampol dan atalosan so sinag na madibinon liwawa a nanliwawa ed teokratikon kaliberliber nen 1935, diad inggeter nen Jehova a panaon.
18, 19. (a) Anton ilalo so indanet na Juan a klase kaleganan na dekada na 1920 tan 1930, balet sioparay kinmiwas ed mensahe diad ondarakel a bilang? (b) Say impakabidbir ed baleg ya ulop nen 1935 so angipatnag na anto no nipaakar ed 144,000? (c) Anto so ipaparungtal na estadistika ed Memoryal?
18 Kaleganan na dekada na 1920 tan kasakbayan na dekada na 1930, say Juan a klase so angidanet ed mangatatawen ya ilalo, namparan diad saray palapagan tan diad panangipulong a kimey. Mapatnag, agni akompleto so bilang a 144,000 ed saman. Balet say ondarakel a bilang na saramay ontatalineng ed mensahe tan angipanengneng na seseg ed panagtasin kimey so angipatnag na interes ed pambilay na ando lan ando ed Paraison dalin. Andian ira na pilalek ya onla ed tawen. Aliwan satan so akatawagan da. Ag-ira kabiangan na melag a pulok noagta kabiangan ira na arum a karnero. (Lucas 12:32; Juan 10:16) Say impakabidbiran da nen 1935 bilang baleg ya ulop na arum a karnero so pakapatnagan a say impanpili ed 144,000 so ngalngali la nakompleto ed saman.
19 Kasin susuportaan na estadistika iyan konklusyon? On. Nen 1938, diad sankamundoan et 59,047 a Tasi nen Jehova so akibiang ed ministeryo. Diad saraya, 36,732 so akibiang ed saray emblema diad tinaon a selebrasyon na Memoryal na impatey nen Jesus, sirin et mangipapanengneng a walaan ira na mangatatawen ya inkatawag. Diad saray taon nanlapula’d saman, say bilang na sarayan mibibiang so nantultuloy a dinmaiset, manuna et lapud saray matoor a Tasi nen Jehova so akasumpal la ed mangaraldalin a kurang na bilay da diad patey. Nen 2005 wala labat lay 8,524 ya akibiang ed saray emblema na Memoryal—0.05 lambengat a porsiento na 16,390,116 ya inmatendi ed saman a sankagloboan a selebrasyon.
20. (a) Kaleganan na Guerra Mundial II, anto so pribadon inkomento nen J. F. Rutherford nipaakar ed baleg ya ulop? (b) Antoran katuaan natan so mangipanengneng a say baleg ya ulop so peteg a baleg?
20 Sanen binmetag so komaduan guerra mundial, pirmin nanggunaetan nen Satanas a patundaen so panagani ed baleg ya ulop. Say kimey nen Jehova so apegetan ed dakel iran bansa. Kaleganan na saraman a mauddiem ya agew, tan sakbay a tuloy na impatey nen J. F. Rutherford nen Enero 1942, sikato so nadngel ya angibaga: “Bueno . . . singano aliwa lanlamang manayan baleg so baleg a karaklan.” Balet say madibinon bendisyon so angipaarap ed kasunian! Nen 1946 et say bilang na saray Tasi a manlilingkor ed sankamundoan so biglan dinmaak ed 176,456—maslak ed saraya so kabiangan na baleg ya ulop. Nen 2005 et wala so 6,390,022 a Tasin manlilingkor ed si Jehova a sitotoor diad 235 a nanduruman daldalin—tuan SAKEY A BALEG YA ULOP! Tan mantutultuloy ya ondarakel so bilang da.
21. (a) Panon a say panagani ed saray totoo na Dios legan na agew na Katawan so sigpot a mitunosan ed pasingawey nen Juan? (b) Panon a ginmapon nasusumpal iray arum ya importantin propesiya?
