Kasin Tudtua so Dios ed Sika?

SANO makasagmak kay makapagonigon iran problema, kasin mabulos kan onasingger ed Dios diad pikakasi? No ontan, kasin naliliknam a sikay mitotongtong ed tudtuan persona?

Diad panutukoy ed mangatatawen ya Ama to, inkuan nen Jesu-Kristo: “Say angibaki dia ed siak sikato so tua.” (Juan 7:28) On, tudtua si Jehova a Dios, tan say panpikasi ed sikato et singa iyaasingger ed maapit a tuloy a kaaro parad tulong odino simbawa. Siempre, pian dengelen na Dios, nepeg a saray pikakasi tayo so makakapet ed Makasulatan iran nakakaukolan parad naabobonan a pikakasi. Singa bilang, nepeg a sipapaabeba itayon onasingger ed ‘Dumerengel na pikakasi’ panamegley na Anak to, si Jesu-Kristo.​—Salmo 65:2; 138:6; Juan 14:6.

Nayarin liknaen na arum a lapud agnanengneng so Dios, sikatoy aliwan persona. Parad sikara, say Dios et ompatnag ya aliwan persona. Anggan saray pigaran Kristiano, ya akaamta la nipaakar ed makapakelkelaw ya atributos na Dios, so no maminsan et mairap dan natebek no panoy inkatudtua to. Naeksperiensiam ta lay onia? No ontan, antoy makatulong pian magmaliw a tudtua ed sika si Jehova a Dios?

Aralen so Kasulatan

Kasin maparanay mon aaralen so Masanton Kasulatan? No lalon mabetbet tan papasyaen moy panaaral ed Biblia, lalon ontutudtua ed sika si Jehova a Dios. Diad ontan et napabiskeg so pananisiam, bilang resulta et ontulong ed sikan ‘nanengneng so Sakey ya agnanengneng.’ (Hebreos 11:6, 27) Diad biek a dapag, say matalag odino sagpaminsan a panagaral ed Biblia so agmaseguron mamawalay makanan epekto ed pananisiam.

Diad pangiyilustra: Isipen pan binilin ka na doktor mo a mangipuyok na ointment a mamidua ed sanagew pian nabawasay tuloytuloy a gatel. Kasin naandipat so gatel mo no maminsan labat odino mamidua ed sakey bulan a puyokan mo na ointment? Agmaseguro itan. Mipadpara, iikdan itayo na salmista na “risita” parad espiritual a bunigas. Basaen so Salitay Dios ‘ed makalnan paraan ed agew tan labi.’ (Salmo 1:1, 2) Pian panggayagaan so manarum a gungguna, kaukolan tayon tumboken so “risita”​—ya inagew-agew a panangonsidera ed Salitay Dios diad tulong na Makristiano iran palapagan.​—Josue 1:8.

Labay yo ta a gawaen a lalon makapabiskeg na pananisia so panagaral yo? Nia so sakey a suhestion: Kayari pamasa ed sakey a kapitulo ed New World Translation of the Holy Scriptures odino sananey a Biblia a walaan na cross-reference, mamili na makapainteres a bersikulo tan nengnengen iray nisitan reperensyan teksto. Saya so mamalaknab ed panagaral mo, tan andi-duaruwan nasagyat ka tekep na akindalem a pantutunosan ed Biblia. Diad ontan, saya so lalon mamatudtua ed sika ed Autor to, si Jehova a Dios.

Say pangusar ed cross-reference so mamakabisado met ed sika ed saray propesiya na Biblia tan kasumpalan da. Anganko et kabisadom iray manunan propesiya na Biblia, a singa saramay misiglaotan ed impaneral na saray taga-Babilonia ed Jerusalem. Ingen, lugan na Biblia so nankokonektaan iran propesiya tan kasumpalan da. Arum ed saraya so agkabkabat.

