Sacrificio- y Riesgonan di Duna Les

“Hende ta spera masha hopi di esnan cu ta duna les, sinembargo masha poco bes educadonan dedica na nos scolnan ta haya elogio . . . publicamente pa nan esfuersonan.”—Ken Eltis, Universidad di Sydney, Australia.

HENDE tin cu admiti cu e profesion aki cu a ser yama e “profesion di mas importante” tin hopi desafio cu ne: for di salario insuficiente te na localnan den mal condicion; for di mucho trabou di papel te na klasnan mucho grandi; for di falta di respet y violencia te na mayornan indeferente. Con algun maestro ta trata cu e desafionan aki?

Falta di Respet

Nos a puntra cuater maestro di e stad di New York kico nan ta kere ta e problemanan principal. Nan a contesta unanimamente: “Falta di respet.”

Segun William di Kenia, na Africa tambe cos a cambia den e aspecto aki. El a bisa: “Muchanan ta hayando menos disiplina. Ora ami tawata creciendo [awor e tin 40 y pico aña], a considera maestronan entre esnan mas respeta den comunidad Africano. Tanto mucha jong como hende grandi semper tawata considera e maestro como ‘role model.’ E respet aki ta menguando. Cultura Occidental pocopoco ta influencia e hobennan, asta esnan cu ta biba mas den cunucu di Africa. Pelicula, video y literatura ta presenta falta di respet pa autoridad como un cos heroico.”

Giuliano, kende ta duna les na Italia, ta lamenta: “Muchanan ta wordo afecta door di e spirito di rebelion y desobediencia cu a penetra den henter sociedad.”

Droga y Violencia

Tristo pa bisa, pero droga a bira un problema asina grandi na scolnan cu LouAnne Johnson cu ta autora y maestra na Merca a skirbi: “Prevencion di droga ta parti di e programa di scol, desde kleuterklas. [Letternan cursivo ta di nos.] Muchanan sa mas di droga . . . cu mayoria hende grandi.” Tambe el a bisa: “Alumnonan cu no tin confiansa propio, cu ta sinti cu ningun hende no ta stima nan, ta sinti nan nan so, laf of insigur ta esnan cu tin mas chens di experimenta cu droga.”—Two Parts Textbook, One Part Love.

Un maestro na Australia cu yama Ken, a puntra: “Con nos maestronan por educa un mucha di nuebe aña di edad si su mayornan mes a introducie na droga, y cu awor ta adicto?” Michael, di 30 y pico aña, ta duna les na un scol secundario na Alemania. El a skirbi: “Nos sa cu tin bendemento y uzo di droga, pero masha poco bes ta descubri esaki.” Tambe el a comenta riba e falta di disiplina y a bisa cu esaki “ta ser refleha den un tendencia general cu e alumnonan tin di destrui cos.” El a sigui bisa: “Nan ta susha mesa y murayanan, y ta kibra mueblenan. Polis a aresta y interoga algun di mi alumnonan pa motibo di ladronicia den pacus y cosnan por el estilo. No ta nada straño cu frecuentemente tin hortamento na scol!”

Amira ta duna les den e Estado di Guanajuato, Mexico. El a admiti: “Nos ta enfrenta problema di violencia y adiccion na droga den famia cu ta afecta e muchanan directamente. Nan ta completamente rondona y ta ser afecta door di un ambiente den cua nan ta siña palabra sushi y otro bicionan. Un otro problema grandi ta pobresa. Maske educacion ta pornada, e mayornan tin cu cumpra schrift, pen y otro materialnan. Pero cuminda ta na prome luga.”

Arma na Scol?

Na Merca tiroteonan cu a tuma luga resientemente na scolnan ta mustra bon cla cu violencia relaciona cu arma no ta un problema chikito den e pais ei. Un informe ta bisa: “Nan ta calcula cu 135.000 arma ta ser hiba na e 87.125 scolnan publico di e nacion aki tur dia. Pa reduci e cantidad di armanan na scol, oficialnan ta uza aparatonan pa detecta arma, camaranan, cachonan specialmente entrena pa busca arma, razia den lockernan, uzo di carnet pa identificacion, y a prohibi uzo di tas.” (Teaching in America) Tal medidanan di siguridad ta pone hende puntra: Ta di kico nos ta papiando, di scol of prizon? Tambe e informe ta bisa cu nan a kita mas cu 6.000 alumno for di scol door cu nan a bai scol cu arma!

Iris, un maestra na e stad di New York, a bisa Spierta!: “E alumnonan a smokkel arma drenta scol cu ne. E aparatonan pa detecta metal no ta stroba e armanan di drenta. Vandalismo na scol ta un otro problema grandi.”

