Dicon Nos Tin Mester di Maestro?

“Un dia cu un bon maestro ta miho cu mil dia di siñamento diligente.”—Proverbio Hapones.

BO TA corda un maestro di scol cu realmente a impresiona bo? Of si ainda bo ta bai scol, bo tin un maestro faborito? Si ta asina, dicon?

Un bon maestro ta inculca confiansa y ta haci siñamento un tarea interesante. Un exalumno di un scol na Birmingham, Inglatera, di 70 aña, cu cariño ta corda su meneer di Ingles. “Meneer Clewley a haci mi conciente di mi habilidadnan cu mi no tawata conciente di dje. Mi tawata timido y reserva, pero toch el a entrena mi pa mi por a participa den un competencia escolar di drama. Den mi ultimo aña di scol, mi a gana e premio di drama. Sin su animacion, lo mi no por a logra esei. Lastimamente, mi no a mir’e nunca mas despues pa mi gradicie pa su dedicacion na su studiantenan.”

Margit, un señora agradabel di 50 y pico aña, di Munich, Alemania, ta bisa: “Tawatin un maestra cu mi tawata gusta masha. E tawatin un manera excelente di splica e cosnan mas complica den un manera simpel. El a anima nos pa haci pregunta ora nos no por a comprende algo. E no tawata reserva, sino amigabel. Esei tawata haci e lesnan mas agradabel.”

Peter, un Australiano, a bisa cu e ta corda un maestro di wiskunde kende “a yuda nos mira e importancia di loke nos tawata siña door di duna ehempel practico. Ora nos tawata siña trigonometria (driehoeksmeting), el a mustra nos con pa midi e haltura di un edificio sin mishi cu ne, djis door di aplica e principio di trigonometria. Mi ta corda cu mi a bisa mi mes: ‘Esei si ta impresionante!’”

Pauline di nort Inglatera, a admiti na su maestro: “Mi tin masha dificultad cu cifra.” El a puntra: “Bo tin gana di mehora? Mi por yuda bo.” Pauline a sigui bisa: “E siguiente par di lunanan, el a duna mi atencion adicional, asta el a yuda mi despues di scol. Mi tawata sa cu e tawata kier pa mi logra. E tawata interesa den mi. Door cu mi tawata sa esei, mi tawata traha mas duro y mi a mehora.”

Angie di Escocia, cu awor tin 30 y pico aña, ta corda meneer Graham, su maestro di historia. “E tawata duna historia na un manera masha interesante! Como si fuera ta un cuenta, e tawata relata sucesonan y tawata realmente entusiasma tocante cada topico. E tawata duna nan bida.” Tambe cu cariño e ta corda juffrouw Hewitt di edad avansa, su maestra di eerste klas. “E tawata lief y interesa den hende. Un biaha den klas, mi a bai cerca dje pa hacie un pregunta. El a brasa mi. El a laga mi sinti cu e tawata realmente interesa den mi.”

Timothy di sur Grecia, a expresa su aprecio pa un di su maestronan asina aki: “Ainda mi ta corda mi maestro di ‘scheikunde’ cu ‘natuurkunde.’ El a cambia mi punto di bista di e mundo rondo di mi y di bida. E tawata crea un sintimento di temor, respet y asombro den klas. El a hinca den nos un pasion pa conocemento y amor pa comprendemento.”

Ramona di California, Merca, ta un otro ehempel. El a skirbi: “Mi juffrouw di scol secundario tawata gusta Ingles. Su entusiasmo tawata masha contagioso! E ta laga asta e partinan mas dificil parce facil.”

Jane di Canada, tawata papia cu entusiasmo di su maestro di gymnastiek cu tawata “yen di idea pa pasa dushi y siña. E tawata bai recrea cu nos den aire liber y a siña nos ski y pisca den awa bou di ijs. Asta nos a yega di traha bannock, un tipo di pan indjan, riba un kampvuur cu nos mes a traha. Tur esaki tawata un experencia masha dushi mes pa un mucha di cas cu normalmente semper ta gusta studia den buki!”

Helen ta un señora timido cu a nace na Shangai y a bai scol na Hong Kong. E ta corda: “Den vijfde klas mi tawatin un meneer cu yama Chan, cu tawata duna gymnastiek y les di pintamento. Mi tawata un mucha tenchi y no tawata bon den volleyball ni basketball. E no tawata brongosa mi. E tawata laga mi hunga badminton y otro weganan cu tawata pas mas cu mi. E tawata mustra consideracion y tawata bondadoso.

E mesun cos ta conta pa pintamento, mi no tawata bon den pinta obheto ni hende. Pues e tawata laga mi diseña y pinta patronchi, loke mi tawata mas miho aden. Pa motibo cu mi tawata mas jong cu e otro alumnonan, el a combence mi pa keda un aña mas den e klas ei. Esaki tawata un momento decisivo den mi educacion. Mi a haya confiansa y a progresa. Semper lo mi keda gradicido na dje.”

Cua maestro ta parce di haci un impacto mas grandi? William Ayers ta contesta den su buki To Teach—The Journey of a Teacher (Dunamento di Les—E Biahe di un Maestro): “Pa un persona duna les bon, riba tur cos e mester ta un maestro atento, cu interes y dedica na e bida di e alumnonan. . . . Dunamento di les na un manera eficas no ta un asunto di tecnica of metodo spesifico, plan of manera di haci cos. . . . Dunamento di les primeramente ta un cuestion di amor.” Pues ken ta un maestro exitoso? E ta bisa: “E maestro cu ta touch bo curason, e maestro cu a comprende bo y cu a interesa den bo como hende, e maestro kende su pasion pa algo—musica, wiskunde, Latin y fli—tawata contagioso y motivador.”

Sin duda, hopi maestro a haya palabranan di aprecio for di alumnonan y asta for di mayornan. Y esei a anima nan pa sigui duna les apesar di contratiempo. Loke tur e comentarionan aki tawatin en comun ta cu e maestro a mustra bondad y berdadero interes den e alumno.

Naturalmente, no ta tur maestro ta demostra e cualidadnan ei na e alumnonan. Pero tambe nos tin cu corda cu maestronan frecuentemente ta haya nan cu hopi presion cu ta limita loke nan por haci pa nan alumnonan. Esaki ta hiba nos na e pregunta: Dicon hende ta scohe un profesion asina dificil?

[Plachi na pagina 4]

“Dunamento di les primeramente ta un cuestion di amor”