Paaligwasen Iray Abilidad Tayod Ministeryo—Pampulong ed Pasen na Negosyo

No Akin ya Importante: Lapud dakel ya totoo natan so walad trabahon lanang, maabig no laen irad mismon pantratrabahoan da pian napulongan ira. Makapaliket tan mabunga so pampulong ed pasen na negosyo ta nasabin nasabi tayo ra tan mas marespeto irad saray ipapasen dan kustomer. Pian magmaliw ya epektibo, importantin magmaliw ya mataktika tan makatebek iray manangipalapag tan masimpit so panangawes tan panag-ayos da. (2 Cor. 6:3) Kanian nepeg ya i-monitor na manangasikaso na serbisyo no panon kabetbet ya napupulongan iray pasen na negosyo tan no siopa ray akaasain.

No Panon Iyan Nagawaan:

Mangiparaan na antikey ya presentasyon. No andukey so pampulong tayo, ompan agla ra mitongtong diad onsublay.
Manpulong ed oras ya aliwan masyadon busy so pasen na negosyo, singa no kakkapanlukas da.
Tepeten ed saray mantratrabaho no siopay nepeg a katongtongen. Magmaliw ya makaaro. Nayarin ibagan: “Bibisitaen mi ray totood pantratrabahoan da ta agmi ra nasasabid abung da.” Mangipresenta na antikey tan mangiyopresi na tract, magasin, o arum a literatura. Pian agtayo ompaway ya singa manlalako, mas maabig no agtayo bibitlaen so uksoyan na panagdonasyon, likud labat no tepeten da no panlalapuay pundo na kimey tayo.
No makaaroy katongtong tayo, tepetan no nayarin nakatongtong tayo met iray arum nin mantratrabaho diman. Diad arum a pasen na negosyo, mas maabig no tepeten tayo no nayari mangitilak na publikasyon diad panagpainawaan da legay break time.
Magmaliw ya makatebek, tan onadapta. Singa bilang, no walay katongtong dan kustomer odino busy ra, manalagar anggad nayari la ran katongtongen.

Gawaen Iya Legan na Sayan Bulan:

Diad ontumbok ya Panagdayew na Pamilya yo, mangipraktis na antikey a presentasyon ya balibalin usaren no manpulong kayod pasen na negosyo.