Usar na Nipabtang a Materyal

INKOMPARA na Biblia so Kristianon kongregasyon ed kabalgan na sakey a too. Kada parte so kaukolan, balet ‘aliwan amin so manpaparay gawaen.’ Mitunosan ed satan, nepeg tayon kimeyan so antokaman a pribilehyon nimatalek ed sikatayo. Kakaukolanen na saya a natalosan tan nagawaan a maong so anggan anton nipabtang a pampaliwawa imbes a leglemewen so kaimportantian na arum iran tema lapud iisipen tayon saray arum a suheto so lalon makapainteres. (Roma 12:4-8) Responsabilidad na matoor tan makabat ya aripen a klase so pangitarya na espiritual a tagano diad “panaon a kinepeg.” (Mat. 24:45) No usaren tayoray personal ya abilidad tayo diad panibukel na saray paliwawa unong ed saray naawat tayon instruksion, ipapanengneng tayo so apresasyon ed satan ya uksoyan. Saya so ontulong ed marlas ya ikurang na interon kongregasyon.

No Anto so Ilaktip. No nipabtang ed sika so sakey a suheto ed eskuelaan, seguroen a tibukelen itan a tema tan aliwan say arum. Diad maslak a kipapasen, niiter so espesipikon reperensyan materyal. No agnibaga ed sika no anton inimprintan materyal so usaren bilang basiyan na paliwawam, nayarian moy manipon na materyal manlapud reperensyan pilien mo. Anggaman ontan, legan ya ipaparaan moy paliwawam, seguroen a say interon presentasyon so niyapasakey ed liber na suheton nipabtang. Sano desidien no anto so ilaktip, kaukolan mo met ya ikonsidera iray dumerengel mo.

Maalwar ya aralen so reperensyan materyal, analisaen iray tekston nilaktip ditan. Insan konsideraen no panon itan ya usaren a sankaepektiboan a para ed pakagunggonaan na saray dumerengel. Mamili na duara odino nayarin taloran punto manlapud inimprintan materyal ya usaren bilang manunan punto ed paliwawam. Ontan met, pilien ed nipabtang a materyal iray teksto a nononoten mon basaen tan singbaten.

Kaunongan karakel ed materyal so nepeg mon kobrian? Saraman labat so nasarag mon epektibon iparungtal. Agmo ibabaliwala iray epektibon metodo na panagbangat ta pian ilaktip so dakel ya impormasyon. No arum ed materyal so ag-ontukoy ed gagala na paliwawam, iyapasakey ed saray porsyon ya ontulong ed sika diad pakarapat ed satan a kalat. Manlapud nipabtang a materyal, usaren so makaibangat tan makagunggonan maong ed saray dumerengel mo. Say gagalam ed sayan punton pangonsehoan ed panagpaliwawa so, aliwan say panimano ed no kaunongan karakel so nakobrian mo, noagta say pangusar ed no anto so nipabtang bilang basiyan na paliwawam.

Agnigana so paliwawam a basta sumaryo na nipabtang a materyal. Nepeg mon iplanon isalaysay so arum a punto, palaknaben iratan, iyilustra iratan, tan nayarin mangiter na ehemplo a kiyaplikaan na saratan. Nepeg ya usaren so kaaruman iran ideya diad panibukel ed saray importantin punto ed nipabtang a materyal mo imbes a salatan itan a materyal.

Nasabi panaon, saray agagin lalaki a walaan na nakaukolan a kualipikasyon bilang managbangat so nayarin napabtangan a manbangat diad Service Meeting. Atalosan da so pankaukolan na epektibon panangusar ed nipabtang a materyal imbes a satan so salatan da na sananey. Mipadpara, saray agagin lalaki a mangiter na paliwawa ed publiko so naikdan na saray outline a tumboken. Onkana ed saraya so inkamangitukoy-tukoy, balet ta malinlinew dan ipabitar iray manunan punto a tibukelen, saray mananuportan argumento ya usaren, tan saray teksto a mangiter na pundasyon ed paliwawa. Say panaral no panon so pambangat diad pangusar ed nipabtang a materyal bilang basiyan et sakey ya importantin parte na panagparaan ed arum iran pribilehyo na panagpaliwawa.

Sayan panagpasal so ontulong met ed sika a mangikondukta na progresibo iran panangiyaral ed Biblia. Naaralan mon iyapasakey so imano ed aaralen a materyal imbes ya onsuawi ed tema diad pangipabitar na arum a bengatla a nayarin makapainteres balet ta agnakaukolan diad pantalos ed tema. Ingen, no naalam so peteg a getma na sayan leksion, agka magmaliw a masyadon estrikto diad panumbok ed aaralen a materyal a nasaew mo lan iter so kaaruman ya eksplinasyon a nayarin nakaukolan na sakey ya iyaaralan.