E Punto di Bista Biblico

Unidad Cristian Ta Nifica Cu Tur Cristian Mester Ta Mescos?

UN CARACTERISTICA di religion djawe aparentemente ta desunion. Asta den e hendenan cu ta bai e mesun iglesia por tin un variedad di creencia contradictorio den asuntonan di doctrina y conducta. Un escritor a expres’e asin’aki: “Ta masha dificil pa haya dos hende cu ta kere den exactamente e mesun Dios. Ta parce cu den e dianan aki cada ser humano tin su propio teologia.”

Na contraste skerpi cu esaki, apostel Pablo a spierta e cristiannan di prome siglo den Corinto pa “papia e mesun cos” y pa “ta perfectamente uni den e mesun mente y den e mesun opinion.” (1 Corintionan 1:10) Awe algun hende ta critica e spiertamento di Pablo. Nan argumento ta cu ‘hende ta diferente, y no ta rasonabel pa insisti cu tur cristian mester pensa of actua mescos cu otro.’ Pero ta esei Pablo tawata bogando p’e, esta, pa hende ta obediente manera robot? Bijbel ta laga espacio pa hende tin cierto libertad personal?

Unidad, No Uniformidad

Den un otro carta cu Pablo a skirbi, el a apela na e cristiannan pa nan sirbi Dios cu nan “facultad di rasona.” (Romanonan 12:1, NW) Ta logico anto cu e no tawata purba forsa miembronan di e congregacion di Corinto pa actua manera robot. Pero pakico el a bisa nan pa ta “perfectamente uni den e mesun mente y den e mesun opinion”? Pablo a duna e conseho aki pa motibo cu e congregacion na Corinto tawata pasando den un problema serio. Tawatin division, di manera cu algun a mira Apolos como nan lider mientras cu otronan a faborece Pablo of Pedro. Tawatin algun cu a acepta Cristo so. Un desunion asina no tawata algo insignificante, pasobra el a menasa e pas di e congregacion.

Pablo tawata kier pa e Corintionan “preserva e unidad di e spirito den e vinculo di pas”, net manera el a spierta e cristiannan na Efeso mas despues. (Efesionan 4:3) El a anima e rumannan pa sigui Hesucristo den union, pa nan no split den gruponan desuni, of secta. Den e manera aki nan tur por tawatin e mesun proposito. (Huan 17:22) Pues, e conseho cu Pablo a duna e Corintionan a sirbi pa reahusta nan manera di pensa y promove unidad, no uniformidad.—2 Corintionan 13:9, 11.

Unidad ta importante tambe den asuntonan di doctrina. E siguidonan di Hesus ta realisa cu tin realmente “un fe”, mescos cu tin “un Dios y Tata.” (Efesionan 4:1-6) Pesei, cristiannan ta haci sigur cu loke nan ta kere aden ta na harmonia cu e berdad cu Dios a revela den su Palabra tocante su mes y su proposito. Nan ta uni den nan creencia tocante ken Dios ta y kico e ta exigi di nan. Tambe nan ta cumpli cu e normanan moral cu e Palabra di Dios ta trece bon cla dilanti. (1 Corintionan 6:9-11) Den e manera aki cristiannan ta keda uni, tanto den doctrina como den normanan moral.

Con pa Trata cu Diferencia di Opinion

Sinembargo, esaki no ta nifica cu ta bisa cada cristian exactamente con e tin cu pensa ni kico e tin cu haci den tur situacion di bida. Mayoria asunto ta envolve decisionnan personal. Pensa riba e ehempel aki. Hopi cristian di prome siglo den Corinto no kier a come carni cu lo por a bini di un tempel di idolo. Algun tawatin e pensamento firme cu comemento di e carni ei a encera un acto di adoracion falso, mientras cu otronan a haya cu no tawata dje relevante ei di unda e carni a bini. Ora Pablo a trata cu e asunto delicado aki, e no a traha un regla cu ta bisa e cristiannan kico nan mester haci. Mas bien, el a reconoce cu cada ken kisas ta tuma un otro decision den e asunto ei.a—1 Corintionan 8:4-13.

Awe kisas un cristian por tuma un decision cu ta diferente for di esun cu un otro cristian ta tuma riba asuntonan relaciona cu trabou, salu, recreo of otro cos cu tin di aber cu preferencia personal. E variedad lo por molestia algun persona. Kisas nan ta puntra nan mes si diferencia di opinion lo no hiba na desacuerdo of division den e congregacion. Sinembargo, no necesariamente mester ta asina. Pa ilustra esaki: Compositornan di musica tin solamente un cantidad limita di noot pa traha cu ne, pero e posibilidadnan pa hinca un bunita melodia den otro ta sin fin. Mescos tambe, cristiannan ta tuma decisionnan cu ta dentro di e limitenan di principionan di Dios. Sinembargo, ora nan ta tuma cierto decisionnan basa riba preferencia personal, nan tin un grado di libertad.

Con nos por conserva unidad cristian mientras nos ta respeta e preferencianan personal di nos rumannan cristian? E clave ta amor. Amor pa Dios ta motiva nos pa somete nos di buena gana na su mandamentonan. (1 Huan 5:3) Amor pa prohimo ta motiva nos pa respeta e derecho cu otro hende tin pa tuma decision segun nan consenshi den asuntonan personal. (Romanonan 14:3, 4; Galationan 5:13) Pablo a pone un bon ehempel den esaki ora el a somete su mes na e autoridad di e cuerpo gobernante di prome siglo den un asunto cu tawatin di aber cu doctrina. (Mateo 24:45-47; Echonan 15:1, 2) Na mesun tempo, el a anima tur hende pa respeta e consenshi di otro cristiannan den asuntonan di indole personal.—1 Corintionan 10:25-33.

Ta bisto anto cu no por condena ningun hende pa motibo cu el a tuma un decision di consenshi cu no ta na conflicto cu principionan di Bijbel. (Santiago 4:12) Di otro banda, cristiannan leal lo no insisti riba nan derechonan personal y door di esei perhudica e consenshi di otronan of causa desunion den e congregacion. Tampoco nan no mester pretende cu nan ta liber pa haci algo cu e Palabra di Dios ta prohibi bon cla. (Romanonan 15:1; 2 Pedro 2:1, 19) Amor pa Dios mester motiva nos pa train nos consenshi pa e mira cosnan manera Dios ta mira nan. Esaki, na su turno, lo mantene nos uni cu nos rumannan den fe.—Hebreonan 5:14.

[Nota]