Maestronan conciente tin cu lucha contra di e ambiente di anarkia aki pa duna mucha educacion y siña nan balornan. Nada straño cu hopi maestro ta sufri di depresion y agotamento. Rolf Busch, presidente di e Asociacion di Maestronan na Thuringia, Alemania, a bisa: “Casi un tercera parti di e un miyon maestro na Alemania ta bira malo pa motibo di stress. Nan ta sinti nan agota ora nan ta trahando.”

Muchanan Cu Ta Haya Baby

Un otro problema grandi ta actividad sexual di adolecentenan. George S. Morrison, cu a skirbi e buki Teaching in America, ta bisa di e pais ei: “Mas o menos 1 miyon teenager (11 porshento di mucha mohe entre 15 pa 19 aña) ta sali na estado tur aña.” Di tur e paisnan desaroya, Merca tin e porsentahe mas halto di embaraso di teenager.

Iris a confirma e asunto aki ora el a bisa: “E topico cu adolecentenan ta papia mas di dje ta relacion sexual y fiesta. E cos aki ta un obsesion. Anto awor nos tin Internet riba computer na scol! Esaki kiermen acceso na gruponan di chat y pornografia.” Angel di Madrid, Spaña, a bisa: “Inmoralidad sexual entre e alumnonan ta un realidad. Nos tawatin caso di alumnonan masha jong cu ta sali na estado.”

“Babysitternan Glorifica”

Un otro keho cu algun maestro tin ta cu hopi mayor no ta asumi nan responsabilidad pa educa nan yiunan na cas. Segun maestronan, mayornan mester ta e prome educadonan di nan yiunan. Bon manera y etica mester cuminsa na cas. Nada straño cu Sandra Feldman, presidente di e Federacion Mericano di Maestro, ta bisa cu ‘mester trata maestronan mas manera otro profesionalnan y menos manera babysitternan glorifica.’

Hopi bes mayornan no ta apoya e disiplina cu nan yiunan ta haya na scol. Leemarys, menciona den e articulo anterior, a bisa Spierta!: “Si bo hiba e muchanan delincuente cerca e cabes di scol, bo por conta cu e mayornan ta bai contra bo!” Relaciona cu e manera pa trata cu alumnonan problematico Busch cu ya a ser menciona caba a bisa: “Educacion den famia ta disparciendo. Bo no por asumi mas cu mayoria mucha ta bin for di famianan cu a cria nan di un manera rasonabel y bon.” Estela, di Mendoza, Argentina, a bisa: “Como maestro nos tin miedo di e alumnonan. Si nos duna nan un mal punto, nan ta tira nos cu piedra of ta ataca nos. Si nos tin un auto, nan ta haci daño na dje.”

Ta algo straño cu den hopi pais tin un scarsedad di maestro? Vartan Gregorian, presidente di e Corporacion di Carnegie di New York, a adverti: “Nos scolnan [Mericano] ta bai tin mester di mas cu 2,5 miyon maestro nobo durante e siguiente decada.” Stadnan grandi “ta druk bezig buscando maestronan for di India, Islanan di Antiya, Sur Africa, Europa y di cualkier otro caminda cu por haya bon maestro.” Naturalmente esaki lo por tin como resultado cu e areanan ei lo haya nan cu un scarsedad di maestro.

Pakico Tin Scarsedad di Maestro?

Yoshinori, un maestro di scol Hapones cu tin 32 aña di experencia, a bisa cu “duna les ta un trabou noble cu un bon motibo su tras, y e ta un trabou hopi respeta den sociedad Hapones.” Lamentablemente, esaki no ta e caso den tur cultura. Gregorian, cita anteriormente, tambe a bisa cu maestronan “no ta haya respet, reconocemento y compensacion como profesional. . . . Den mayoria estado [na Merca], maestronan ta ser paga menos compara cu cualkier otro trabou cu ta rekeri un estudio universitario.”

Ken Eltis, cita na principio, a skirbi: “Kico ta pasa ora maestronan ta descubri cu hopi otro trabou cu ta rekeri hopi menos educacion ta substancialmente miho paga? Of kico ta pasa ora cu alumnonan cu nan a duna les diesdos luna pasa . . . ta gana mas placa cu nan aworaki of cu nan lo gana despues di un periodo di cinco aña? Ora maestronan ripara esaki, sigur e ta afecta nan sintimento di balor propio.”

William Ayers a skirbi: “Maestronan ta mal paga . . . Como promedio nos ta gana un cuart di loke abogadonan ta ser paga, mita di loke un accountant ta gana, menos cu un chauffeur di truck y un astiyero. . . . No tin ningun otro profesion cu ta exigi asina tanto y ta ricibi asina poco compensacion financiero.” (To Teach—The Journey of a Teacher) Na luna di november 2000, Janet Reno, exconsehero legal Mericano, a bisa tocante e mesun topico: “Nos por manda hende luna. . . . Nos ta paga nos atletanan sumanan grandi di placa. Dicon nos no por paga nos maestronan?”

