Sarag Ko ni Kasi Manmaneho?
IMADYIN yo pa so sakey ya maedad la ya abaybayag lan walay sarili ton luganan tan sikaton mismoy manmamaneho. Labalabay toy manmaneho ta makaonla anggan iner. Pero lapud ontatatken la, mapagpaga iray kapamilya tan kakaaro to ta ompan walay nagawad sikato diad dalan. Pero no sikatoy natepetan, seguro ibaga to ya sarasarag to ni manmaneho.
Kasin ontan so situasyon yo? Antoy nepeg yon ikonsidera diad pandesisyon yo no kasin manmaneho kayo ni o andi la?
Diad arum ya bansa, no labay na saray senior citizen ya i-renew so driver’s license da, kaukolan day mangala na medical certificate ya manpatunay ya sarag da ni manmaneho. Kaukolan ya unoren na saray Kristiano so ontan iran batas. (Roma 13:1) Pero anggano anggapoy ontan ya batas diad bansa yo, nia ray nepeg yon ikonsidera pian nanengneng yo no kasin sarag yo ni manmaneho.
KUMUSTAY PANAGMANEHO YO?
Unong ed website na National Institute on Aging (NIA), sakey ya organisasyon ed United States, nia ray itepet yod sarili yo:
Kasin buragas lay matak tan ngalngali agko la nabasay karatula ed dalan, lalo no labi la?
Kasin ngalngali agak la makalingaw no kaukolan koy onliko tan onnengneng ed side mirror?
Kasin aliwa ak lan alisto ya onggalaw? Singa bilang, kasin ngalngali agko naigalaw so salik no kaukolan koy manpreno?
Kasin matantan ya maong so panagmanehok kanian siak so pansesengegay trapik?
Kasin aminpiga la ya dawdawit ak lan naaksidente? Kasin wala la ray kumpil tan gasgas na luganan ko ta nambabangil so nababanggak?
Kasin asalik lay pinara na pulis lapud panagmanehok?
Kasin asalik lay akateglep legan ak ya manmamaneho?
Kasin wala ray tutumaren kon tambal ya apektoen toy panagmanehok?
Kasin aburido iray kapamilyak tan kakaarok ed panagmanehok?
No “on” so ebat yo ed sakey o duara ed sarayan tepet, ompan kaukolan yo lan limitaan so panagmaneho yo. Singa bilang, agkayo la manmamaneho na labi. Diad ilalabas na agew, likas yo no kumustay panagmaneho yo. Tepetan yo ray kapamilya tan kakaaro yo no antoy nibaga ra. No labay yo, sarag yoy man-enroll ed klase nipaakar ed safe ya panagmaneho no walay ontan ed lugar yo. Pero no “on” so ebat yo ed talora o masulok nin tepet ya walad tagey, mas marakep no agkayo la manmamaneho.a
UNOR YO RAY PRINSIPYO ED BIBLIA
Ompan ngalngali agyo natanggap ya aliwa lan singa dati so panagmaneho yo lapud ontatatken kayo la, tan agyo itan labay ya pantongtongan. Pero anto ray prinsipyo ed Biblia ya makatulong pian makapandesisyon kayoy duga? Niay duara.
Mansiansian mapaabeba. (Pro. 11:2) No ontatatken lay sakey ya too, onkapuy lay pakanengneng tan pakadngel to, tan aliwa lan alisto. Singa bilang, wala ray totoon mahilig ed sports pero nen ontatatken la ra, tinmunda la ran manggalaw ta amta ran mainomay la ran na-injury. Ontan met ed panagmaneho. No say sakey et ontatatken la, ompan kaukolan toy mandesisyon ya ontunda lan manmaneho. (Pro. 22:3) Tan no pigara lay angibaga ya aburido irad panagmaneho to, komon ta mapaabeba ya ondengel.—Ikompara so 2 Samuel 21:15-17.
Paliisan so mankasalanan ed dala. (Deu. 22:8) Agtayo labay ya sikatayo so sengegan ya naaksidente odino ompatey so sakey ya too. No ipilit na sakey so manmaneho anta alanganin lay panagmaneho to, iririsga toy mismon bilay to tan say bilay na arum. Sakey ni, no walay nagawan aksidente lapud sikato, pakakonsiensiaan to lanlamang.
Seguro iisipen yo ya no ontunda kayo lan manmaneho, ompan nabawasan so respeto na arum ed sikayo tan anggapo lay kana yo. Pero tandaan yo ya inar-aro kayo nen Aman Jehova lapud saray balibalin kualidad yo, singa say kapaabebaan yo tan say pannononot yod pankaabigan na arum. Insipan to ya tuloytuloy to kayon tulongan tan pabiskegen. (Isa. 46:4) Agto kayon balot paulyanan. Kanian ipikasi yod sikato ya ikdan to kayoy karunongan tan pakatebek pian nanengneng yo no kasin kaukolan yo lay ontundan manmaneho.
a Parad kaaruman ya impormasyon, nengnengen so artikulon “Mga Aksidente sa Sasakyan—Ligtas Ka Ba?” diad Agosto 22, 2002 ya isyu na Gumising!