Saray Reperensya Parad Workbook ed Aral
HULYO 4-10
KAYAMANAN ED SALITA NA DIOS | 2 SAMUEL 18-19
“Barzilai—Sakey ya Alimbawa na Kapaabebaan”
Barzillai—Sakey a Lakin Amta To Iray Limitasyon To
Maseguron pisalsalamatan a maong nen David so impanulong ed sikato nen Barzillai. Tan ompatnag ya aliwa labat a materyal iran pankaukolan so labay ya itumang na ari ed si Barzillai, lapud agla itan nakaukolan na sayan mayaman a masiken. Nayarin labay nen David ya ikdan si Barzillai na posisyon ed palasyo lapud makapadinayew iran kalidad na sayan masiken. Seguradon sakey a kagalangan so pakawalaan nen Barzillai na permanentin posisyon diad palasyo lapud diad satan et napanggayagaan to iray pribilehyo na pagmaliw a sakey a kaaro na ari.
Barzillai—Sakey a Lakin Amta To Iray Limitasyon To
Say sakey a rason no akin ya ontan so desisyon nen Barzillai et sikatoy maedad la kanian wala laray agto nagawaan. Nayarin inisip nen Barzillai a sikatoy agla manbayag. (Salmo 90:10) Ginawa ton amin so nayarian to ta pian nasuportaan si David, balet amta to met iray limitasyon to lapud inkamasiken to la. Agninonot nen Barzillai so pakawalaan na impluensya tan inkabantog, noagta say ninonot to et no anton talaga so nasarag to nin gawaen. Aliwan singa si Absalom a maambisyon, si Barzillai so makabat ya angipatnag na kapaabebaan.—Uliran 11:2.
Barzillai—Sakey a Lakin Amta To Iray Limitasyon To
Ipapabitar na salaysay nipaakar ed si Barzillai a nakaukolan so pagmaliw a balanse. Diad sakey a dapag, agtayo nepeg ya ipulisay so sakey a pribilehyo ed serbisyo odino paliisan so pandampot ed satan lapud mas labay tayo so bilay ya anggapoy aasikasoen a responsabilidad odino iisipen tayo ya agtayo nasarag so manakbat na responsabilidad. Napanoan na Dios so antokaman a kakulangan tayo daput no manmatalek itayo ed biskeg tan kakabatan ya ipagamor to.—Filipos 4:13; Santiago 4:17; 1 Pedro 4:11.
Diad biek a dapag, nepeg tayon bidbiren iray limitasyon tayo. Alimbawa, say sakey a Kristiano et nayarin okupado lan maong ed espiritual iran kimey to. Namomoria to a no awaten to so kaaruman niran pribilehyo, ompano napaulyanan to so Makasulatan a responsabilidad ton legpeten so pamilya to. Diad onian kipapasen, agta kapaabebaan tan inkamakatunongan ed biang to so agto ni pangawat ed kaaruman iran pribilehyo?—Filipos 4:5; 1 Timoteo 5:8.
Saray Espiritual a Kayamanan
‘Sumpal Mo Anggad Sampot so Pilulumbam’
19 No wala ray subok ya dadalanen mo ya lapud satan et agmo la nagawaan iray datin gagawaen mo parad si Jehova tan agka natatalosan na arum, napaseseg ka ed alimbawa nen Mefiboset. (2 Sam. 4:4) Sikatoy lupoy tan aminsan et hinusgaan nen Arin David. Aliwan si Mefiboset so sengegan na saratan ya subok. Balet anggano onman so situasyon to, agnanisip na negatibo; inapresya to ray maong ya agawad bilay to. Pisalsalamatan toy kamaongan nen David ed sikato. (2 Sam. 9:6-10) Kanian nen hinusgaan nen David, tinalosan nen Mefiboset so situasyon. Agbinmarong ed si David, tan agto tinetel si Jehova ed ginawa nen David. Say nampokusan nen Mefiboset et no antoy nagawaan to pian nasuportaan so tinuro nen Jehova ya ari. (2 Sam. 16:1-4; 19:24-30) Impaisulat nen Jehova ed Biblia so balibalin alimbawa nen Mefiboset pian pakaaralan tayo.—Roma 15:4.
Magmaliw ya Epektibo ed Ministeryo
Panliketan so Antokaman ya Pribilehyom Natan!
15 Anto ray iisipen mon goal? Kerew mod si Jehova ya tulongan to kan makapanpili na goal ya talagan sarag mon gawaen. (Pro. 16:3; Sant. 1:5) Kasin sarag mon gawaen ya goal iramay abitla ed parapo 1—singa say pan-auxiliary o pan-regular payunir, panlingkor ed Bethel, o pamboluntaryo ed saray construction project na organisasyon tayo? Ompan sarag mo met so manaral na sananey a lenguahe pian napulongan mo ray dayo ed lugar yo odino makatulong ka ni ingen ed lugar ya mas baleg so pankaukolan. Pian naamtaan mo ray kaaruman ya impormasyon tungkol ed sarayan goal, basam so kapitulo 10 na libron Organisadon Manggawa na Linawa nen Jehova tan mitongtong kad saray elder diad kongregasyon yo. Legan mon pansasagpotan ya aboten irayan goal, naliketan iray agagi ed iyaaligwas mod espiritual tan maliket ka met.
16 Panon to balet no lapud situasyon mo natan et agmo ni nagawaan iratan ya goal? Manpokus ka ni ed arum ya goal ya seguradon nagawaan mo. Anto iratan?
