E Satisfaccion y Goso di Duna Les

“Kico ta yuda mi sigui? Maske dunamento di les por ta un cos dificil y agotador, ora mi mira cu e muchanan ta yen di gana di siña y mi mira nan progreso esei ta motiva mi pa sigui.”—Leemarys, un maestro di e stad di New York.

APESAR di tur desafio, contratiempo y decepcion, miyones di maestro rond mundo ta persevera den e profesion cu nan a scohe. Kico ta motiva miles di studiante anto pa haci esfuerso pa cualifica pa bira maestro siendo cu nan sa cu nan lo no haya e debido reconocemento? Kico ta yuda nan sigui?

Inna un maestra Ruso, a splica: “E ta un experencia maravioso pa mira bo exalumnonan como adulto, pa tende nan expresa cu loke nan a siña for di bo, ta bale la pena. Ta masha animante pa tende nan bisa cu nan tin recuerdonan agradabel di e añanan cu nan a pasa cu bo.”

Giuliano un maestro cita den e articulo anterior, a bisa: “Un di e satisfaccionnan mas grandi ta ora bo ripara cu bo a logra stimula e interes di e alumnonan den un topico. Por ehempel, despues cu mi a caba di splica un parti di historia, algun alumno a bisa: ‘No stop. Conta nos mas!’ E palabranan spontaneo aki por drecha bo mainta na scol pasobra bo ta ripara cu bo a lanta den e hobennan emocionnan cu ta nobo pa nan. Bo ta sinti bo asina felis di mira nan cara ora nan wowonan briya pasobra nan a comprende un topico.”

Elena un maestra na Italia, a bisa: “Mi ta kere cu bo ta haya mas satisfaccion den cosnan chikito di tur dia, den e logronan chikito di e alumnonan, cu den resultadonan importante cu masha poco ta sosode.”

Connie un Australiano di 30 y pico aña, a bisa: “Ta masha recompensador ora un alumno cu kende bo tawatin relacion di maestro y alumno ta tuma tempo pa skirbi bo un carta pa expresa aprecio pa e esfuerso cu bo a haci.”

Oscar di Mendoza, Argentina, ta sinti e mesun cos: “Ora mi topa mi alumnonan riba caya of na un otro caminda y nan ta mustra aprecio pa loke mi a siña nan, mi ta sinti cu mi esfuersonan a bale la pena.” Angel di Madrid, Spaña, a bisa: “Mi a dedica parti di mi bida na e profesion maravioso pero dificil aki. Y pa mi, e satisfaccion mas grandi ta pa mira hobennan kende mi a duna les bira homber- y mohenan cu ta para riba nan pia, en parti debi na mi esfuerso.”

Leemarys cita na principio, a bisa: “Di berdad mi ta sinti cu maestronan ta hendenan special. Tambe nos ta un poco loco pa tuma un responsabilidad asina grandi. Pero si bo por tin un bon efecto—sea ta riba dies mucha of djis riba un so—bo a haci bo trabou, y no tin un sintimento mas dushi cu esei. Bo ta haci bo trabou cu goso.”

Bo A Yega di Gradici Bo Maestronan?

Como alumno of mayor bo a yega di gradici bo maestro pa su tempo, esfuerso y interes? Of bo a asta yega di manda un carchi of carta di gradicimento? Arthur di Nairobi, Kenia, a haci un remarca cu ta na su luga: “Maestronan tambe ta progresa si nan haya encomendacion. Gobierno, mayornan y alumnonan mester aprecia maestronan masha hopi mes pa nan servicionan.”

Autor y maestra LouAnne Johnson a skirbi: “Pa cada carta negativo cu mi ta haya tocante un maestro, mi ta ricibi shen positivo, loke ta confirma locual mi ta kere, esta, cu tin hopi mas bon maestro cu tin mal maestro.” Ta interesante cu awendia hopi hende ta contrata un detective pa “yuda localisa un exmaestro. Hende kier haya nan maestronan pa gradici nan.”

Maestronan ta pone un fundeshi importante pa e educacion di un hende. Asta e miho profesornan cu ta traha na e universidadnan mas prestigioso, debe nan maestronan cu a tuma tempo y a haci esfuerso pa stimula y cultiva nan deseo pa educacion, conocemento y comprendemento. Arthur, na Nairobi, ta bisa: “Tur oficial halto den e sector publico y priva a haya les di un maestro na un dado momento den nan bida.”

Nos mester ta masha gradicido na e homber- y mohenan aki cu a stimula nos curiosidad, kendenan a impulsa nos mente y curason, kendenan a mustra nos con pa satisface nos sed pa conocemento y comprendemento!

Cuanto mas gradicido nos mester ta na e Gran Educador, Yehova Dios, kende a inspira e palabranan na Proverbionan 2:1-6: “Mi yiu, si bo kier ricibi mi palabranan y warda mi mandamentonan den bo, haci bo horea atento na sabiduria, y inclina bo curason na comprendemento; pasobra si bo sclama pa discernimento, halsa bo bos pa comprendemento, si bo busc’e manera plata, y rondi’e manera tesoro scondi, e ora ei lo bo discerni e temor di SEÑOR, y descubri e conocemento di Dios. Pasobra SEÑOR ta duna sabiduria; for di su boca ta sali conocemento y comprendemento.”

Tuma nota cu e palabra condicional “si” ta ser menciona tres bes den e textonan aki cu ta pone bo pensa. Imagina bo, si nos ta dispuesto pa acepta e reto ei, nos por “descubri e conocemento di Dios”! Esei sigur ta e educacion di mas importante.

[Cuadro na pagina 13]

Un Mayor Felis

Un maestro di e stad di New York a ricibi un carta cu ta bisa lo siguiente:

“Lo mi kier gradici Bo di henter mi alma y curason pa loke Bo a haci pa mi yiunan. Bo interes, bondad y habilidad a yuda nan logra lo maximo. Mi tin sigur cu nunca nan lo a experencia esei sin Bo. Bo a haci mi masha orguyoso di mi yiunan, un experencia cu nunca lo mi lubida. Saludo di S. B.”

Bo conoce un maestro cu lo bo por anima?

[Plachi na pagina 12]

‘Bo ta sinti bo asina felis pa mira alumnonan ora nan wowonan briya pasobra nan a comprende un topico.’—GIULIANO, ITALIA

[Plachinan na pagina 13]

Ta masha recompensador ora un alumno ta tuma tempo pa skirbi bo un carta pa expresa aprecio.’—CONNIE, AUSTRALIA