Maong a Balita Parad Amin

Say imbilay lamet nen Jesus so tinmulong ed saray disipulo to ya manpursigi tan mankuli ed panagpulong. Lalo lad si apostol Pablo. Sikatoy linmad nanduruman lugar ed Asia Minor tan Mediteraneo, pian man-organisa na saray kongregasyon tan pabiskegen iray Kristiano. Kaukolan da itan lapud wala ray mauges ya impluensya tan dakel so kontrad sikara. Balet siansian dinmakel iray nagmaliw a Kristiano.

Apriso si Pablo. Balet anggano walad prisoan, sinulatan to ray Kristiano ed nanduruman kongregasyon pian pabiskegen tan bilinen ira. Impasakbay to so mas baleg ya peligro ed kongregasyon—say apostasya. Diad panangigiya na masanton espiritu na Dios, anengneng ton wala ray makaloob ed kongregasyon ya “masesebeg a lobo” ya mangibangat na “pikewet iran bengatla” pian “tangguyoren iray disipulo ya ontumbok ed sikara.”—Gawa 20:29, 30.

Diad bandad sampot na inmunan siglo, ginmapoy apostasya. Diad satan met a panaon, impanengneng nen Jesus ed si apostol Juan iray simbolikon deskripsion na saray nagawad arapen tan insulat iratan nen Juan ed libron Apocalipsis. Insulat to ya anggapoy nagawaan na saray onkokontra odino palson managbangat, tan talagan nagawa so orihinal ya gagala na Dios parad dalin tan totoo. Narengel na amin ya totoo ed “kada nasyon tan tribu tan lenguahe tan rasa” so maong a balita na Panarian na Dios. (Apocalipsis 14:6) Magmaliw lamet ya Paraiso so dalin, tan manbilay ditan so siopaman ya malabay a manggaway linawa na Dios!

Kasin “maong a balita” itan ed sika? No ontan sirin, aral mon maong so mensahe na Dios parad totoo ya nabasad Biblia pian naamtaan mo no antoy niiter ton pankaabigan mo, natan tan ed arapen.

Nabasam ya mismo so Biblia online diad www.jw.org/pag. Diad satan ya Web site, nabasam met so brosyur ya Say Biblia​—Anto So Mensahe To? tan Maong a Balita ya Nanlapud Dios! ontan met ed libron Anto so Peteg ya Ibabangat na Biblia? tan arum ni ran publikasyon. Nabasam ed saratan no akin ya napanmatalkan so Biblia tan no panon mon niyaplika iray praktikal a bilin to diad pamilyam tan ed sarilim. Tan sarag mo met so mantepet ed anggan siopan Tasi nen Jehova parad kaaruman ya impormasyon.

​—Nabasa ed Gawa, Efeso, Filipos, Colosas, Filemon, 1 Juan, Apocalipsis.