17 Basaen so 1 Timoteo 4:13, 15. No sakey kan bautismadon brother, marakep no i-goal mon paaligwasen so panagpaliwawam tan panagbangat mo. Akin ey? On ta no “iyulom” tan paaligwasen moy panagbasam, panagpaliwawam, tan panagbangat mo, magmaliw kan bendisyon ed amin ya ondengel ed sika. Aral mo tan iyaplikam so kada leksion ya walad brosyur ya Manseet Ka ed Panagbasa tan Panagbangat. No walay partem ed aral, basam tan aral mon maong so leksion ya akaasain ed sika, manpraktis ka ya maminpiga, tan iyaplikam iray punton abasam ed brosyur. Kerew kay suggestion ed akaasain ya katulongan a managkonseho odino diad arum ni ran elder ya “mansasagpot ed . . . panagbangat.”a (1 Tim. 5:17) Tandaan mo ya say goal mo et aliwa labat ya pian magmaliw kan marunong ya manpaliwawa o manbangat, noagta pian napabiskeg moy pananisia na saray ondedengel ed sika tan napakiwas mo ran iyaplika iray naaralan da. No ontay gawaen mo, aliwan sika labat so maliket noagta anggan sikara met.
18 Pribilehyo tayon amin so manpulong tan manbangat. (Mat. 28:19, 20; Roma 10:14) Kasin labay mo nin paaligwasen so abilidad mo ed sayan importantin kimey? Aral mo sirin so brosyur ya Panagbangat, tan nonot mo no panon mon iyaplika iray naaralan mon punto. Makatulong met iray suggestion ed Workbook ed Aral tan saray video na pangaligan a presentasyon ya nababantayan tayod aral ed midweek. Salim irayan nanduruman suggestion, tan nengneng mo no antoy epektibo ed teritorya yo. No gawaen mo iratan, seguradon napaaligwas moy dunong mon manpulong tan manbangat kanian magmaliw kan mas maliket ed ministeryom.—2 Tim. 4:5.
19 Bilang Kristiano, sakey met ed saray importantin goal tayo et no panon tayon mas nipanengneng iray ugali tan kualidad ya makapaliket ed Dios. (Gal. 5:22, 23; Col. 3:12; 2 Ped. 1:5-8) Panon mon nagawaan itan? Singa bilang, goal mon pabiskegen so pananisiam. Maabig no manbasa ka na saray artikulod publikasyon tayo tungkol ed satan. Dakel met so nabantayan mon video ed JW Broadcasting® tungkol ed saray agagi ya asarag day nanduruman subok tan problema ta mabiskeg so pananisia ra. Insan manisip kay situasyon ed bilay mo ya naalig moy pananisia ra.
HULYO 11-17
KAYAMANAN ED SALITA NA DIOS | 2 SAMUEL 20-21
“Si Jehova et Dios na Inkahustisya”
mwbr22.07—it-1 932 ¶1
Gibeon
Diad inlabas na saray siglo, nansiansia iray orihinal ya Gibeonita bilang sakey ya grupo na totoo anggaman sinali nen Arin Saul ya upoten ira. Balet maanos ya inalagar na saray Gibeonita ya ipaamta nen Jehova itan ya agawan ag-inkahustisya. Ginawa to iya panamegley na taloran taon ya eras legan na uley nen Arin David. Tinmupleg si David ed si Jehova tan naamtaan ton walay agawan impankasalanan ed dala, kanian tinepetan nen David iray Gibeonita no antoy nepeg ya gawaen pian nasakbongan so kasalanan. Duga so inyebat na saray Gibeonita ya “aliwan pilak odino balitok” so kaukolan ta base ed ganggan agnayarin awaten so dondon parad bilay na sakey ya managpatey. (Num 35:30, 31) Binidbir da met ya ag-ira nayarin mamatey na too no anggapoy legal ya autorisasyon da. Kayarin nantepet si David insan da labat kinerew ya iter ed sikara so pitoran “ananak” nen Saul. Lapud abitla ya say nankasalanan ed dala et si Saul tan say sankaabungan to, ompapaway ya akibiang ed impamatey iray “ananak” to balanglan direkta odino aliwan direkta, anggaman si Saul so nayarin angidaulo ed impamatey. (2Sa 21:1-9) No ontan sirin, ag-ira pinatey lapud kasalanan na ama ra (De 24:16) noagta inter labat so hustisya base ed ganggan ya “bilay parad bilay.”—De 19:21.
Saray Espiritual a Kayamanan
Saray Elder—‘Kakimeyan Tayo Pian Manliket Itayo’
14 Saray Tasi nen Jehova diad interon mundo et mantutultuloy ya manlilingkor ed Dios anggano dakel so subok ya iiter nen Satanas tan na sayan mundo. Say arum ed sikatayo et singa milalaban ed angkakabaleg iran problema. Balet lapud sigpot itayon manmamatalek ed si Jehova, makpel tayon nasusungdoan iratan, no panon a makpel ya pinatey nen David si Goliat. Balet no maminsan, nakekesawan tayo met lapud pipupuligesgesan tayod mundo nen Satanas. Diad onia ran pankanawnawa, mas mainomay ya onkapuy so liknaan tayo. Balet nayarin walay elder ya makaimanod nalilikna tayo tan tulongan to itayon napapawil so liket tan biskeg tayo. Dakel lay akaeksperiensya na onia. Singa bilang, oniay inkuan na sakey a payunir ya masulok lan 60 años: “Walay panaon nensaman ya makakkapuy ak, tan naknaksawan ak ya nampulong. Naimano itan na sakey ya elder tan inasinggeran to ak. Makapaseseg imay nantongtongan min salaysay ed Biblia. Ginawak iramay suhestion to, tan akatulong iratan ed siak.” Inyarum to: “Agaylay panangaro to man ya elder, naimano ton makakkapuy ak tan tinulongan to ak!” On, talagan makapabiskeg na liknaan iray maaron elder ya mangiimanod sikatayo tan akaparaan ya ontulong, singa si Abisai nensaman.
