Un Lesion Cu A Cambia Mi Bida

SEGUN E RELATO DI STANLEY OMBEVA

Na 1982, un auto cu tawata coriendo mucho duro a dal mi. Djis despues di tratamento medico mi a reanuda mi rutina di actividad diario, apesar di cu cada tanto tempo mi tawata sufri dolor pa motibo cu un pida di mi weso di lomba entre mi garganta y pecho a sali for di luga. Sinembargo, 15 aña despues, mi a pasa den e prueba di mas grandi di mi bida.

PROME cu e accidente y, te na cierto grado, despues di e accidente, mi tawata yen di energia. Mi tawatin un bon custumber di haci ehercicio; entre otro, jog 10 pa 13 kilometer den weekend, hunga squash y haci hopi trabou manual pisa. Mi a yuda construi Salon di Reino y tambe un Salon di Asamblea grandi na Nairobi, Kenia, caminda nos ta biba.

Anto na 1997, e dolornan den mi pecho a cuminsa bira mas regular y mas intenso. Un examen medico a revela cu un pida di mi weso di lomba a sali for di luga y tawata primi mi nervionan principal. Nan a saca afo cu causa di esaki tawata e accidente menciona den introduccion.

Prome cu mi salu a bai atras, mi a haya un trabou di salesman. E trabou a inclui un plan di seguro medico pa famia. Mi posibilidadnan den e mundo comercial a mustra hopi prometedor. Pero meimei di aña 1998, mi a cuminsa perde heful den mi pecho bai abou. Pocopoco pero sigur mi salu a bai atras.

No hopi tempo despues di esei, mi a perde mi trabou cu tur su beneficionan secundario. E tempo ei, mi dos yiu mohenan, Sylvia y Wilhelmina, tawatin 13 y 10 aña di edad. Siendo sin trabou awor, nos tawatin cu depende di loke mi casa, Joyce, tawata trece cas fin di luna. Den e circunstancianan nobo aki, nos a haci cambionan den nos bida y gasta menos posibel. Door di esei nos a logra tene cabes riba awa.

Sintimentonan Negativo

Mi tin cu admiti cu segun cu mi a realisa con serio mi condicion tawata, mi a bira negativo, egoista y crepchi. Tin biaha, mi tawata rabia, cunsumi y piki pieu riba delaster un cos chikito. Semper mi tawata na rand di cai den depresion. Tur hende den famia tawatin stress. Mi casa y mi yiu mohenan a haya nan cu un situacion straño cu nan no tawata sa masha kico pa haci.

E tempo ei mi a pensa cu mi sintimentonan tawata hustifica. Mi peso a subi masha lihe. Mi tawatin problema serio cu bai af y pa controla mi orinamento. Hopi bes, mi por a muri di berguensa. Varios biaha mi tawata bai den un huki mi so, awa na wowo. Tin biaha mi tawata rabia asina tanto te cu mi a casi para bira spetakel. Mi tawata sa cu mi no tawata trata cu mi situacion den e miho manera.

Como anciano den e congregacion cristian di Testigonan di Yehova, hopi bes mi a conseha mi rumannan cristian pa nunca culpa Yehova pa nada cu nan ta sufri di dje. Toch, mi tawata puntra mi mes—y no un biaha so—‘Pakico Yehova a laga un cos asina pasa cu mi?’ Aunke mi a uza textonan manera 1 Corintionan 10:13 pa fortalece y anima otro rumannan, mi a sinti cu loke mi tawata experienciando si tawata di mas!

Un Reto Medico

Tawata dificil pa mi haya bon tratamento medico. Mi a bai un fisioterapista, un kiropractico y un acupunturista, tur riba un solo dia. Si mi a haya alivio mes, tawata pa un rato so. Mi a consulta un cantidad di docter, incluso un ciruhano ortopedico y un neurociruhano. Tur tawata di acuerdo riba un punto: Mi mester opera pa alivia e dolor y saca e pida weso cu tawata for di luga. Pa motibo di mi creencianan basa riba Bijbel, mi a splica e expertonan medico aki claramente cu mi no kier sanger bou di ningun circunstancia.—Echonan 15:28, 29.

E prome ciruhano a bisa mi cu lo e opera mi via mi lomba. El a splica mi cu e operacion lo por ta uno di hopi riesgo. Pero e ciruhano aki no por a garantisa mi cu lo e no duna sanger. Mi no a bai bek serca dje.

E di dos a bisa mi cu lo e yega na e weso di lomba via mi garganta. E intervencion ei a zona mi horibel. Aunke e no tawatin problema cu mi nengamento di sanger, e kier a haci e operacion mesora y sin bai den mucho detaye. Mi no a bai mas serca dje tampoco.

Sinembargo, cu yudansa di e Testigonan di Yehova cu ta forma e Comite di Contacto cu Hospital, mi a logra haya un docter dispuesto pa coopera. E operacion cu e di tres ciruhano a recomenda tawata mescos cu esun cu e di dos a propone: corta via garganta. El a splica mi cu e riesgonan lo tawata minimo.

E detayenan bibo di e manera cu e operacion lo a tuma luga a spanta mi. Sabiendo cu un operacion asina lo a ser haci rond di organonan delicado di curpa manera curason y pulmonnan a spanta mi mas ainda. Lo mi a sobrevivi e operacion? Claro cu e pensamentonan negativo ei no a calma mi temornan ningun tiki.

Dia 25 di november 1998, nan a opera mi cuater ora largo cu bon resultado na un hospital di Nairobi. Tambe e ciruhano a kita pida di mi weso di pelvis. Nan a slijp e pida weso y despues peg’e cu scruf y un plachi di metal na e area afecta. Esaki a yuda. Pero e operacion no a elimina tur mi problemanan. Mi tawata cana cu basta dificultad. Ainda mi ta sufri cada bes di perdida di heful.