21 Say panagani ed totoo na Dios kaleganan na agew na Katawan et sigpot a mitunosan ed pasingawey nen Juan: unona et say kimey na panagtipon ed nakekeraan na 144,000; insan say katipon na baleg ya ulop. Unong ya impropesiya nen Isaias, natan “dia ed saray kaunoran ya agew,” saray totoo ed amin a nasyon so onaagus a mibiang ed puron panagdayew ed si Jehova. Tan, peteg, manliket itayo lapud panamabli ed pamalsa nen Jehova ed “balo a tawen tan balo a dalin.” (Isaias 2:2-4; 65:17, 18) Say Dios so manitipon ed “saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.” (Efeso 1:10) Saray alanaan a mananawir ed mangatatawen a Panarian—a pinili ed inlabas na saray siglo nanlapula’d agew nen Jesus—et “saray bengatlan wala ed tawen.” Tan natan, say baleg ya ulop na arum a karnero so apatnagan bilang unona ed “saray wala ed tapew na dalin.” Say panlilingkor yo a mitunosan ed satan ya uksoyan so nayarin mankabaliksan na maandon panliket yo.
Saray Bendisyon ed Baleg ya Ulop
22. Anton kaaruman nin impormasyon so naawat nen Juan nipaakar ed baleg ya ulop?
22 Diad panamegley na madibinon paralanan, inawat nen Juan so kaaruman nin impormasyon nipaakar ed sayan baleg ya ulop: “Tan sikato [say masiken] inkuanto ed siak, Saraya sikara so nanlapu ed baleg ya irap, tan inurasan da so kawekawes da, tan sikara so pinaputi ra ed dala na Kordero. Lapu ed saya wala ra ed arap na trono na Dios; tan sikato so panlingkoran da ed agew tan labi ed templo to: tan say wala a manyurong ed trono ibuskag to so tabernakulo to ed sikara.”—Apocalipsis 7:14b, 15.
23. Anto so baleg a kairapan a ‘nanlapuan’ na baleg ya ulop?
23 Diad akadkauna nin inkagawa, imbaga nen Jesus a say kiwawala to ed gloria na Panarian so mamantok ed “baleg ya irap . . . ya anggapo so ontan a nanlapud gapo na mundo ya angga ed natan, anggapo, anggapo la naani.” (Mateo 24:21, 22) Bilang kasumpalan na satan a propesiya, bulosan na saray anghel so apatiran dagem na dalin a manesyang ed sistema na mundo nen Satanas. Say unonan naderal et say Babilonia a Baleg, say sankamundoan ya empiryo na palson relihyon. Insan, diad pantok na kairapan, iliktar nen Jesus so nakekeraan ed 144,000 ed dalin, a kaiba so agnabilang a baleg ya ulop.—Apocalipsis 7:1; 18:2.
24. Panoy ikualipika na saray indibidual ed baleg ya ulop parad kililiktar?
24 Panoy ikualipika na saray indibidual ed baleg ya ulop parad kililiktar? Say masiken so mangibabaga ed si Juan a sikaray ‘anguras ed saray kawes da tan pinaputi ra ed dala na Kordero.’ Diad arum a salita, angagamil ira na pananisia ed si Jesus bilang Mananondon da, indedika ray inkasikara ed si Jehova, insimbolo ray dedikasyon da diad bautismo ed danum, tan ‘walaan ira na maong a konsiensia’ panamegley na maptek a kondukta ra. (1 Pedro 3:16, 21; Mateo 20:28) Kanian, sikaray malinis tan matunong ed pakanengneng nen Jehova. Tan pansiasiansiaen da so inkasikaran “andi mantsa ed mundo.”—Santiago 1:27.
25. (a) Panon a say baleg ya ulop so mangisasaklang ed si Jehova na ‘panaglingkor ed agew tan labi ed templo to’? (b) Panon ya ‘imbuskag [nen Jehova] so tabernakulo to’ ed baleg ya ulop?