HULYO 18-24
KAYAMANAN ED SALITA NA DIOS | 2 SAMUEL 22
“Manmatalek ed Tulong nen Jehova”
Peteg Kasin ‘Makaapit Ka ed Dios’?
11 Sakey a bengatla so pakabasa a say Dios et “mabiskeg ed pakapanyari.” (Isaias 40:26) Sananey met a bengatla so pakabasa nipaakar ed no panon ton inliktar so Israel diad Ambalangan Dayat insan to sinustuni so nasyon ed kalawakan ed loob na 40 taon. Nayarian mon iretrato ed kaisipan mo so danum a nabebelsay. Nayarian mo met ya iretrato ed isip mo so nasyon—nayarin 3,000,000 ya amin—a manaakar ed amagan buer na abelsay a dayat, say kinmigtel a danum so singa baleg a padir ed nantupag a diking. (Exodo 14:21; 15:8) Nanengneng mo so ebidensya na panangiyagel na Dios ed kalawakan. Danum a manbubwak a manlalapud bato. Tagano, a singa amputin buke-bukel, so pinmelag ed dalin. (Exodo 16:31; Numeros 20:11) Aglambengat ipaparungtal dia nen Jehova a sikatoy walaan na pakapanyari noag ingen uusaren to itan ed biang na totoo to. Agta makapaseguro so pakaamta a saray pikakasi tayo et onsasabi ed makapanyarin Dios a ‘mananalimbeng tayo tan biskeg tayo, sikato so sakey a maparparaan a tulong ed gonigon?’—Salmo 46:1.
mwbr22.07—w10 6/1 26 ¶4-6
“Onkiwas Kan Matoor”
Imanoen tayon maong iyan imbaga nen David. Say Hebreon salita ya impatalos ya “onkiwas a matoor” et nayari met ya ipatalos ya “onkiwas ed matoor a panangaro.” Say tuan katooran et akabase ed panangaro. Maar-aron iyaapit nen Aman Jehova so sarili to et saramay matoor ed sikato.
Imanoen met ya say katooran et aliwa labat ya basta liknaan noagta nanenengneng iya diad gawa. Onkikiwas si Jehova ya matoor a singa naobserbaan ya mismo nen David. Legan na saray sankairapan ya agawa ed bilay nen David, tinulongan nen Jehova, matoor Ton prinotektaan tan inggiya so matoor ya ari. Misalsalamat si David tan binidbir to ya inliktar nen Jehova ed “lima na amin a kalaban to.”—2 Samuel 22:1.
Antoy naaralan tayod imbaga nen David? Agmanguuman si Jehova. (Santiago 1:17) Agmanguuman iray estandarte to tan lanang ton totooren iray promisa to. Diad sakey nin salmo nen David, oniay insulat to: ‘Agpaulyanan nen Jehova iray matoor ed sikato.’—Salmo 37:28.
Saray Espiritual a Kayamanan
Bayuboan so Espiritu na Inkamapaabeba
7 Baleg so epekto na ehemplo na Dios ed kapaabebaan ed si salmistan David. Oniay inkanta tod si Jehova: “Inter mo ed siak met so kinlong na panangilaban mo; et say [kapaabebaan, NW] mo ginawa to ak a baleg.” (2 Sam. 22:36) Binidbir nen David a dakel so agawaan to parad Israel lapud kapaabebaan ya impanengneng nen Jehova ed sikato, diad impangimano tan impanulong na Dios ed sikato. (Sal. 113:5-7) Ontan met ed sikatayo natan. Wala kasi kualidad, abilidad, tan pribilehyo a walad sikatayo ya ‘agtayo inawat’ ed si Jehova? (1 Cor. 4:7) Magmaliw a “manunaan” so mapaabeban lingkor na Dios lapud sikatoy mas pablien nen Jehova. (Luc. 9:48) Pantongtongan tayo no panon iyan nagawa.
Magmaliw ya Epektibo ed Ministeryo
Job—Sakey a Toon Nansungdo tan Nanmatoor
7 Anggaman say maslak a Kristiano natan et agmaniirap a singa ed asagmak nen Job, nanduruman klase na kairapan so sasagmaken da. Dakel so nidunget ed panamasegsegang odino problema ed pamilya. Ompatnag a makapakapuy met so kairapan na panagbilay odino sakit. Arum so angisakripisyo ed bilay da lapud pananisia ra. Siempre, agtayo ipasen a si Satanas so mismon pansesengegan na amin lan trahedya a sagmaken tayo. Diad tua, arum a problema so nayari ni ingen a makasengeg ed dilin kalilingoan tayo odino say atawir tayon kipapasen ed pisikal. (Galacia 6:7) Tan amin tayo so apektado ed saray makapakapuy ya epekto na itatakken tan saray kalamidad. Ipapalinew na Biblia a diad sayan panaon et agmamilagron sasalimbengan nen Jehova iray lingkor to manlapud sarayan kairapan.—Eclesiastes 9:11.