Actitud Positivo

Manera mi a menciona anteriormente, mi a pasa hopi tempo ta precupa y pensa riba mi mal condicion. Por zona poco contradictorio, pero hopi di e personal medico tawata elogia mi pa mi actitud calmo y optimista. Pakico nan a pensa asina? Nan por a mira cu aunke mi tawata sufri hopi dolor, toch mi a papia cu nan tocante mi fe den Dios.

Aunke de bes en cuando mi tawata rabia y bira amarga pa loke mi tawata pasa aden, ainda mi tawata confia den Yehova. Semper El a sostene mi den tur loke mi a pasa aden, y El a hacie asina tanto cu tin biaha mi tawatin berguensa di mi mes. Mi a propone mi mes firmemente pa lesa y medita riba textonan cu mi sa lo tawata un consuelo pa mi den mi situacion. Algun di esakinan ta:

Revelacion 21:4: “[Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor.” Ora mi reflexiona riba e promesa di Bijbel di un mundo nobo caminda nunca mas lo no tin lagrima ni dolor, en berdad mi ta haya un consuelo.

Hebreonan 6:10: “Dios no ta inhusto pa lubida boso trabou y e amor cu boso a mustra pa su nomber.” Aunke mi a bira fisicamente limita, mi tawata sa cu Yehova lo balora mi esfuersonan den su sirbishi.

Santiago 1:13: “No laga ningun hende bisa ora cu e wordo tenta: ‘Mi ta wordo tenta door di Dios’; pasobra Dios no por wordo tenta door di maldad, y E mes no ta tenta ningun hende.” Esei ta masha cierto! Aunke Yehova a permiti mi sufri, no ta E a caus’e.

Filipensenan 4:6 y 7: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” Oracion a yuda mi haya e pas mental tan necesario, loke a permiti mi trata cu mi situacion na un manera sabi.

Mi tawata uza e textonan aki pa anima otro rumannan cu tawata den angustia—y en berdad esakinan a yuda nan! Pero mi a bin realisa cu e tempo ei mi no a compronde nan balor completamente. Ta hopi malo mi mester a bira pa compronde kico ta nifica ser humilde y siña pone mi pleno confiansa den Yehova.

Mas Animacion pa Mi

Hopi ruman ta bisa cu e hermandad cristian ta un pilar y apoyo den tempo di dificultad. Toch, ta masha facil pa nos mira e relacion cu nos rumannan como algo gewoon! Ta berdad cu kisas no tin mucho cos cu nan por haci, pero semper nan ta cla pa yuda. Esei tawata e caso cu mi mes tambe. Tur ora nan tawata bishita mi na hospital, tin biaha mainta tempran. Asta nan a ofrece pa yuda paga mi gastonan medico. Mi ta profundamente gradicido na tur e rumannan cu a keda conmovi cu mi sufrimento y cu a bin yuda mi.

Den nos congregacion local, e rumannan sa cu awor mi ta limita den loke mi por haci. Actualmente mi ta sirbi como superintendente presidente y ta traha cu un cuerpo di anciano cristian den cua ta reina un bon spirito di cooperacion. Nunca mi a bira iregular den e trabou di predica. Den e tempo cu mas mi a sufri, mi a yuda dos hende dedica nan bida na Yehova. Actualmente un di nan ta sirbi como sirbido ministerial den un congregacion di Testigonan di Yehova na Nairobi.

Ainda mi no tin boca pa gradici mi casa, kende a apoya mi door di henter e experencia teribel aki. El a soporta mi rabia, mi cambionan di beis, mi terkedad y mi frustracionnan. Ki ora cu mi tawata yora di dolor, e tawata trankilisa mi y consola mi. Su forsa y resistencia durante dificultad ta asombra mi te awe. El a resulta di ta un berdadero ‘amigo tur ora bai.’—Proverbionan 17:17.

Nos yiu mohenan a siña trata cu mi situacion. Nan ta haci tur loke nan por pa yuda mi. Nan ta compronde mi necesidadnan y ta responde mesora pa garantisa mi bienestar ora nan mama no t’ei. Sylvia ta mi “kruk.” E ta yuda mi move rond den cas ki ora cu mi ta sinti mi debil.

Kico di Mina, esun mas chikito? Wel, mi ta corda un biaha mi a cai na cas y mi no por a lanta bek. E tawata e unico hende na cas. El a uza tur su forsa pa e lanta mi y lei mi pocopoco hiba mi camber. Ainda e no tin un idea con el a logra esei. E solo acto di curashi ei a keda graba te awe den mi mente.

E cos di mas dificil cu mi mester a lucha cu ne den bida tawata e lesion aki. Y ainda mi ta hibando un lucha. No tin nada cu a pone mi bida y fe na prueba te na e grado aki. Mi a siña kico kiermen ser humilde, rasonabel y sinti pa otro hende. Pleno confiansa den Yehova a yuda mi soporta e problema aki cu exito.

Mi a siña e berdad di e palabranan di apostel Pablo: “Nos tin e tesoro aki den pochi di klei, pa e excelencia di e poder por ta di Dios y no di nos mes.” (2 Corintionan 4:7) Mi ta haya masha hopi consuelo den e promesa di Dios di “shelonan nobo y un tera nobo” cu lo bini pronto. (2 Pedro 3:13) Mi ta pidi Yehova pa e sigui sostene mi mientras mi ta warda riba e mundo nobo, pasobra ainda mi ta suak y mi no por haci masha riba mi mes forsa.

[Plachinan na pagina 20]

Actividad cristian cu mi famia a yuda mi persevera