Dicon Nan A Bira Maestro?

“Mayoria maestro ta scohe nan carera door cu e ta un profesion cu ta yuda hende. [Dunamento di les ta un] compromiso pa haci un diferensia den bida di e mucha.”—Teachers, Schools, and Society.

MASKE algun maestro ta hacie parce facil, dunamento di les por ta yen di obstaculo cu mester wordo venci. Eseinan por ta, un klas mucho grandi, demasiado trabou di papel, burocracia aplastante, alumnonan cu no ta copera y mal pago. Pedro un maestro na Madrid, Spaña, a splica esei di e siguiente forma: “Ser un maestro no ta facil. E ta exigi hopi sacrificio propio. Pero apesar di e dificultadnan, toch mi ta considera dunamento di les mas recompensador cu un trabou den mundo di comercio.”

E desafio por ta hopi grandi na scolnan den stadnan grandi di mayoria pais. Droga, crimen, moralidad permisivo y tin bes indeferencia di mayornan por afecta e ambiente y disiplina na scol masha hopi mes. Actitud rebelde ta comun y coriente. Dicon anto asina tanto hende cualifica ta scohe pa bira maestro?

Leemarys y Diana ta maestra na e stad di New York. Nan ta traha cu mucha di cinco te dies aña di edad. Ambos maestra ta bilingue (Ingles y Spaño) y ta trata principalmente cu muchanan Hispano. Nos pregunta tawata . . .

Kico Ta Motiva un Maestro?

Leemarys a bisa: “Kico ta motiva mi? Mi amor pa mucha. Mi sa cu pa algun mucha mi ta e unico persona cu ta yuda nan den nan esfuerso.”

Diana a bisa: “Mi a yuda mi subrino di ocho aña, kende tawatin dificultad na scol, specialmente cu lesamento. Pa mi tawata un satisfaccion grandi pa mira e y otronan siña! Pesei mi a dicidi cu lo mi kier duna les, y mi a kita for di mi trabou na banco.”

Spierta! a haci e mesun pregunta na maestronan di diferente pais, ata aki un par di contesta cu nos a haya.

Giuliano un Italiano di 40 y pico aña, ta splica: “Mi a scohe e profesion aki pasobra mi a keda fasina cu ne for di tempo cu mi tawata un alumno (na man drechi). Mi a consider’e como un profesion cu ta duna hopi oportunidad pa inspira otronan. E entusiasmo cu mi tawatin ora cu mi a cuminsa a yuda mi vence dificultadnan cu mi a pasa aden na principio di mi carera.”

Nick di New South Wales, Australia, a bisa: “No tawatin masha oportunidad pa trabou riba mi tereno di investigacion di kimica, ma tawatin yen di oportunidad riba e tereno di educacion. Desde e tempo ei mi a ripara cu mi gusta duna les, y parce cu e alumnonan tambe ta gusta e manera cu mi ta duna les.”

Hopi bes e ehempel di mayornan tambe tawata un factor principal cu a pone algun scohe pa bira maestro. William, di Kenia, a contesta nos pregunta: “Esun cu mas tanto a duna mi e deseo pa duna les ta mi tata, kende a bira maestro na aña 1952. Un factor cu a pone mi keda cu e profesion aki ta e echo cu mi sa cu mi ta formando mente di mucha jong.”

Rosemary kende tambe ta di Kenia, a bisa nos: “Semper mi tawatin deseo di yuda hende menos privilegia. Pues mi tawatin cu scohe entre bira verpleegster of maestra. E oferta pa duna les a presenta prome. E echo cu mi tambe ta mama a aumenta mi amor pa e profesion.”

Berthold di Düren, Alemania, tawatin un motibo diferente pa duna les: “Mi esposa a combence mi cu lo mi por bira un bon maestro.” Y a resulta cu e tawatin rason. Tambe Berthold a bisa: “E profesion cu mi tin awor ta duna mi hopi goso. A menos cu un maestro ta combenci di e balor di educacion anto banda di esaki e ta interesa den mucha jong, ta imposibel pa e por ta un bon maestro cu ta exitoso, motiva y satisfecho.”

Un maestro Hapones cu yama Masahiro, di e stad di Nakatsu, a bisa: “Loke a motiva mi pa bira un maestro tawata e echo cu mi tawatin un maravioso maestro den mi prome aña di scol secundario. E tawata siña nos cu berdadero dedicacion. Y e motibo principal pakico mi a sigui den mi profesion ta cu mi ta stima mucha.”

Yoshiya, cu awor tin 54 aña di edad y cu tambe ta di Hapon, tawatin un trabou bon paga den un fabrica pero el a sinti cu e tawata catibo di e trabou y di e ruta di trabou. “Un dia mi so tawata pensa: ‘Pa cuanto tempo lo mi sigui cu e estilo di bida aki?’ Mi a dicidi cu mi ta busca un trabou cu tin mas di haci cu hende en bes di cu cos. Duna les ta algo unico. Bo ta traha cu mucha jong. E ta algo humano.”

Valentina di St. Petersburg, Rusia, tambe ta gusta e aspecto ei di e profesion di maestro. El a bisa: “E carera cu mi a scohe ta pa duna les. Mi a traha na scol basico como maestra pa 37 aña. Mi gusta traha cu mucha, specialmente cu mucha mas chikito. Mi stima mi trabou, y ta pesei mi no a baha cu pension ainda.”

Autor William Ayers, cu ta un maestro tambe, a skirbi: “Hende ta sinti nan yama pa duna les pasobra nan stima mucha- y hobennan, of nan gusta di ta cu nan, mira con nan ta desaroya y crece y bira capas, competente y poderoso den mundo. . . . Hende ta duna les . . . como un regalo di nan pa otro hende. Mi ta duna les cu e speransa di haci mundo un miho luga pa biba.”

Si, apesar di dificultad y contratiempo, miles di homber y mohe dedica ta ser atrai na e profesion di duna les. Kico ta algun di e problemanan mas grandi cu nan ta enfrenta? E siguiente articulo lo contesta e pregunta aki.

[Cuadro na pagina 6]

Sugerencianan pa Comunicacion Entre Maestro y Mayor

✔ Siña conoce e mayornan. Esaki no ta perdemento di tempo. E ta un inversion di tempo cu ta beneficioso tanto pa e maestro como e mayornan. Esaki ta bo oportunidad pa forma un relacion cu esnan cu lo por bira bo miho colaboradonan.

✔ Papia na e nivel di e mayornan, no rebaha nan. Evita di uza idioma di maestro.

✔ Ora di papia tocante e muchanan, resalta e aspectonan positivo. Duna elogio ta mas efectivo cu critica. Splica kico e mayornan por haci pa yuda nan yiu bai bon.

✔ Laga e mayornan expresa nan mes, anto scucha bon.

✔ Purba comprende e ambiente cu e mucha ta biba aden. Si ta posibel, bai su cas.

✔ Traha afspraak pa e siguiente bishita. Keda den contacto ta importante. Esei ta mustra cu bo tin berdadero interes.—Basa Riba Teaching in America.

[Plachi na pagina 6]

‘Mi tata tambe tawata maestro.’—WILLIAM, KENIA

[Plachi na pagina 7]

“Mi gusta traha cu mucha.”—VALENTINA, RUSIA

[Plachi na pagina 7]

“Duna les ta algo unico. Bo ta traha cu mucha jong.”—YOSHIYA, HAPON