8 Anggaman kuan, nayarin usaren nen Satanas iray kairapan a sasagmaken tayo pian pakapuyen so pananisia tayo. Sinalambit nen apostol Pablo so impanirap to ed “sakey a sabit ed laman, sakey ya ibabaki nen Satanas,” a ‘manatampal’ ed sikato. (2 Corinto 12:7) Balanglan problema itan ed pisikal, a singa say makapuy a pakanengneng, odino arum ni, atalosan nen Pablo a nayarian nen Satanas ya usaren so problema tan say pakakadismaya ed satan pian naandi so gayaga tan integridad to. (Uliran 24:10) Natan, nayarin sagyaten nen Satanas iray kapamilyaan, kaeskuelaan, odino anggan saray diktador a gobierno pian pasegsegangen iray lingkor na Dios ed arum a paraan.
HULYO 25-31
KAYAMANAN ED SALITA NA DIOS | 2 SAMUEL 23-24
“Kasin Mansasakripisyo Ka no Mangiiter Ka?”
mwbr22.07—it-1 146
Arauna
Ompapaway ya inyopresi nen Arauna so pasen, kaiba la ray baka tan saray kiew ya itutungo parad bagat, ya libre. Balet impilit nen David ya bayaran to iratan. Ipapanengneng na rekord diad 2 Samuel 24:24 ya sinaliw nen David so panag-ilikan tan saray baka ed kantidad ya 50 siklo a pilak ($110). Balet ibabaga na salaysay ed 1 Awaran 21:25 ya nambayar si David na 600 siklo a balitok (manga $77,000) parad satan a pasen. Say binitla labat na nansulat ed Komaduan Samuel et say impangaliw ed pasen ya kawalaan na altar tan saray materyales ya inusar diad saman ya bagat. Kanian ompapaway ya say tutukoyen ton bili na impangaliw et para labat ed sarayan bengatla. Balet say tutukoyen na nansulat ed samay Unonan Awaran et saray bengatlan nipaakar ed templo ya sinmabi panaon et impaalagey ed satan ya pasen tan say arum nin gastos parad satan ya impamaalagey. (1Aw 22:1-6; 2Aw 3:1) Lapud balbaleg so interon lugar ya kawalaan na templo, ompapaway ya say 600 siklon balitok so bili na satan ya maawa-awang ya pasen, aliwan samay melag labat ya pasen ya inusar parad altar ya inmunan impaalagey nen David.
Manaral Manlapud ‘Manuna Iran Kabiangan na Katuaan’
8 No say sakey ya Israelita et boluntaryon manbagat pian ipanengneng so impapuson pisasalamat ed si Jehova odino onkerew na panangabobon panamegley na bagat a poolan, aliwan mairap parad sikato so pampili na maong a klase na ayep. Malikeliket ton iter ed si Jehova so sankaabigan. Saray Kristiano natan et agla literal ya manbabagat a singa samay walad Mosaikon Ganggan, balet manbabagat ira diad panguusar day panaon, biskeg, tan kaykayarian da pian lingkoray Jehova. Tinukoy nen apostol Pablo so ‘panangipakabat’ ed ilalo tayo tan say “panggawa na maabig tan say panginabang na saray bengatla ed arum” bilang bagat a makapaliket ed Dios. (Heb. 13:15, 16) Napatnagan ed awawey na saray lingkor nen Jehova sano mibibiang irad saratan ya aktibidad so kabaleg na pisasalamat tan apresasyon da ed amin ya inter nen Jehova ed sikara. Kanian singa saray manbabagat nensaman, kaukolan tayon usisaen so awawey tan motibo tayo diad panlilingkor ed Dios.
Saray Espiritual a Kayamanan
Saray Pabitar ed Libro na Komaduan Samuel
23:15-17. Ontan lay panagrespeto nen David ed ganggan na Dios nipaakar ed bilay tan dala a diad sayan inkagawa et pinaliisan toy panggawa na bengatlan kaulibay na isusumlang ed satan a ganggan. Nepeg a bayuboan tayo so ontan ya awawey ed amin a ganggan na Dios.
AGOSTO 1-7
KAYAMANAN ED SALITA NA DIOS | 1 ARARI 1-2
“Kasin Makakaaral Kad Saray Lingom?”
mwbr22.07—it-2 987 ¶4
Solomon
Nen nadngel da so tanol na musika ed Gihon, ya asingger labat ed kawalaan da, tan say eyag na totoo ya: “Manbilay komon na andukey si Arin Solomon!” tinmakas si Adonias tan saray kakaiba to lapud takot da tan agda amtay gawaen da. Impanengneng ya tampol nen Solomon ya magmaliw ya mareen so uley to ta agbinmawi nen nitrono bilang ari. Balet no kabaligtaran so agawa, ompan apatey si Solomon. Tinmakas si Adonias paonlad santuaryo pian naprotektaan. Kanian impaala nen Solomon si Adonias pian iyarap dad sikato. Impaamta nen Solomon ed si Adonias ya mansiansian manbilay basta anggapoy mauges ya naromog ed sikato, insan to la pinasempet ed abung to.—1Ar 1:41-53.
