No Panon Mon Natalosan so Biblia

2. Manbasan Lukas so Nonot

Asalim lay akadngel na negatibo nipaakar ed sakey a toon agmo ni akabat? Sanen akabat mo itan a too, naimpluensyaan kasi pakanengneng mo’d abilidad tan maabig iran kualidad to lapud saramay nadngel mo? Nayari met a nagawa itan no nipaakar ed Biblia.

IMPASAKBAY nen apostol Pablo no antoy nagawa no aliwan lukas so nonot tayo ed saray nababasa tayo’d Biblia. Oniay insulat nen Pablo nipaakar ed arum a kapanaonan ton Judio: “Ikdan ko ra na pamintuaan a wala so seseg da ed Dios, bangbalet aliwa ya unong ed kakabatan.”​—Roma 10:2.

Arum ed saraman a Judio nen inmunan-siglo et agmalabay a mangawat ed katuaan a si Jesus so Mesias anggano malinlinew la itan ed Hebreon Kasulatan. Amin a walad Kasulatan a deskripsion tan propesiya nipaakar ed Mesias et asumpal ed si Jesus a Nazareno. Balet, say maslak a kabaleyan to et naunaan lay negatibon panmoria kanian agda atalosan so Salitay Dios.

Antoy naaralan tayo’d satan? Importante a no basaen so Biblia et lukas so nonot tayo. No say manbabasa et naunaan lay negatibon panmoria, nayarin mairap to lan talosan iray katuaan ed Biblia.

Singa bilang, sakey a manbabangat nipaakar ed relihyon diad North Carolina, U.S.A., so aneskribe ed Biblia bilang “libro na too, a mankargay opinyon na too, a maslak et mankokontraan, tan anggapoy naalan maabig a giya no panon so nepeg a pambilay.” No ontan so panmoria na sakey ed Biblia, agta walay tendensian ibaliwala to iray giya tan prinsipyon agto labay?

Diad tua balet, papasesegen itayo na Biblia a manseet a manaral ed satan. Nipaakar ed saray taga Berea nen panaon nen Pablo, oniay ibabaga na Biblia: “Inako ra so salita ed sipaparaan a nonot; inagew-agew ya inusisa ra so sulat, no peteg so sarayan bengatla.” (Gawa 17:11) Singa sarayan taga Berea, kaukolan mon ekalen iray negatibon panmoriam, no wala bilang, pian agnaimpluensyaay pakatalos mo. Basam so Salita na Dios tekep na lukas a nonot, tan pampirawatan mo komon ya amtaen so balibalin mensahe na Dios.