Sikayo ran Maedad La—Mabmabli Kayo ed Kongregasyon

Kasin ontan met so nalilikna yo lapud matatken kayo la? Anggano abaybayag kayo lan matoor ya manlilingkor ed si Jehova, kasin nadidismaya kayo ta aliwa lan singa dati so nagagawaan yo parad sikato? Antoy makatulong pian ag-onkapuy so liknaan yo tan agnabalang so liket yo?

ANTOY IILALOAN NEN JEHOVA YA GAWAEN YO?

Tepetan yoy sarili yo, ‘Antoy iilaloan nen Aman Jehova ed siak?’ Balibali may ibabaga na Deuteronomio 6:5: “Arom si Jehova a Dios mo ed interon pusom tan interon kamarerwam tan interon biskeg mo.”

Base ed satan ya teksto, say iilaloan nen Jehova et amay iter mod sikato so sankaabigan mo, depende ed situasyon mo. Isip mon lanang itan pian agmo ikomparay sarilim ed arum, tan agmo met ikomparay nagagawaan mo natan ed saray agawaan mo nensaman.

Nen wala ka nid kaksilan, seguradon inter moy sankaabigan mo ed si Jehova. Natan ya maedad ka la tan anguman lay situasyon mo, seguradon gagawaen mo nin siansiay anggaay nayarian mo anggad iyabuloy na situasyon mo. Labay ton ibaga sirin, ag-anguman so iiter mod si Jehova—inter mod sikatoy sankaabigan mo nensaman, tan iiter mo nin siansia ed sikato so sankaabigan mo natan.

DAKEL SO NAARALAN NA ARUM ED SIKAYO

Nia ni tandaan yo: Imbes ya manpokus kayo ed saray subok ed itatatken, isip yo ya pankanawnawa yo itan pian mas natulongan yoy arum. Diad tua, wala ray nagawaan yo natan ya agyo ni nagawaan nensaman. Nia so sakey:

Istorya yod arum iray naaralan tan eksperiensya yod bilay. Imanoen irayan imbaga na saray maedad lan lingkor nen Jehova nensaman:

Arin David: “Nensaman et ugaw ak ni tan natan et matatken ak la, balet anggapo ni anengneng kon matunong ya apaulyan, odino saray ananak to a mipapayabol na naakan.”—Sal. 37:25.

Josue: “Magano ak lan ompatey, tan amta yo ed interon puso yo tan interon kamarerwa yo ya anggapoy anggan sakey a salita ed amin ya insipan nen Jehova a Dios yo ya agtinmua. Tinmua iratan ya amin ed sikayo. Anggapoy anggan sakey a salita ya agtinmua.”—Jos. 23:14.

Nen imbaga iratan nen David tan Josue, masikesiken la ra tan abaybayag la ran manlilingkor ed si Jehova. Kanian kada no nababasa tayo itan ed Biblia, manisia tayo, ta amta tayon apaneknekan dan mismo itan ed bilay da. Seguro nen mas ugaw kayo ni, nibaga yo met la iratan ya imbaga nen David tan Josue. Pero natan ya matatken kayo la, mas panisiaan kayo na arum no ibaga yo itan ed sikara. Kanian sambot yon istoryaen ed arum so matoor ya impanlingkor yod si Jehova.

Singa bilang, istorya yo ray nanduruman bendisyon ya naawat yo. Kasin walay agawad bilay yo ya apaneknekan yon aga mamaulyan si Jehova? Ibaga yo itan ed arum. Di ba no makarengel kayo na ontan iran eksperiensya, napapaseseg kayo? Kanian istorya yo labat ed arum iray makapaseseg ya eksperiensya yo. Seguradon napabiskeg yoy pananisia na agagi tan gawaen da kayon inspirasyon ed panlilingkor dad si Jehova.—Roma 1:​11, 12.