mwbr22.07—it-1 49
Adonias
Balet kayari impatey nen David, inmasingger si Adonias ed si Bat-sheba tan kinombinse to ya mitongtong ed si Solomon pian niiter ed sikato bilang asawa si Abisag, say kabataan ya biin angasikaso ed si David. Nanengneng ed samay imbaga nen Adonias ya, “Siak komon so manuley ed panarian tan iilaloan na interon Israel a siak so magmaliw ya ari” ya pakalikna to et insiblet ed sikato so karapatan to, anggaman binidbir to met ya walay panangigiya na Dios ed saman. (1Ar 2:13-21) Ompapaway ya samay kerew to et singa pinagkabayar labat ta naandi ed sikato so panarian, pero napatnagan ed satan ya wala ni so ambisyon nen Adonias, ta base ed sakey ya totontonen diad Bukig nensaman, saray asawa tan saray onkokomaduan asawa na ari et legal ya niiter labat ed samay onsalat ed sikato. (Ikompara so 2Sa 3:7; 16:21.) Ontan so pakanengneng nen Solomon ed sayan kerew nen Adonias ya indalan tod ina to kanian ingganggan to ya pateyen si Adonias, ya tampol met ya ginawa nen Benaias.—1Ar 2:22-25.
Saray Espiritual a Kayamanan
Saray Pabitar ed Libro na Unonan Arari
2:37, 41-46. Agaylan mapeligro so panisip a nasumlang na sakey iray ganggan ingen ta agnadusa! Saramay sigagagalan onkasipa ed ‘makisir a dalan a mamaarap ed bilay,’ so managmak ed saray pansumpalan na satan ya agmakabat a desisyon.—Mateo 7:14.
Magmaliw ya Epektibo ed Ministeryo
Mantultuloy ya Onaligwas Bilang Ministro
1 Saray Kristiano et nepeg ya onaligwas bilang ministro. Kanian impasal nen Jesus iray papatumbok to pian napaaligwas iray abilidad da. (Luc. 9:1-5; 10:1-11) Satan met so rason no akin ya impila nen Aquila tan Priscila si Apolos tan “impaliwawa ra ed sikato so dalan na Dios ed mas suston paraan.” (Gawa 18:24-26) Ontan met, pinaseseg nen Pablo so eksperiensyadon ebanghelisador ya si Timoteo ya itultuloy toy manseet ed panagbangat to, pian say iyaaligwas to et “nanengneng na amin a totoo.” (1 Tim. 4:13-15) Anggan panon kabayag ti lan manlilingkor ed Katawan bilang manangipalapag na maong a balita, kaukolan tayon tuloytuloy ya paaligwasen so abilidad tayod panagpulong.
2 Makaaral ed Arum: Pian onaligwas so abilidad tayo, makatulong no makaaral tayod arum. (Uli. 27:17) Kanian ondengel tayo no mitotongtong ed unabung so kaulop tayo. Onkerew tayo na espisipiko iran suhestion ed saray manangipalapag ya epektibod panagpulong, tan dengelen ya maong so ibaga ra. (Uli. 1:5) Kasin agmo kabisadoy man-RV, mangigapoy panangiyaral na Biblia, odino mibiang ed arum nin paraan na panagpulong? Maabig no sika lay onasingger ed manangasikaso na grupo yo odino ed sakey ya eksperiensyadon manangipalapag pian paipasal. Tandaan met ya sarag na masanton espiritu nen Jehova ya paaligwasen iray abilidad mo, kanian kerew mon naynay itan ed pikakasi.—Luc. 11:13.
3 Agka nasasakitan no walay mangiter ed sika na suhestion anggan agmo met kekerewen. (Ecl. 7:9) Singa si Apolos, mapaabeban awaten tan pisalamatan itan. Say panggawad satan et pangipanengneng na karunongan.—Uli. 12:15.
AGOSTO 8-14
KAYAMANAN ED SALITA NA DIOS | 1 ARARI 3-4
“No Akin ya Importante so Karunongan”
Kasin say Alimbawa To et Maong, Odino Onkanan Pasakbay?
4 Sanen ginmapon nanari si Solomon, akitongtong so Dios ed sikato panamegley na kugip tan imbaga Ton kerewen to so antokaman a labay to. Amta nen Solomon a kulang ni eksperiensya to kanian say kinerew to et kakabatan. (Basaen so 1 Arari 3:5-9.) Aliketan so Dios ta kakabatan so kinerew na ari imbes ya kayamanan tan kagalangan, kanian inikdan toy Solomon na “makabat tan makatalos a puso,” tan inikdan to met na maaligwas ya bilay tan uley. (1 Ara. 3:10-14) Singa imbaga nen Jesus, ontan la kabantog so kakabatan nen Solomon kanian nadngelan itan na reyna na Sheba tan nambaroy na arawi pian napaneknekan ton mismo.—1 Ara. 10:1, 4-9.
5 Agtayo iilaloan natan ya ikdan itayo nen Jehova na kakabatan diad mamilagron paraan. Anggaman imbagan mismo nen Solomon ya “si Jehova [et] mangiter na kakabatan,” insulat to met ya kaukolan tayoy mansagpot pian niwalad sikatayo itan. Inkuan ton: ‘Ikiling mo so layag mo ed kakabatan, tan ipeket mo so pusom ed pakatalos.’ Imbaga met nen Solomon a nepeg tayon “anapen” tan “usisaen” so kakabatan. (Uli. 2:1-6) On, sarag tayoy nawalaan na kakabatan.