Alimbawa, basaen so propesiya nipaakar ed bayar parad panangipaalagey lamet ed Jerico insan konsideraen so kasumpalan to. Onia so ibabaga na Josue 6:26: “Si Josue imbilin to ed sikara ed panamegley na samba nen saman a panaon, ya inkuanto: ‘Naayew komon ed arap nen Jehova so too ya ontalindeg tan ipaalagey to so sayan syudad na Jerico. Kabalangan na panguloan ya anak to sano iyan to so pangipaletnegan to, tan kabalangan na kayogtanan ya anak to sano ipasen to so saray wangalan to.’” Asabi so kasumpalan ngalngalin 500 taon ed saginonor, ta nabasa tayo diad 1 Arari 16:34: “Dia ed saray agew [nen Arin Ahab] si Hiel a Bet-clita impaalagey to so Jerico. Inggaton to so pangipaletnegan ed sikato ed inkabalang nen Abiram a panguloan ya anak to a laki, tan impasen to so saray wangalan to ed inkabalang na kayogtanan ya anak to a laki a si Segub, unong na salita nen Jehova, a sinalita to ed panamegley nen Josue ya anak nen Nun.”a Say tudtua labat a Dios so makapangipuyan ed ontan iran propesiya tan maneguro ed saray kasumpalan da.

Legan a babasaen so Biblia, nayarin magmaliw kan maupapet nipaakar ed sakey a punto. Singa bilang, nayarin panumamengan mo no pigaran taon so linmabas a nanbaetan na sakey a propesiya tan say kasumpalan to. Imbes a basta labat tepetay sakey, akin ya agpanpelengan ya anapen a mismo itan? Diad pangusar na saray tsart tan katulongan ed panagaral ed Biblia, sukimaten iray ebat a sikukuli a singam panggugunaetan a natalosan so mapay kayamanan. (Uliran 2:4, 5) Say pananap na saray ebat so nawalaan na baleg ya epekto ed pananisiam tan lalon mamatudtua ed si Jehova a Dios ed sika.

Manpikasin Maparanay tan Masimoon

Ag-ibabaliwala so kaimportantian na pikakasi tan pananisia. Onia so direktan kerew na saray babangatan nen Jesus: “Aruman mo so pananisia mi.” (Lucas 17:5) No ompatnag ya aliwan tudtua ed sika si Jehova, akin ya ag-ipikasi ed sikato so pankaukolan mon nagkalalon pananisia? Makompiyansan kerewen ed mangatatawen ya Amam so tulong to diad panggawa to’d inkasikaton tudtua ed sika.

No walay probleman mangogonigon ed sika, mangipanaon na malaglaem pian ibalikas moy inkasika ed mangatatawen a Kaarom diad impapuson paraan. Sanen arapen la nen Jesus so ipapatey, sikatoy pirmin nampikasi. Anggaman kinondena toy relihyoson agamil nipaakar ed andurukey iran pikakasi a ginetman publikon panangiparayag, sikatoy pribadon sanlabin nanpikasi sakbay ton pilien so 12 apostoles to. (Marcos 12:38-40; Lucas 6:12-16) Makaaral itayo met manlapud si Ana, a nagmaliw ya ina nen propetan Samuel. Diad panpipirawat parad ilalak a laki, “intuloy to so mikakasi ed arap nen Jehova.”​—1 Samuel 1:12.

Antoy manunan leksion ed amin na saya? No pilalek moy makagamor na saray ebat ed saray pikakasim, nepeg kan manpikasin masimoon, maseseg, andi-tunda​—tan, siempre, mitunosan ed linawa na Dios. (Lucas 22:44; Roma 12:12; 1 Tesalonica 5:17; 1 Juan 5:13-15) Say panggawa ed saya so ontulong ed pamatudtua ed sika so Dios.

Imatonan so Palsa

Niparungtal so personalidad na sakey a pintor diad saray painting to. Mipadpara, say “agnanengneng iran kualidad” nen Jehova, say Managdesinyo tan Manamalsa ed uniberso, so malinlinew a nanengneng ed palsa. (Roma 1:20, NW) Sano iimanoen tayon maong so kimey nen Jehova, nagkalalon natalosan tayoy personalidad to, tan diad ontan sikatoy lalon ontudtua ed sikatayo.

No imatonan mon maong iray bengatlan pinalsa na Dios, nasagyat kan tuloy ed inkatudtua na saray kualidad to. Alimbawa, say impormasyon nipaakar ed panagbaroy iran abilidad na saray billit so mamaaralem ed apresasyon mo ed kakabatan nen Jehova. Diad pambasa nipaakar ed uniberso, naaralan mo a say Milky Way, a ngalngalin 100,000 light-years a beltangen, so sakey lambengat ed binilyon a galaksi ed intiron liwang. Agta mangipaslep itan ed sika ed inkatudtua na kakabatan na Manamalsa?

