Pangipapasal ed Saray Ministro na Panarian

1-3. Panon ya pinalaknab nen Jesus so panagpulong, tan anto ray nitepet tayo?

DIAD loob na duay taon, nampulong si Jesus ed interon Galilea. (Basaen so Mateo 9:35-38.) Nila to ray dakel a syudad tan baryo, nambabangat diad saray sinagoga tan impulong toy maong a balita na Panarian. Inerman so nampulongan to, sikatoy minungkog na totoo. “Dakel so aanien,” kuan nen Jesus, tan dakel ni kaukolan ya komikimey.

² Inorganisa nen Jesus so panagpulong pian napalaknab itan. Panon? Diad impangibaki tod 12 apostol to ya “mangipulong na panarian na Dios.” (Luc. 9:1, 2) Nayarin nantepet iray apostol no panon dan gawaen iyan kimey. Antis to ran imbaki, maar-aro ton innabang ed sikara so inter na Ama to ed tawen​—say panangipasal.

³ Balet ompan nitepet tayo: Panon ya impasal si Jesus na Ama to? Panon ya impasal nen Jesus iray apostol to? Tan natan ey​—kasin ipapasal na Mesianikon Ari iray papatumbok to pian nagawaan day ministeryo ra? Panon?

“Sasalitaen Ko no Anto Iray Imbangat ed Siak na Ama”

4. Kapigan tan iner imbangat si Jesus na Ama to?

⁴ Malinew ya binidbir nen Jesus ya sikatoy imbangat na Ama to. Legan na ministeryo to, inkuan to: “Sasalitaen ko no anto iray imbangat ed siak na Ama.” (Juan 8:28) Kapigan tan iner imbangat si Jesus? Mapatnag ya say panguloan ya Anak na Dios et impasal ag-abayag kayari na impamalsa ed sikato. (Col. 1:15) Diad tawen, kaiba na Ama so Anak to ed agnabilang a taotaon, ya ondedengel tan mangoobserbad “Makapadinayew a Managbangat.” (Isa. 30:20, NW) Kanian anggapoy miparad edukasyon ya naawat to nipaakar ed saray kualidad, kimey, tan gagala na Ama to.

5. Antoy imbangat na Ama ed Anak nipaakar ed ministeryo to diad dalin?

⁵ Asabi panaon, imbangat nen Jehova so Anak To nipaakar ed ministeryo to diad dalin. Imanoen so propesiyan mangipapanengneng ed relasyon na Makapadinayew a Managbangat tan na panguloan ya Anak to. (Basaen so Isaias 50:4, 5.) “Kinabuasan” ya babangonen nen Jehova so Anak to, so kuan na propesiya. Naiimadyin tayod saya so sakey a managbangat ya masakbay ton babangonen so estudyante to pian bangatan. Oniay imbaga na sakey a reperensyad Biblia: ‘Singa sikatoy estudyanten aawiten nen Jehova ed eskuelaan, tan ibabangat to no antoy ipulong tan panon so pampulong.’ Diad satan ya “eskuelaan” ed tawen, imbangat nen Jehova no ‘anto so ibaga tan no anto so ibangat’ na Anak to. (Juan 12:49) Impasal to met so Anak no panoy manbangat.a Sanen wadiad dalin si Jesus, nausa-usar toy impangipasal ed sikato ta agto labat asumpal so ministeryo to noagta impasal to met iray papatumbok to pian nasumpal day ministeryo ra.

6, 7. (a) Panon ya impasal nen Jesus iray apostol to, tan antoy agawaan da? (b) Anton panangipasal so sineguro nen Jesus ya naawat na saray papatumbok to natan?

⁶ Singa abitlad gapo, panon ya impasal nen Jesus iray apostol to? Unong ed Mateo kapitulo 10, inikdan to ray espisipikon instruksion parad ministeryo ra, kaiba iraya: no iner so pampulongan (bersikulo 5, 6), anto so ipulong (bersikulo 7), say pankaukolan dan manmatalek ed si Jehova (bersikulo 9, 10), no panoy iyasingger ed householder (bersikulo 11-13), antoy gawaen no ag-interesadoy too (bersikulo 14, 15), tan no panon ya arapey panamasegsegang (bersikulo 16-23).b Akatulong so maong ya impangipasal nen Jesus ed saray apostol to pian nidaulo day pangipulong na maong a balita nen inmunan siglo C.E.

⁷ Diad panaon tayo ey? Si Jesus, say Ari na Panarian na Dios et inter tod papatumbok to so sankaimportantian ya asainmin, say pangipulong ed “maong a balita na panarian . . . ed interon dalin bilang pantasi ed amin a nasyones.” (Mat. 24:14) Kasin impasal itayo na Ari ya sumpalen iyan sankaimportantian ya kimey? On! Manlapud tawen, sineguro na Ari ya nipasal iray papatumbok to no panoy pampulong tan no panon dan sumpalen iray importantin responsabilidad da ed kongregasyon.