6 Maabig no tepetay inkasikatayo, ‘Singa si Solomon, kasin papablien ko met so kakabatan?’ Lapud irap na bilay natan, say sankanonot na totoo et say kuarta, pananap na pambilay, tan no anton kurso so laen da. Sika tan say pamilyam ey? Ipapanengneng kasi na saray desisyon yo a papablien tan aanapen yoy kakabatan a nanlapud Dios? Kasin nepeg yon umanen so panmoria yo nipaakar ed kuarta tan edukasyon pian mas napansagpotan yoy nawalaan na kakabatan? Say igamor tan pangiyaplika yoy kakabatan et parad andi-anggaan ya pankaabigan yo. Oniay imbaga nen Solomon ya resulta no anapen moy kakabatan: “Natalosan mo naani so inkaptek tan inkatunong, . . . on, balang sakey a maong a basbas.”—Uli. 2:9.
Saray Espiritual a Kayamanan
Si Jehova so Dios na Saray Sipanan
15 Diad inka-organisa na saray kapolian nen Abraham bilang sakey a nasyon ed silong na Ganggan, benendisionan ira nen Jehova unong ed sipan to ed patriarka. Nen 1473 K.K.P., say kasublayan nen Moises, si Josue, so angidaulo’d Israel ya amaarap ed Canaan. Say katumbokan ya impangapag ed dalin ed limog na saray tribu so anumpal ed sipan nen Jehova ya iter so dalin ed bini nen Abraham. Sanen nanmatoor so Israel, tinoor nen Jehova so sipan ton panbiktoriaen ira sumpad kakabusol da. Nagkalalo lan tua iya legan na uley nen Arin David. Kasabi panaon na ilalak nen David a Solomon, asumpal so onkomatlon aspekto na say Abrahamikon sipanan. “Say Juda tan say Israel sikara so dakel a singa say buer a wala ed gilig na dayat dia ed karakel a mangakan tan maniinum tan manliliket.”—1 Arari 4:20.
AGOSTO 15-21
KAYAMANAN ED SALITA NA DIOS | 1 ARARI 5-6
“Makuli Iran Nankimey Lapud Inaro Day Jehova”
mwbr22.07—w11 2/1 15
Kasin Antam?
Saray sedro na Lebanon et kabkabat ya matibay, balibali, tan ambalingit so kiew da. Antakot met iratan na saray peste. Nibaga tayo sirin ya angusar si Solomon na sankaabigan iran materyales parad templo. Diad panaon tayo, datdaiset labat lay akeran kakiewan na sedro diad kapalandeyan na Lebanon, aliwan singa nensaman ya dakdakel.
mwbr22.07—it-1 424
Sedro
Dakdakel so kaukolan ya tablan sedro kanian kaukolan so nilibon trabahador ya manbatang na saray kiew, iyakar da iratan ed Tiro odino Sidon diad gilig na dayat na Mediteraneo, takeren da iratan pian magmaliw ya singa lamo, tan paletawen da iratan ed dayat ya nayarin anggad Jope. Insan da la guyoren tan iyakar iratan ed Jerusalem. Ginawa itan nen Solomon tan Hiram panamegley na kontrata. (1Ar 5:6-18; 2Aw 2:3-10) Manlapu lad saman, tuloytuloy so insabi na saray tabla legan na uley nen Solomon, kanian nibaga ya say karakel na ‘saray kiew a sedro et singa karakel na saray kiew a sikomoro’ legan na uley nen Solomon.—1Ar 10:27; ikompara so Isaias 9:9, 10.
mwbr22.07—it-2 1077 ¶1
Templo
Diad impangorganisa nen Solomon ed kimey, anawag na 30,000 a lalaki manlapud Israel. Insan nansusublayan to ran imbaki ed Lebanon ya 10,000 a lalaki kada bulan. Balet duay bulan ya mansiansia ra ed abung da diad baetan na turno da. (1Ar 5:13, 14) Anawag met na 70,000 ya trabahador tan 80,000 ya managtabas manlapud saray “dayon manaayam ed dalin.” (1Ar 5:15; 9:20, 21; 2Aw 2:2) Anuro si Solomon na 550 a lalaki ya mangidaulo ed kimey tan 3,300 ya kapatas na saray totoon mankikimey. (1Ar 5:16; 9:22, 23) Ompapaway ya 250 ed saraya so Israelita tan 3,600 so “dayon manaayam” ed Israel.—2Aw 2:17, 18.
Saray Espiritual a Kayamanan
mwbr22.07—g 5/12 17, kahon
Say Biblia—Sakey ya Libron Susto Iray Propesiyan Karga To, Part 1
SUSTO IRAY PETSA
Say sakey ya alimbawa ya importante ya susto iray petsa ed Biblia et amay nabasad 1 Arari 6:1 ya ontutukoy ed panaon nen inggapo nen Arin Solomon so panagpaalagey na templo diad Jerusalem. Oniay nabasa tayo: “Diad koma-480 taon [479 ya kompleton taon] kayari impaway na saray Israelita ed dalin na Ehipto, diad komapat a taon na uley nen Solomon bilang ari ed Israel, diad bulan na Ziv (say komaduan bulan), ginapoan ton ipaalagey so abung nen Jehova.”
Base ed kronolohiya na Biblia, say komapat ya taon na uley nen Solomon et nen 1034 B.C.E. Manlapud satan ya petsa, no onatras tayo na 479 ya kompleton taon, makasabi tayo ed 1513 B.C.E. say taon na impaway na Israel ed Ehipto.
