El A Logra Mas di Loke El A Spera

“MI TAWATA sa cu mi maestro di historia no tawata gusta Testigo di Yehova, pero mi no tawatin un idea pakico”, segun Rebekka di 17 aña cu ta biba na Alemania. Pesei, ora e maestro a puntra ken ta dispuesto pa duna un spreekbeurt dilanti klas, Rebekka a duda un poco. No obstante, Rebekka a tuma un curashi y puntr’e si e por a papia tocante e persecucion cu Testigonan di Yehova a pasa aden bou dje regimen Nazi durante Segundo Guera Mundial. E maestro a keda contento cu e idea.

E klas a gusta Rebekka su presentacion, y nan a acepta un total di 44 revista y foyeto cu a trata e topico. Despues di esei, Rebekka a duna e maestro tur e material riba cua el a basa su investigacion, incluso varios buki y video cu hende cu no ta Testigo a skirbi of produci. Un di e videonan a trata e persecucion cu Testigonan di Yehova na Oost Alemania a pasa aden durante e Guera Friu. Esaki a interesa e maestro bastante, ya cu e no tawata sa mucho di e topico.

Rebekka a haya sa e ora ei pakico su maestro no tawata gusta Testigo di Yehova. E maestro a cont’e cu e tawata bai scol cu un Testigo di Yehova. E mucha homber no tawata papia casi nada tocante su creencianan of tocante su bida como Testigo. Pesei e maestro a conclui cu Testigonan di Yehova ta hende straño y el a dicidi cu e no kier tin nada di aber cu nan. Pero e presentacion di Rebekka a cambia su punto di bista. Rebekka ta bisa: “Awor mi ta sali mucho mas miho cu e maestro. Tambe mi a siña cu nos como hoben tin cu papia mas habri tocante nos creencianan cu otro hende.”

Pero esei no tawata fin di e asunto. E maestro a papia cu su coleganan tocante e bunita spreekbeurt di Rebekka. Algun dia despues e maestro di etica a pidi Rebekka duna un presentacion mas, e biaha aki no djis dilanti un klas sino na un ocasion masha special, esta, e conmemoracion anual cu e scol ta celebra di e liberacion di e campo di consentracion na Auschwitz na fin di Segundo Guera Mundial. Tawatin den careda di 360 alumno presente, hunto cu rond di dies maestro. Na final di e presentacion, e presentenan a acepta 50 foyeto y e scol a pidi 150 ehemplar mas pa reparti despues.

Rebekka a logra hopi mas di loke el a spera. El a duna un bon testimonio tocante su fe no solamente na su klas sino tambe na henter e scol. Y awor su maestro no tin e dudanan anterior mas tocante e Testigonan.

[Plachi na pagina 14]

E nazinan a decapita Heinrich Fundis. Centenares di otro Testigo di Yehova tambe a ser ehecuta

[Plachi na pagina 14]

Hopi Testigo di Yehova por a recobra nan libertad si nan a nenga nan religion door di firma e documento aki

[Reconocemento]

Pa cortesia di United States Holocaust Memorial Museum

[Plachi na pagina 15]

Muchanan manera Berthold Mewes a ser kita for di nan mayornan

[Plachi na pagina 15]

E video aki ta duna un relato historico di e Testigonan di Yehova balente bou dje regimen Nazi na Alemania

[Plachi na pagina 15]

Nan tawata cose un triangulo biña riba uniform di prizon pa identifica Testigonan di Yehova