Segurado, tudtua so kakabatan nen Jehova! Balet antoy kabaliksan to ed sika? Bueno, maseguron sikatoy agnawetwet ed saray probleman ipikasi ed sikato na siopaman ed sikatayo. On, anggan dagdaiset ni pikakabat ed palsa so mamatudtua ed sika si Jehova.

Manakar a Kaulop nen Jehova

Kasin naeksperiensiam a personal so inkatudtua nen Jehova? On, no singa ka ed matoor a patriarkan si Noe. Sikatoy lawas tinmulok ed si Jehova, kanian nibagan: “Si Noe akiulop-ulop ed Dios.” (Genesis 6:9) Nambilay si Noe a singa walad diking ton mismo si Jehova. Nayarin ontan met katudtua ed sika so Dios.

No manakar kan kaulop na Dios, panmatalkan moray Makasulatan a sipan tan onkiwas a mitunosan ed saratan. Singa bilang, sisiaen moray salita nen Jesus: “Anapen yo nin unona so panarian, tan say inkatunong [na Dios]; et amin iraya a bengatla [materyal iran nakakaukolan] niarum ira ed sikayo.” (Mateo 6:25-33) Tua, nayarin aglawas mangitarya si Jehova ed no antoy nakaukolan mo ed paraan ya iilaloan mo. Ingen, sano manpikasi ka insan naeksperiensia so tulong na Dios, sikatoy magmaliw a tudtua ed sika a singa sakey a walad diking mo.

Say ontan a maapit a relasyon ed si Jehova so nababayuboan legan a mantutultuloy so sakey ed panakar a kaulop na Dios. Nonoten si Manuela, sakey a Tasin mansasalitay Español, a nansungdo ed dakel a subsubok. Inkuanto: “Kapiganman a naproproblema ak odino walad pankaukolan, iyaaplikak so prinsipyon naromog diad Uliran 18:10. Onasingger ak ed si Jehova parad tulong. Sikatoy lawas a ‘mabiskeg ya ilang’ parad siak.” Nibaga iya nen Manuela kayari 36 a taon ya impanmatalek ed si Jehova tan pakakaeksperiensia na suporta to.

Kasin onggagapo ka ni labat a mankokompiyansa ed si Jehova? Agnadidismaya no say relasyon mo ed sikato et aliwa nin singa ed labay mon nagawa. Manbilay kada agew bilang sakey a manaakar a kaulop na Dios. Legan mon ipapaalagey so padron na bilay na inkamatoor, napanggayagaan moy maapit a relasyon ed si Jehova.​—Salmo 25:14; Uliran 3:26, 32.

Say sakey nin dalan pian manakar a kaulop na Dios et say pagmaliw ya okupado ed serbisyo to. Sano mibibiang ka ed panangipulong na Panarian, sakey kan kakimeyan nen Jehova. (1 Corinto 3:9) Say pakaamta ed saya so ontulong pian ontudtua ed sika so Dios.

Ipapaseseg na salmista: “Ipiam ed Jehova so dalan mo; manmatalek ka met ed sikato, et sikato igawa to.” (Salmo 37:5) Agbalot onsasaew ya ipia ed Dios so antokaman iran pakabelatan odino kapapagaan mo. Lawas manilalo ed sikato parad tulong tan panangigiya. No sipipikasi kan onsaral ed si Jehova a Dios tan lawas manmatalek ed sikato a masimoon, naliknam so inkaligen lapud antam a sikatoy ag-onsaew ya onkiwas ed biang mo. Kasin makompiyansa ka sano iyaasingger mo ed si Jehova iray personal a kapagaan mo? Nepeg ya ontan ka​—no tudtua ed sika so Dios.

[Saray paimano ed leksab]

[Litrato ed pahina 21]

Gawaen a makapabiskeg na pananisia iray panaon na panagaral mo

[Litrato ed pahina 22]

Ipanaon so maparanay, maseseg a pikakasi

[Saray litrato ed pahina 23]

Obserbaan no panon a saray kualidad na Dios et nipapatnag ed palsa

[Credit Lines]

Hummingbird: U.S. Fish and Wildlife Service, Washington D.C./Dean Biggins; bibitewen: Photo:Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands