3 | Makatulong Iray Alimbawa ed Biblia

NABASA ED BIBLIA YA . . . Asali la na matoor ya lalaki tan bibii nensaman iray “liknaan a singa sikatayo.”—SANTIAGO 5:17.

No Antoy Labay ton Ibaga

Akasulat ed Biblia iray tuan istorya na lalaki tan bibii nensaman ya akalikna na nanduruman klase na emosyon. No basaen tayo iratan, ompan walay naalmo tayo ya pareho so alikna to ed nalilikna tayo natan.

No Panon Iyan Makatulong

Natural labat ya labay tayon natalosan itayo na arum. Pero lalo la no mankakaproblema tayo ed isip. No makakabasa tayo na saray tuan istorya ed Biblia, ompan maka-relate tayo ed saray inisip tan alikna da. Kanian no na-realize tayo ya aliwan sikatayo labat manaya so makakalikna na graben ermen tan agnakontrol ya pannerbiyos, makainawa tayo.

Diad Biblia, akasulat iray imbaga na totoon ngalngali la onsuko tan desperado. Asali yo met lan imbaga so, ‘agko la sarag, suko ak la’ ya singa si Moises, Elias, tan David?—Numeros 11:14; 1 Arari 19:4; Salmo 55:4.
Diad Biblia, nabasa tayo so tungkol ed biin si Hana ya “agaylay ermen” to ta anggapoy anak to tan iinsultoen na sakey nin asawa na mister to.—1 Samuel 1:6, 10.
Diad Biblia, nabasa tayo so tungkol ed sakey ya lakin si Job tan ompan maka-relate tayo ed sikato. Anggano mabibiskeg so pananisia to, araldalem so sugat na puso to tan aminsan et imbaga to: “Kabusol koy bilay ko; agko la labay so manbilay.”—Job 7:16.

No aralen tayo no panon ya asarag na sarayan totoo so negatibon panag-isip, ompan nasarag tayo met iray ambelbelat ya pakakairapan tayo.

No Panon ya Natutulongan na Biblia si Kevin

No Antoy Epekto ed Siak na Bipolar Disorder

“A-diagnose ya walay bipolar disorder ko nen ngalngali ak la man-50. Wala ray panaon ya singa sarag koy amin ya nagagawad bilay ko. No arum balet, singa anggapo lay ganas kon manbilay.

No Panon Ak ya Natutulongan na Biblia

“Nen abasak ed Biblia so tungkol ed si apostol Pedro, atalosan ko iramay dinadalan to. Akagawa na saray lingo kanian pakalikna to et anggapo lay kana to. Pero, imbes ya sankanonot to iratan tan manmokmok labat, akiulop ed saray kakaaro ton manmamalasakit ed sikato. No onaataki so bipolar ko tan aliwliway agew ko, feeling ko makakkasalanan ak ya too tan anggapoy kanak. Pero singa si Pedro, naaralan kon ag-iyarawi sarilik ed saray kakaarok ya mamapakasil na liknaan ko pian agak onsuko tan tuloy labat so bilay.

“Say sakey nin akatulong na baleg et siak et amay istorya nen Arin David. Abasak ed Biblia ya grabe met so impaka-depress to lapud saray ginawa to, tan pagbabawian to ray kasalanan to. Maka-relate ak ed sikato ta no maminsan, wala ray gagawaen tan ibabagak ya pagbabawian ko. Agustoan ko iramay imbaga to ya walad Salmo 51. Diad bersikulo 3, kuan nen David: ‘Amtak iray impakasumlang ko, tan say kasalanan ko et sankanonot ko.’ (Paimanod leksab) Ontan ya ontan so naliliknak no agak makaimwas ed graben ermen ko, tan abebbebay pakanengneng kod sarilik. Akatulong met ed siak may imbaga to diad bersikulo 10: ‘Gawam pan malinis so pusok, O Dios, tan ikdan mo ak na sakey a balo tan mapekder ya espiritu.’ Ontan met so ipipikasik ed Dios, ya pabiskegen to ak komon pian nauman koy pangituturing kod sarilik. Insan say agusgustoan kod amin et amay diad bersikulo 17, say kuan to: ‘Agmo busolen, O Dios, so sakey a puson asugatan tan maer-ermen.’ (Paimanod leksab) Impaseguro ed siak na satan ya bersikulo ya inaro ak na Dios.

“No sankanonot ko iratan ya alimbawa ed Biblia tan saray bendisyon na Dios ed siak, agak naeekalay ilalo. Magmamaliw ya mabilabilay ed nonot ko iray promisa na Biblia tan makakatulong iratan pian agak onsuko.”