Pangipapasal ed Saray Ministro a Magmaliw ya Ebanghelisador

8, 9. (a) Antoy manunan gagala na Teokratikon Eskuelaan Parad Ministeryo? (b) Panon kan atulongan na aral ed midweek pian magmaliw ya mas epektibo ed ministeryo?

⁸ Abayag lan uusaren na organisasyon nen Jehova iray asemblea, kombension, tan aral ed kongregasyon​—singa say Pantitipon Parad Panagserbi​—pian ipasal iray totoo na Dios parad ministeryo. Balet kagapo na 1940’s, inyuksoy na saray mangidadaulon brother diad headquarters so pangipasal panamegley na nanduruman eskuelaan.

⁹ Teokratikon Eskuelaan Parad Ministeryo. Singa naaralan tayod apalabas ya kapitulo, ginmapo iyan eskuelaan nen 1943. Kasin say gagala labat na sayan eskuelaan et ipasal iray estudyante a magmaliw ya maong a managpaliwawa ed kongregasyon? Andi. Pareho nin siansiay manunan gagala na sayan eskuelaan, say pangipasal ed totoo na Dios ya usaren so regalon panagsalita pian idayew si Jehova diad ministeryo. (Sal. 150:6) Imparaan na saman ya eskuelaan so amin ya agagin nampa-enroll pian magmaliw ya mas epektibon ministro na Panarian. Diad panaon tayo, makakaawat tayo na ontan ya panangipasal diad aral tayod midweek.

10, 11. Siopa la natay nayarin manpa-enroll ed Gilead School, tan antoy gagala na curriculum?

¹⁰ Watchtower Bible School of Gilead. Ginmapo so tatawagen la natan ya Watchtower Bible School of Gilead nen Lunes, Pebrero 1, 1943. Say datin ipapasal ed sayan eskuelaan et saray payunir tan arum nin walad sigpot panaon pian ibaki ya misionero ed nanduruman bansa. Balet manlapu la nen Oktubre 2011, say makapanpa-enroll labat et saramay wala lad special full-time service​—saray espisyal payunir, ombiabiahen manangasikaso tan kaasawaan da, Bethelite, tan misionero ya agni akapanaral ed sayan eskuelaan.

¹¹ Antoy gagala na curriculum na eskuelaan? Oniay imbaga na abayag lan instruktor: “Pian pabiskegen so pananisia na saray estudyante panamegley na impasyan panaral ed Salita na Dios tan pian tulongan iran napaaligwas iray espiritual ya kualidad a kaukolan da diad pangarap ed saray subok ed asainmin da. Say sakey nin importantin gagala na curriculum et pian mas napakiwas iray estudyante ya mibiang ed panag-ebanghelyo.”​—Efe. 4:11.

12, 13. Antoy epekto na Gilead School ed interon mundon panagpulong? Mangiter na alimbawa.

¹² Antoy epekto na Gilead School ed interon mundon panagpulong? Manlapu nen 1943, masulok ya 8,500 ya agagi so impasal ed sayan eskuelaan,c tan saray misioneron impasal ed Gilead et manlilingkor ed masulok ya 170 a bansa. Akatulong na baleg ed saray misionero so impangipasal ed sikara. Maseseg tan maabig so alimbawa rad ministeryo tan ipapasal da met so arum a magmaliw ya ontan. Idadaulo na maslak ya misionero so kimey ed saray lugar ya pigpigaray manangipalapag na Panarian.

¹³ Imanoen tayo pay agawa ed Japan sanen apatunda so inorganisan panagpulong legan na Sankamundoan a Guerra II. Nen Agosto 1949, kulang nin samplora so publisher ed Japan. Balet nen mansampot itan a taon, makulikulin nampulong ditan so 13 misionero ya nan-graduate ed Gilead. Dakel ni ray misioneron sinmasabi. Nen unaan, diad angkakabaleg a syudad so nampulongan da; ag-abayag, linma rad arum nin syudad. Maligligsa dan pinaseseg iray iyaaralan da tan saray arum ni ya manpayunir. Maabig so resulta na inkakuli ra. Natan, wala lay 216,000 ya manangiyabawag na Panarian ed Japan, tan ngalngali 40 porsiento ed sikara so payunir!d

14. Saray teokratikon eskuelaan et paneknek na anto? (Nengnengen met so kahon ya “Saray Eskuelaan ya Mangipapasal ed Saray Ministro na Panarian.”)

¹⁴ Arum nin teokratikon eskuelaan. Say Pioneer Service School, Bible School for Christian Couples, tan Bible School for Single Brothers et akatulong ed saray nanaral ya napaaligwas so espiritualidad da tan magmaliw a maseseg ya manangidaulo ed panag-ebanghelyo.e Amin irayan teokratikon eskuelaan et mabiskeg a paneknek ya ipaparaan na Ari tayo iray papatumbok to pian nasumpal day ministeryo ra.​—2 Tim. 4:5.