AGOSTO 22-28
KAYAMANAN ED SALITA NA DIOS | 1 ARARI 7
“No Antoy Naaralan Tayo ed Duaran Lusek”
‘Diad Saray Palandey Nayarian Moy Mangotkot na Gansa’
Angusar si Arin Solomon na dakel ya gansa ed impanggaway templo diad Jerusalem. Dakel ed saratan et asamsam na ama ton si David diad impilaban tod saray Asiryano. (1 Awaran 18:6-8) Say gawad gansan “inbobo a dayat,” samay baleg a kargaan na danum ya pangaalaan na saray saserdote na panuras, et sarag toy mankargay 66,000 litro tan nayarin manbelat na anggad 30 tonelada. (1 Arari 7:23-26, 44-46) Wala met so duaran baleg a lusek ya gawad gansa diad arap na templo. Say kaatagey na saratan et 8 metro tan walay akatapew ya baleg a dekorasyon ya manga 2.2 metro so kaatagey da. Lungogan iratan ya lusek, kada sakey et manga 7.5 sentimetro so kakapal to, tan 1.7 metro so diametro. (1 Arari 7:15, 16; 2 Awaran 4:17) Makapadinayew so karakel na gansan inusar ed impanggawad saratan.
mwbr22.07—it-1 348
Boaz, II
Diad samay duaran angkabaleg a lusek a gansa ya impaalagey diad maglorian balkonahe nen Solomon, samay walad bandad amianen et nginaranan ya Boaz, ya nayarin mankabaliksay “Diad Biskeg.” Samay lusek balet ya walad abalaten et nginaranan na Jakin, ya kabaliksan toy “Komon ta Iletneg [nen Jehova] a Malet.” Kanian no panibaen ya dua tan basaen manlapud kawanan ya pakawigi, tan say manbasa et akaarap ed bukig, say nabuon ideya: ‘Komon ta iletneg [nen Jehova] a malet [so templo] diad biskeg.’—1Ar 7:15-21.
Saray Espiritual a Kayamanan
mwbr22.07—it-1 263
Panames
Kaukolan ya malinis ed pisikal iray mandadayew ed si Jehova diad kasantosan tan kalinisan. Napatnagan iya diad samay uksoyan ed tabernakulo tan diad insabi na panaon diad panaglingkor ed templo. Nen aturo ya atagey a saserdote si Aaron tan saray ananak to, nanames ni ra antis dan insulong iray kawes ya parad saserdote. (Ex 29:4-9; 40:12-15; Le 8:6, 7) No manuras na lima tan sali iray saserdote, mangala ray danum ed gansan palanggana ya walad sular na tabernakulo tan sinmabi panaon diad templo nen Solomon mangaala ray danum diad Dayat a minoldin metal odino depositoan na danum. (Ex 30:18-21; 40:30-32; 2Aw 4:2-6) Diad Agew na Pananakbong, mamiduan manames so atagey a saserdote. (Le 16:4, 23, 24) Saramay angibulos ed kanding parad Azazel, saramay angipaway ed katat, karne, tan dutak na saray ayep ya inyapay, tan saramay angipaway ed kampo na bagat ya ambalangan baka et nepeg ya manames tan ipesak da ray kawes da antis iran onloob lamet ed kampo.—Le 16:26-28; Nu 19:2-10.
AGOSTO 29–SETYEMBRE 4
KAYAMANAN ED SALITA NA DIOS | 1 ARARI 8
“Mapaabeba tan Impapuson Nampikasi ed Arap na Totoo si Solomon”
Paaligwasey Kalidad na Pikakasim Diad Panaral Moy Biblia
9 Pian naebatan so pikakasi, nepeg a manlapu itan ed puso. Diad 1 Arari kapitulo 8, nabasa so impapuson pikakasi nen Solomon diad arap na saray nandaragup ya Israelita sanen indedika so templo nen Jehova diad Jerusalem nen 1026 B.C.E. Indaydayew nen Solomon so Dios sanen niiyan la’d Sankasantosan a Pasen imay kaban na sipan tan napno so templo na lurem nen Jehova.
10 Imanoen pa no panon ya impabitar nen Solomon a nalalanor so puso diad panagpikasi. Binidbir to a si Jehova labat so makaamta no antoy walad puso na sakey a too. (1 Ara. 8:38, 39) Ipapanengneng met na pikakasi to a say nankasalanan et walaan na ilalo no ‘manpataoli ed Dios diad masimoon a puso.’ No bilang ta saray totoo na Dios et daegen na saray kalaban da, dengelen nen Jehova iray pikakasi ra no sigpot-puso iran onasingger ed sikato. (1 Ara. 8:48, 58, 61) On, nepeg ya impapuso iray pikakasi tayo.
Itagey so Matoor a Kalimaan Diad Pikakasi
7 Balanglan manpipikasi itayon bukor odino diad publiko, say importantin Makasulatan a prinsipyo a nodnonoten et say pangipatnag na mapaabeban awawey diad saray pikakasi tayo. (2 Awaran 7:13, 14) Impatnag nen Arin Solomon so inkamapaabeba ed mapublikon pikakasi to diad dedikasyon na templo nen Jehova diad Jerusalem. Kapkapangisumpal ed saman nen Solomon so sakey ed saray sankarakpan a bilding a nipaalagey diad dalin ed kapiganman. Ingen, sikato so mapaabeban nampikasi: “Labay kasi na Dios dia ed sankatuaan so manayam ed tapew na dalin? Nia, say tawen tan say tawen na katawenan agda ka nalugan; agni nagkalalo so saya ya abung ya impaalagey ko!”—1 Arari 8:27.