25 Nagkalalo ni, nagmaliw iran maseseg a Tasi nen Jehova—a sikatoy ‘panlilingkoran da ed agew tan labi ed templo to.’ Kasin sakey ka ed sayan dedikadon baleg ya ulop? No ontan, pribilehyom so manserbi ed si Jehova ya andi-tunda diad mangaraldalin a lolooban na baleg ya espiritual a templo to. Natan, diad panangiwanwan na saray alanaan, say baleg ya ulop so manggagawa na mas babaleg a betang ed panagtasin kimey. Anggaman ed saray sekular a responsabilidad da, nilasus nilibo ed sikara so angilugar ed sigpot-panaon a ministeryo bilang payunir. Balet balanglan wala ka ed satan a grupo odino andi, bilang dedikadon membro na baleg ya ulop, makapanliket ka a lapud pananisiam tan kimey mo et niyabawag kan matunong bilang kaaro na Dios tan naabrasa bilang sankaili ed tolda to. (Salmo 15:1-5; Santiago 2:21-26) Si Jehova sirin so ‘angibuskag ed tabernakulo to’ ed saraman so mangaaro ed sikato tan, bilang maong a mananankaili, salimbengan to ra.—Uliran 18:10.
26. Antoray arum nin bendisyon a panggayagaan na baleg ya ulop?
26 Intultuloy na masiken: “Agla ra naerasan, tan agla ra napegaan; tan agla ra bakbaken na banwa tan napetangan ed dinan: Ta say Kordero a wala ed pegley na trono sikatoy pastol da, tan sikara so irawa’to ed saray subol na danudanum na bilay. Tan say Dios punasen to so balang lua ed saray kamataan da.” (Apocalipsis 7:16, 17) On, si Jehova so tuan maparawes! Balet anton aralem a kabaliksan so walad sarayan salita?
27. (a) Panon a nampropesiya si Isaias na miulibay ed saray salita na masiken? (b) Anto so mangipanengneng a say propesiya nen Isaias so ginmapon asumpal ed Kristianon kongregasyon ed agew nen Pablo?
27 Imanoen tayo so propesiya a miulibay ed inkisalita na satan: “Onia so kuan nen Jehova, Dia ed sakey a panaon a makana inebatan ta ka, tan dia ed sakey ya agew na kilalaban tinulongan ta ka . . . Ag-ira naani naerasan tan napgaan; agmet ira nasakitan na petang tan say banwa: ta say wala so panangasi to ed sikara itonton to ra, a dia ed abay na subol na danum so pangiyarapan to ed sikara.” (Isaias 49:8, 10; nengnengen met so Salmo 121:5, 6.) Inaon nen apostol Pablo so kabiangan na sayan propesiya tan inyaplika to itan ed “agew na panangilaban” a ginmapo nen Pentecostes 33 C.E. Insulat to: “Ta kuanto [Jehova], Dia ed makanan panaon dinengel ta ka, tan dia ed agew na panangilaban tinulongan ta ka; nia, natan so makanan panaon; nia, natan so agew na panangilaban.”—2 Corinto 6:2.
28, 29. (a) Panoy inkasumpal na saray salita nen Isaias nen inmunan siglo? (b) Panon a saray salita ed Apocalipsis 7:16 so asumpal no nipaakar ed baleg ya ulop? (c) Anto so resulta na kiwanwan na baleg ya ulop ed “subol na danudanum na bilay”? (d) Akin a say baleg ya ulop so nikadkaduma ed limog na katooan?
