Un Hoben Orguyoso di Su Religion

TEMPU Andrew tawatin 13 aña, e mester a traha un proyecto di scol riba e topico herencia cultural. E ta conta: “Na prome instante mi a pensa di skirbi tocante mi welo, pero despues mi a pensa: ‘Hey, warda un rato! Mi ta un Testigo di Yehova. Esaki ta un bon chens pa mi papia tocante mi religion!’

Mi a duna mi proyecto e tema ‘Para Firme’, y mi a traha un poster grandi cu a mustra e persecucion feros cu Testigonan di Yehova a confronta na Alemania na man di e Nazinan. Mi tawatin varios articulo como yudansa visual, entre otro, un duplicado di un uniform cu un triangulo biña y varios potret y carta di famia Kusserow.a Pa parti pa bishitante, mi tawatin copia di e carta cu Testigonan di Yehova a manda pa e gobierno Aleman. Un carta den cua e Testigonan, den un forma politicamente neutral pero toch firme, a condena e actonan inhusto cometi contra Testigonan di Yehova. Banda di mi stand mi a laga e video Testigonan di Yehova Ta Para Firme Contra Atake Nazi pasa continuamente. Tambe mi a pone varios Bijbel, foyeto y tratado como exhibicion.

Prome tur studiante y maestro di scol por a bin mira nos proyectonan den e sala di deporte. E siguiente anochi famia y amigonan tawata invita. Hopi hende a haci mi pregunta, como cu nan no tawata sa mes cu Testigonan di Yehova a ser persigui door di Nazi.”

Andrew ta admiti cu e mester a tuma un curashi pa papia tocante su religion. El a bisa: “Mi tawata sa cu algun hende lo a tenta mi, pero lo mi a sinti mi mas malo si mi no a hacie. Mi proyecto tawata trata di hende cu a sacrifica nan bida pa motibo di nan fe den Yehova, pues mi a pensa den mi mes cu lo minimo cu mi por a haci ta wanta un tiki critica.”

Na final di cuenta, Andrew a keda contento cu el a probecha di e chens aki pa duna testimonio. El a bisa: “Mi tawatin hopi combersacion tocante e motibo dicon nos no ta bai guera, y mi a laga Bijbel, buki y tratado cerca hende interesa.” Anto el a agrega: “Mi no por corda un otro ocasion cu mi tawata mas orguyoso di ta un Testigo di Yehova.”

[Nota]