8 Singa si Solomon, kaukolan a mapaabeba itayo sano irerepresenta tayoy arum diad mapublikon pikakasi. Anggaman kaukolan tayon paliisan so pansantosantoan, nipatnag tayo so inkamapaabeba ed tono na bosis tayo. Aliwan mapangta odino madrama iray mapaabeban pikakasi. Ipaarap na satan so atension, aliwan ed toon manpipikasi, noagta diad say Sakey a pangipapasabian. (Mateo 6:5) Nipanengneng met so inkamapaabeba ed walan lugan na pikakasi tayo. No mapaabeba itayon manpikasi, ag-itayo ompatnag a singano pagagawa tayo’d Dios so pigaran bengatla unong ed paraan tayo. Imbes, mikasi itayo ed si Jehova ya onkiwas ed paraan a mitunosan ed sagradon linawa to. Inyalimbawa na salmista so dugan awawey sanen sikato so akikasi: “Mangilaban ka natan, pikasi mi ed sika, O Jehova: O Jehova, pikasi mi ed sika, a mangipawit ka natan na kabunaan.”—Salmo 118:25; Lucas 18:9-14.
Saray Espiritual a Kayamanan
mwbr22.07—it-1 1060 ¶4
Tawen
Imbaga nen Solomon, say angipaalagey na templo ed Jerusalem, ya “say tawen, on, say tawen na saray katawenan” et agto nakarga so Dios. (1Ar 8:27) Bilang Amalsa na saray katawenan, mas atagey ni so kawalaan nen Jehova nen saratan ya amin. Tan “anggan ngaran to labat et agla naabot ed kaatagey. Say katagyan to et palumbasan toy dalin tan tawen.” (Sal 148:13) Sarasarag ya sukaten nen Jehova so pisikal ya katawenan ya singa panusukat na sakey a too ed sakey a bengatla panamegley na sankarangan na lima to. (Isa 40:12) Aglabay ya ibaga nen Solomon ya anggapoy espisipikon pasen ya kawalaan na Dios. Agto met labay ya ibaga ya say Dios et literal ya walad anggan iner odino anggan anto. Napatnagan tayo itan ed samay imbaga nen Solomon ya si Jehova et ‘ondedengel diad tawen, say pasen ya ayaman to,’ say tawen ya kawalaan na saray espiritu.—1Ar 8:30, 39.
Magmaliw ya Epektibo ed Ministeryo
Kaukolan a Manpikasi Iray Kristianon Ministro
1 Agtayo sarag a sumpalen so ministeryo diad dilin pakayari tayo. Iikdan itayo nen Jehova na biskeg pian nagawaan iyan kimey. (Fil. 4:13) Uusaren to iray anghel pian tulongan itayon naromog iray mauyamon totoo. (Apo. 14:6, 7) Si Jehova so mamapabaleg ed saray bini na katuaan ya intanem tan sinalog tayo. (1 Cor. 3:6, 9) Talagan importante sirin a manmatalek tayo ran Kristianon ministro ed Ama tayo’d tawen panamegley na pikakasi!
2 Ipikasi so Inkasikatayo: Nepeg tayon manpikasi kada no manpulong itayo. (Efe. 6:18) Antoray ipikasi tayo? Nayari tayon ipikasi a magmaliw itayon makpel tan positibo ed totoon nakatongtong tayo’d teritorya. (Gawa 4:29) Kerewen tayo’d si Jehova ya iwanwan to itayo ed maptek-impanpuson totoo a naiyaralan tayoy Biblia. No walay tepet na unabung, manpikasin makalna tan antikey, a patulongan itayo’d si Jehova pian dugay iyebat tayo. (Neh. 2:4) Onkerew itayo met na karunongan pian lawas a manuna’d bilay tayo so ministeryo. (Sant. 1:5) Ontan met, naliketan si Jehova no misalamat itayo lapud pribilehyo tayo bilang ministro to.—Col. 3:15.
3 Ipikasi so Arum: Nepeg tayo met ya ‘ipikasi so balang sakey,’ a no matukoy et bitlaen tayoy kangaranan na saray kapara tayon ministro. (Sant. 5:16; Gawa 12:5) Kasin limitado lay nagagawaan mon panagpulong lapud onkakapuy lay laman mo? Sarag mon ipikasi iramay maksil ni laman da. Agmo iisipen a melag labat so naitulong na pikakasim parad sikara! Maabig met no ipikasi tayon agkomon sumpaen na saramay walad autoridad so pampupulong tayo pian saray agagi tayo et “makapantultuloy [a] manbilay a maligen tan mareen.”—1 Tim. 2:1, 2.
4 Say panangiyabawag ed maong a balita diad interon dalin et talagan baleg a kimey. No ‘mantultuloy itayon manpikasi,’ nasumpal tayo so kimey diad tulong nen Jehova.—Roma 12:12.
[Paimano ed leksab]
a KABALIKSAN NA SALITA: Say katulongan a managkonseho et sakey ya elder ya akaasain ya mangiter na pribadon konseho odino suggestion ed saray elder tan ministeryal a lingkor diad saray parte da ed aral, no nakaukolan.