28 Panon ya asumpal ed saman so sipan nipaakar ed agla pakaerasan odino pakapegaan odino panagmak na mansasnit a petang? Segurado, saray Kristiano nen inmunan siglo so anagmak na literal ya eras tan inkapgaan no maminsan. (2 Corinto 11:23-27) Balet, diad espiritual a paraan, awalaan ira na daakan. Sikaray daakan ya ataryaan, ta pian sikara so agnaerasan odino napegaan ed espiritual iran bengatla. Niarum ni, agpinaliab nen Jehova so petang na sanok to sumpad sikara sanen dineral to so Judion sistema na bengabengatla nen 70 C.E. Saray salita ed Apocalipsis 7:16 so walaan na miulibay ya espiritual a kasumpalan ed baleg ya ulop natan. Kaiba iray alanaan a Kristiano, panggagayagaan da so daakan iran espiritual a probisyon.—Isaias 65:13; Nahum 1:6, 7.
29 No sakey kan kabiangan ed satan a baleg ya ulop, say maabig a kipapasen na pusom so manggawa ed sikan ‘mankanta ed liket na puso,’ antokaman so kaukolan mon sungdoan iran kakulangan tan desdes legan na mauddiem laran taon na sistema nen Satanas. (Isaias 65:14) Diad satan a pantalos ya anggan natan et nayarian nen Jehova a ‘punasen so amin a lua ed kamataan yo.’ Agkayo la nasinit na mansasnit a “banwa” na pirmin panangukom na Dios, tan sano bulosan la iray apatiran dagem na panagderal, nayarin nipaliis kayo ed ‘[mansasnit a] petang’ na sanok nen Jehova. Kasumpal na satan a panagderal, say Kordero so mangiwanwan ed sikayo pian sigpot a nagunggonaan ed makapabiskeg a “subol na danudanum na bilay,” saraya so mangirepresenta ed amin a probisyon a gawaen nen Jehova diad pakagamor yo na andi-anggaan a bilay. Nitandoro so pananisia yo ed dala na Kordero unong a sikayo so kalkalnan makarapat ed inkayadyari bilang too. Sikayo a kabiangan na baleg ya ulop so nikadkaduma ed limog na katooan bilang saray “minilyon” ya agla kaukolan ya ompatey! Diad sigpot a pantalos, balang lua so napunas la ed saray kamataan yo.—Apocalipsis 21:4.
Seseguroen so Inkatawag
30. Anton marakep a nenengnengen so nilulukas ed sikatayo diad pasingawey nen Juan, tan siopa so ‘makatanyareg’?
30 Agaylan marakep a nenengnengen so lulukasan na sarayan salita ed sikatayo! Si Jehova a mismo so walad trono to, tan amin na saray lingkor to, mangatatawen tan mangaraldalin, so nankakasakey diad panangidayew ed sikato. Saray mangaraldalin a lingkor to so mangaapresya ed agaylan nikadkaduman pribilehyo a pibiang ed sayan maksil a koro na panagdayew. Agla manbayag, si Jehova tan si Kristo Jesus so mangipaakseb ed panangukom, tan say kelyaw so narengel: “Ta say agew a baleg na sanok da sinmabi la; tan siopa so makayari ya ontanyareg?” (Apocalipsis 6:17) Say ebat? Daiset lambengat ed katooan, kaiba so siopaman ya atatakan a 144,000 a nayarin mabilay ni ed laman tan sakey a baleg ya ulop na arum a karnero a ‘makatanyareg,’ salanti, makaliktar a kaiba ra.—Jeremias 35:19; 1 Corinto 16:13.
31. Panoy nepeg ya epekto na kasumpalan na pasingawey nen Juan ed saray Kristiano, namparan diad saray alanaan tan baleg ya ulop?