Pangipapasal ed Saray Brother Pian Nagawaan Da ray Importantin Responsabilidad Da

15. Anto ray labay ya aligen ed si Jesus na saray lalakin walaay responsabilidad?

¹⁵ Imanoen lamet imay propesiya nen Isaias nipaakar ed si Jesus ya ibabangat na Dios. Diad satan ya “eskuelaan” ed tawen, naaralan na Anak ‘no panon ya pabiskegen iray naksawan panamegley na saray salita.’ (Isa. 50:4) Inyaplika nen Jesus itan ya instruksion; nen wadiad dalin, pinabiskeg to iramay “mansasagpot tan nabebelatan.” (Mat. 11:28-30) Pian naalig si Jesus na saray lalakin walaay responsabilidad, labay day magmaliw ya makapaseseg ed saray agagi ra. Kanian, ginawa iray nanduruman eskuelaan pian tulongan iray kualipikadon brother a magmaliw ya mas epektibon manlingkor ed saray kapananisiaan da.

16, 17. Antoy gagala na Kingdom Ministry School? (Nengnengen met so footnote.)

¹⁶ Kingdom Ministry School. Ginmapo so sankaunaan a klase na sayan eskuelaan nen Marso 9, 1959, diad South Lansing, New York. Inimbitaan iray ombiabiahen manangasikaso tan saray manlilingkor ed kongregasyon ya onatendi ed sakey bulan a kurso. Ag-abayag impatalos so English a kurso ed arum iran lenguahe, tan ginmapon impasal iray brother ed interon mundo.f

¹⁷ Oniay imbaga na 1962 Yearbook of Jehovah’s Witnesses ya gagala na Kingdom Ministry School: “Lapud masyadon busy so bilay ed sayan mundo, kaukolan ya say manangasikaso ed kongregasyon na saray tasi nen Jehova et organisaen toy kimey to pian naikdan toy imano so amin ed kongregasyon tan sikatoy magmaliw ya bendisyon ed sikara. Ontan met, agto nayarin paulyanay pamilya to pian naasikasoy kongregasyon. Imbes, kaukolan ya balanse so panagnonot to. Talagan marakdakep a pribilehyo na saray lingkor ed kongregasyon so panaral ed Kingdom Ministry School pian nipasal tan natulongan iran gawaen so ibabaga na Biblia a nepeg ya sumpalen na saray manangasikaso!”​—1 Tim. 3:1-7; Tito 1:5-9.

18. Panon ya nagugunggonaan iray totoo na Dios ed Kingdom Ministry School?

¹⁸ Amin ya totoo na Dios et nagugunggonaan ed Kingdom Ministry School. Panon? No iyaplika na saray elder tan ministeryal a lingkor so naaralan dad eskuelaan, singa si Jesus, sikaray makapaseseg ed saray kapananisiaan da. Agta apresyaen mo so maaron pananalita, idedengel, odino makapaseseg ya ibibisita na maasikason elder o ministeryal a lingkor? (1 Tes. 5:11) Talagan bendisyon ed kongregasyon iray kualipikadon lalaki!

19. Anto ni ran eskuelaan so inyuksoy na Teaching Committee, tan parad anto iratan?

¹⁹ Arum nin teokratikon eskuelaan. Inyuksoy na Teaching Committee na Mananguley ya Ulop so arum nin eskuelaan a mangipasal ed saray brother ya walaay responsabilidad ed organisasyon. Saratan ya eskuelaan et inletneg pian tulongan iray responsablin brother (saray elder, ombiabiahen manangasikaso, tan membro na Branch Committee) pian epektibon manumpal ed dakel ya responsabilidad da. Papasesegen na saray base ed Biblian kurso iray brother pian napansiansia ran mabiskeg so espiritualidad da tan niyaplika ray Makasulatan iran prinsipyo diad panagtrato dad saray mablin karnero ya inmatalek nen Jehova ed sikara.​—1 Ped. 5:1-3.

20. Akin et nibaga nen Jesus ya amin tayo et ‘imbangat nen Jehova,’ tan antoy determinadom a gawaen?

²⁰ Malinew, sineguro na Mesianikon Ari ya nipasal a maong iray papatumbok to. Amin ya panangipasal et nanlapud tagey a paleksab: Impasal nen Jehova so Anak to, tan impasal na Anak iray papatumbok to. Kanian nibaga nen Jesus ya amin tayo et ‘imbangat nen Jehova.’ (Juan 6:45; Isa. 54:13) Komon ta determinado tayon anamoten so pangipapasal ed sikatayo na Ari. Tan tandaan tayo ya say manunan gagala na amin ya panangipasal et pian tulongan itayon mansiansian mabiskeg ed espiritual, diad ontan et sigpot tayon nasumpal so ministeryo tayo.