Agnapatunda na too so guerra
No Panon ya Manampot so Guerra tan Panlalaban
Ibabaga na Biblia ya say Dios, aliwan say too, so ‘makapatunda ed saray guerra diad interon dalin.’—Salmo 46:9.
EKALEN NA DIOS IRAY GOBIERNO NA TOO
Deralen na Dios iray gobierno na too no nasabi la may panaon ya tatawagen na Biblia ya guerra ya Armagedon.a (Apocalipsis 16:16) Diad satan, natipon iray “arari na interon dalin” diad “guerra a nagawa ed baleg ya agew na Dios a Makapanyarin-amin.” (Apocalipsis 16:14) Say Armagedon et guerra na Dios ya mamatunda ed amin ya guerra.
Salatan na Panarian o gobierno na Dios so amin ya gobierno na too. Sayan Panarian et manuley manlapud tawen tan agbalot naderal. (Daniel 2:44) Pinili na Dios so Anak to ya si Jesu-Kristo ya magmaliw ya Ari na sayan gobierno. (Isaias 9:6, 7; Mateo 28:18) Ayan gobierno may Panarianb ya imbangat nen Jesus ya ipikasi na saray papatumbok to. (Mateo 6:9, 10) On, nasabi panaon, saksakey la so gobierno ed interon mundo, tan say Manuley et si Jesus.
Duma si Jesus ed saray toon manuley ta agto usaren so autoridad to parad sarilin pankaabigan to. Patas so panagtrato nen Jesus kanian seguradon anggapoy napaulyanan o nibaliwala lapud lahi, bansa, o kultura. (Isaias 11:3, 4) Tan agla kaukolan na totoo ya ilaban so karapatan da. Akin ey? On ta asikasoen nen Jesus so pankaukolan na kada too. “Iliktar to so mairap-bilay ya onkekerew na tulong, tan samay pakaskasi tan siopaman ya anggapoy ontutulong. . . . Iliktar to ra ed panagpairap tan karuksaan.”—Salmo 72:12-14.
Ekalen na Panarian na Dios iray armas. (Miqueas 4:3) Deralen to met iray mauges ya totoo ya agda labay ya tundaan so milaban tan isusugsog day panlalaban. (Salmo 37:9, 10) Kanian ligtas la so amin, balanglan lalaki, bibii, tan ugugaw, inermay kulaan da.—Ezequiel 34:28.
Diad uley na gobierno na Dios, balibali lay bilay. Anggapo la ray problema ya sengegan na panlalaban, singa say irap na bilay, eras, tan problemad napanayaman. Dakdakel lay masustansian naakan parad amin tan wala lay komportablen panayaman na amin.—Salmo 72:16; Isaias 65:21-23.
Diad uley na Panarian na Dios, naekal la ray aliwliwan epekto na guerra. Onabig la ray pisikal, mental, tan emosyonal ya sakit ya inter na guerra. Anggan saray inatey et bilayen lamet diad dalin. (Isaias 25:8; 26:19; 35:5, 6) Kanian maniiba lamet iray pamilya. Tan agda la sankanonot iray aliwliwan agawa lapud guerra ta “saray datin bengatla et linmabas la.”—Apocalipsis 21:4.
EKALEN NA DIOS SO KASALANAN
No manuley lay Panarian na Dios diad dalin, dayewen la na amin ya totoo so saksakey ya tuan Dios, si Jehovac, “say Dios na aro tan kareenan.” (2 Corinto 13:11) Naaralan na totoo so manbilay ya mareen tan mankakasakey. (Isaias 2:3, 4; 11:9) Saramay ontulok ed Dios et agla magmaliw ya makasalanan, imbes magmaliw la ran perpekto.—Roma 8:20, 21.
DERALEN NA DIOS SI SATANAS TAN SARAY DEMONYO
Deralen na Panarian na Dios iray mangisusugsog na guerra, si Satanas tan saray demonyo to. (Apocalipsis 20:1-3, 10) No anggapo lay impluensya ra, “inerman a pasen et walay kareenan.”—Salmo 72:7.
Makaseguro ka ya tooren na Dios so sipan ton panampotey guerra tan panlalaban. Sarasarag tan labalabay ton ekalen so guerra.
Marundunong so Dios tan walay pakapanyari ton panampoten so guerra tan panlalaban. (Job 9:4) Anggapoy imposible ed sikato.—Job 42:2.
Aglabay na Dios ya manirap iray totoo. (Isaias 63:9) Tan “kabusol to so siopaman a mangaarod inkaruksa.”—Salmo 11:5.
Lanang ya totooren na Dios so ibabaga to; agto nayarian so mantila.—Isaias 55:10, 11; Tito 1:2.
Diad arapen, iter na Dios so tuan kareenan ya agbalot mangangga.
Ekalen na Dios so guerra
a Basaen so artikulon “Anto so Guerra ya Armagedon?” diad jw.org/pag.
b Bantayan so video ya Anto so Panarian na Dios? diad jw.org/pag.
c Jehova so ngaran na Dios.—Salmo 83:18.