Napaseseg yo met iray agagi no pansagpotan yoy miaral diad Kingdom Hall anggad posible. No miaral kayod Kingdom Hall, napabiskeg yo ra tan napabiskeg da kayo met. Oniay imbaga nen Sister Connie ya abitla nen niman: “No agak miaral ed Kingdom Hall, matmainomay ya onkapuy so liknaan ko. Pero duma no miaral ak ya face to face. Lapud kaibak iray agagi, napepesel ak na panangaro. Iikdan ko ray simplin regalo pian nalikna ra ya papablien ko ra. Seseguroen ko met ya aktibo ak ed espiritual pian nakaibak iray agagi.”

PAPABLIEN NEN JEHOVA SO MATOOR YA PANLILINGKOR YO

Inar-aro nen Jehova iray lingkor to anggano aliwa lan singa dati so nagagawaan da parad sikato. Dakel so ontan ya nabasad Biblia. Say sakey et si Simeon, sakey ya Israelita ya masiken la nen inyanak si Jesus. Isip yo pa no antoy nalilikna nen Simeon kada no onlad templo. No nanenengneng to ray mas ugaw nin Israelitan lalaki ya mankikimey diman, seguro say pakalikna to, agla mausar ed si Jehova, aliwan singa saraman ya lalaki. Pero ontan kasi so pakanengneng nen Jehova ed sikato? Andi. Parad si Jehova, “matunong tan matakot ed Dios” si Simeon, tan ‘walad sikato so masanton espiritu.’ Kanian pinagalangan to—anengneng nen Simeon diad templo so ugaw nin Jesus tan inusar ni ingen nen Jehova ya mangipropesiya nipaakar ed sayan ugaw ya magmaliw ya Mesias! (Luc. 2:​25-35) On, agnampokus si Jehova ed inkatatken nen Simeon. Say ninengneng To et say mabiskeg ya pananisia to.

Makaseguro kayo met sirin ya papablien nin siansia nen Jehova so matoor ya panlilingkor yo anggano masiken tan akulaw kayo la. Parad si Jehova, say pansasakripisyo tayo et ‘nagkalalo lan makapaliket no gawaen tayo itan unong ed no antoy walad sikatayo, aliwan unong ed no antoy anggapod sikatayo.’—2 Cor. 8:12.

Kanian gawa yo labat no antoy sarag yon gawaen. Singa bilang, kasin sarag yo ni manpulong diad nanduruman paraan, anggano magano labat? Kasin sarag yon tawagan o ikdan na card so sakey ya agi pian napaseseg yo? Simpli labat iraya, pero balbaleg so nitulong to pian nalikna na agagi so panangaro, lalo la ta baleg so respeto dad sikayo lapud abayag ki lan manlilingkor ed si Jehova.

Anggano makapuy lay laman yo, walan-walay nagawaan yo parad si Jehova. Singa bilang, balibali so eksperiensya na sakey ya akulaw lan sister ed East Africa. Nabasa yo itan ed kahon ya “Aligtas so Bilay To.”

Napapaseseg yo kami ed panaanos tan panmamatoor yo. Maong kayon alimbawa ed sikami. Oniay ipapaseguro na Biblia: “Say Dios et matunong kanian agto lingwanan so gawa yo tan say aro ya impanengneng yo parad ngaran to diad panlilingkor yo ed saray masanto tan diad pantultuloy yon panlingkor ed sikara.”—Heb. 6:10.

ITULTULOY YO LABAT SO ONTULONG ED ARUM

Base ed impan-research, saray maedad la ya sankanonot day itulong ed arum et mas maksil so laman da, mas makdem so nonot da, tan mas andukey so bilay da.

Siempre, anggano matuttulong so sakey ya too, agto naiwasan so epekto na itatatken. Panarian na Dios labat so makapangiter na solusyon. Ekalen na satan so epekto na kasalanan, kaiba lay itatatken tan ipapatey.—Roma 5:12.

Legan yon aalagaren itan, ituloy yo labat ya gawaen so ipapagawa nen Jehova, kaiba lay kimey ya panagpulong tan panagbangat. Makatulong itan pian mabilabilay ed isip yo so ilalo tayod arapen. Tan nayarin makatulong met itan ed bunigas yo. Sikayo ran maedad lan agagi mi, komon ta agyo lilingwanan ya papablien nen Jehova so matoor ya panlilingkor yo, tan tandaan yo met ya papablien na interon kongregasyon so maong ya alimbawa yo.