31 Nisesengeg ed sayan katuaan, saray alanaan a Kristiano na Juan a klase so mangisesekar na inkasikara diad ‘itundas a mamaarap ed kalat a nipaakar ed pakala na tumang na atagey a panatawag na Dios dia ed Kristo Jesus.’ (Filipos 3:14) Kabat dan sigpot a saray nagagawa kaleganan na sarayan agew so mankaukolan na nikadkaduman panagsungdo ra. (Apocalipsis 13:10) Kayari na matoor a panlilingkor da ed si Jehova ed dakel laran taon, sikara so nansiansian malet ed pananisia, tan maliket ta saray kangaranan da so ‘nisulat ed tawen.’ (Lucas 10:20; Apocalipsis 3:5) Saramay kabiangan na baleg ya ulop met so mikabat a “say misungdo [labat] ya angga ed kasampotan, sikato lanlamang so nilaban naani.” (Mateo 24:13) Anggaman say baleg ya ulop bilang sakey a grupo so atandaan ya ompaway ed baleg a kairapan, saray indibidual ditan so nepeg a mangisekar ed inkasikara pian mansiansia ran malinis tan aktibo.
32. Anton maganat a kipapasen so nipabitar ed katuaan a duara lambengat a grupo so ‘makatanyareg’ ed agew na sanok nen Jehova?
32 Anggapoy ebidensya a likud ed sarayan duaran grupo et wala ni ‘makatanyareg’ ed agew na sanok nen Jehova. Anto so kabaliksan na saya ed saray minilyon a kada taon et mangipapanengneng na respeto ed bagat nen Jesus diad iyaatendi ed selebrasyon na Memoryal na impatey to balet ta agni angagamil na pananisia ed bagat nen Jesus diad punton pagmaliw a dedikado, bautismado iran lingkor nen Jehova, ya aktibo ed serbisyo to? Kaaruman ni, komusta iramay datin aktibo balet ta inabuloyan da iray kapusoan da a ‘napano . . . na saray kapagaan ed bilay’? Komon ta amin na saratan so naliing, tan mansiansian aliing, ta pian ‘ontalona a nilaban ed sarayan amin a bengatlan nagawa, tan makaalagey ed arap na Anak na too’—si Jesu-Kristo. Say panaon so antiktikey la!—Lucas 21:34-36.
[Saray paimano ed leksab]
a Nengnengen so New World Translation Reference Bible, paimano’d-leksab.
b Say The Watch Tower, Abril 1, 1918, pahina 98.
[Kahon ed pahina 119]
Betang na Dios Iray Panangiter na Kabaliksan
Diad loob na dakel a dekada say Juan a klase so nanusisa nipaakar ed pakabidbiran na baleg ya ulop balet ag-akaromog na makapenek ya eksplinasyon. Akin? Naromog tayoy ebat diad saray salita nen matoor a Jose, sanen imbaga to: “Aliwa ta a nabebetangan na Dios so panangipatalos?” (Genesis 40:8) Kapigan tan panon ya impatalos na Dios so kasumpalan na saray propesiya to? Kaslakan et sano saraya so inggetar lan nagawa odino legan a nagagawa pian say mensahe ra so malinew a natalosan na mansusukimat iran lingkor to. Sayan pakatalos so niiter “ya onkana ed kibangat tayo, tan pian lapu ed anos tan lapu ed panamaligliwa na saray Sulsulat, wala so ilalo tayo.”—Roma 15:4.
[Kahon ed pahina 124]
Saray membro na baleg ya ulop
▪ so nanlapu’d amin a nasyones tan amin na saray kailalakan tan binaleybaley tan pansasalita
▪ so manal-alagey ed arap na trono nen Jehova
▪ so anguras ed saray kawes da a pinaputi diad dala na Kordero
▪ so mamibidbir a say kilalaban da et nanlapud si Jehova tan si Jesus
▪ so nanlapu’d baleg a kairapan
▪ so manlilingkor ed si Jehova ed agew tan labi diad templo to
▪ so mangaawat na maaron proteksion tan panangasikaso nen Jehova
▪ so ipapastol nen Jesus diad subol na danudanum na bilay
[Interon-pahina a litrato ed pahina 121]
[Litrato ed pahina 127]
Utang na baleg ya ulop so kilalaban da ed Dios tan ed Kordero
[Litrato ed pahina 128]
Iwanwan na Kordero so baleg ya ulop ed subol na danudanum na bilay