“No Sarag Nen Kingsley, Sarag Ko Met!”

KATAPIK ed takeb to, inggapo nen Kingsley so nambasay Biblia​—say unonan asainmin tod Teokratikon Eskuelaan Parad Ministeryo. Malinlinew so impanbasa to, anggapon balot so lingo to. Balet magano! Akin et ag-onnenengneng ed Biblia to?

Si Kingsley ya tagad Sri Lanka et bulag. Makapuy met so layag to tan aka-wheelchair la. Panon ton naamtaay katuaan tan nagmaliw a kualipikado ed Teokratikon Eskuelaan Parad Ministeryo? Iyistoryak ed sikayo.

Nen inmunan akatongtong koy Kingsley, manbilib ak ed sikato ta labalabay ton naamtaan so katuaan. Aminpiga lan inyaralan na saray Tasi, tan say libro ton Pikakabat a Mangitonton ed Andi-Anggaan a Bilay ed Braille et nagagaygay la.a Nen tinepetan ko no labay ton ituloy so panaral na Biblia, imbaga ton labay to. Balet walay duaran problema.

Unona, dakel so kaiba nen Kingsley ed nursing home ya panaayaman to. Lapud maingal ditan tan makapuy so layag to, kaukolan koy mansalitay maksil. Diad tua et sankarengel na amin ya wadman so panaaral mi kada simba!

Komadua, daiset labat so natandaan ya impormasyon nen Kingsley kada panaral mi. Kanian pian mas epektiboy panaral mi, manpaparaan ya maong si Kingsley. Antis min manaral, maminpigapiga to lan basaen so aralen mi, anapen to la ray teksto diad Biblia ton Braille, tan nonoten to met lay ebat ed saray tepet. Epektibo iraman ya ginawa to. No manaaral kami et akalespak, tan diad liket to et tatapiken toy datal legan ton maksil ya ipapaliwawa iray nanaaralan to. Kanian ag-abayag, mamidua kami lan manaral ed sakey simba, tan kada panaral mi et nasabi mi duay oras!

IYATENDID ARAL TAN PANKOMENTO

Labalabay nen Kingsley so miaral ed Kingdom Hall, balet ag-itan mainomay parad sikato. Kaukolan ya walay mangasistid sikato diad wheelchair, kotse, tan ed Kingdom Hall. Balet dakel so agagin mansusublayan ya ontulong. Parad sikara et pribilehyo itan. Diad aral, itutob nen Kingsley so layag tod espiker, madengedengel, tan mankokomento ni ingen!

Nen medyo abayag ko lan iyaaralan, nandesisyon si Kingsley ya manpa-enroll ed Teokratikon Eskuelaan Parad Ministeryo. Duay simba antis na unonan asainmin tod pambasa na Biblia, tinepetan ko no kasin manprapraktis. “On, manga 30 beses ak lan nampraktis,” so kuan to. Kinomendaan ko tan imbagak ya labay kon dengelen so pambasa to. Imbukay toy Biblia to, intapew to ray gamet tod Braille text, insan la nambasa. Balet naimanok ya ag-ombabansag iray gamet tod babasaen to. Impatlep to manayay interon babasaen ed Biblia!

Akaakis ak, agak makapanisia! Tinepetan koy Kingsley no panon ton nipatlep iman anta 30 beses to labat ya impraktis. Imbaga to: “Andi, manga 30 beses ak ya manprapraktis kada agew.” Diad masulok ya sakey bulan, onlespak si Kingsley ed datal, tan ulit-uliten to iman a basaen ya anggad nipatlep to.

Kayarin binasa nen Kingsley so asainmin to, maksil so tipak na agagi, tan dakel so akaakis lapud determinasyon na sayan balon estudyante. Wala ingey sister ya lapud nerbiyos to et agla mangaawat na asainmin, balet nampa-enroll lamet. Akin? Imbaga to: “No sarag nen Kingsley, sarag ko met!”

Nen Setyembre 6, 2008, kayari taloy taon ya impanaral nen Kingsley na Biblia, indedika toy bilay tod si Jehova panamegley na bautismo. Sikatoy matoor ya Tasi anggad impatey to nen Mayo 13, 2014. Matalek si Kingsley ya diad Paraiso et nituloy toy matoor ya panaglingkor to lapud mabiskeg tan perpekto lay laman to. (Isa. 35:5, 6)​—Unong ed salaysay nen Paul McManus.