Leemarys a bisa: “Por lo general maestronan ta mal paga. Cu tur mi añanan di estudio, ainda mi ta gana solamente un salario abou pa aña, aki na e stad di New York, un luga yen di stress y complicacionnan.” Valentina un maestra di St. Petersburg, Rusia, a bisa: “Pa loke ta trata entrada, e trabou di un maestro no tin masha balor. E pago semper tawata bou di e salario minimo.” Marlene di Chubut, Argentina, ta sinti e mesun cos: “Salario abou ta forsa nos traha na dos of tres luga, coriendo di un luga pa otro. Esaki berdaderamente ta reduci nos efectividad.” Arthur un maestro di Nairobi, Kenia, a bisa Spierta!: “Cu un economia cu ta bai atras, mi bida como maestro no ta facil. Manera hopi di mi coleganan lo admiti, salario abou semper a desanima hende di scohe nos profesion.”

Diana un maestra na e stad di New York, a keha cu e hopi trabou cu papel ta tene e maestronan ocupa pa oranan largo. Un keho cu tur tawatin ta: “Henter dia papel aki papel aya cu ta tene man.”

No Tin Suficiente Maestro, Anto Mucho Hopi Alumno

Berthold di Düren, Alemania, a menciona un otro keho cu ta bini padilanti regularmente: “E klasnan ta mucho grandi! Akinan algun tin mas cu 34 alumno. Esaki ta nifica cu nos no por presta atencion na e alumnonan cu tin problema. Nan ta ser ignora. Necesidadnan individual ta wordo neglisha.”

Leemarys cita anteriormente a splica: “Aña pasa fuera di e echo cu mayornan ta indeferente, mi problema di mas grandi tawata cu mi tawatin 35 alumno den mi klas. Imagina bo ta purba traha cu 35 mucha di seis aña di edad!”

Iris a bisa: “Aki na New York tin un scarsedad di maestro, specialmente di wiskunde, natuurkunde y scheikunde. Nan por haya un miho trabou otro caminda. Pesei, e stad a busca hopi maestro stranhero.”

Claramente, duna les ta un trabou cu ta exigi hopi di un persona. Pues anto kico ta mantene un maestro motiva? Dicon nan ta sigui y ta persevera? Nos ultimo articulo lo contesta e preguntanan aki.

Komentario na pagina 9]

Nan ta calcula cu na Merca 135.000 arma ta ser hiba scol tur dia

[Cuadro/Plachi na pagina 10]

Kico Ta Haci un Maestro Exitoso?

Con lo bo describi un maestro exitoso? E ta un persona cu por desaroya e memoria di un mucha di tal manera cu e por ripiti echonan y pasa test bon? Of e ta un persona cu ta siña bo analisa, pensa y rasona? Of e ta un persona cu ta yuda mucha bira un miho ciudadano?

“Ora nos como maestro ta reconoce cu nos ta partner di nos alumnonan den e biahe largo y complica di bida, y cuminsa trata nan cu e dignidad y e respet cu nan merece como hende, e ora ei nos ta riba e caminda pa bira maestronan balioso. E ta masha facil y masha dificil a la bes.”—To Teach—The Journey of a Teacher.

Un bon maestro ta reconoce kico cada alumno por y sa con pa hacie progresa. William Ayers a comenta: “Nos mester haya un miho manera, un manera cu ta edifica riba puntonan fuerte, experencia, habilidad y capasidad . . . Esei ta haci mi corda e suplica di un mayor Mericano nativo kende su yiu homber di cinco aña a ser tilda como un ‘siñado lento’: ‘Wind-Wolf sa nomber di mas cu cuarenta parha y e rutanan cu nan ta bula. E sa cu aguila tin diestres pluma na su rabo cu ta balans’e perfectamente. Loke e tin mester ta un maestro cu sa kico e por.’”

Pa saca lo miho for di cada mucha, e maestro mester descubri loke ta interesa y motiva e mucha y loke ta pone e mucha pensa y comporta su mes di cierto forma. Y un maestro dedica mester stima mucha.

[Reconocemento]

United Nations/Photo by Saw Lwin

[Kuadro na pagina 11]

Siñamento Semper Mester Ta Algo Dibirtido?

E maestro, William Ayers, a traha un lista di pensamento robes cu tin en cuanto dunamento di les. Un di nan ta: “Bon maestronan ta haci siñamento un cos dibirtido.” E ta sigui bisa: “Dibirticion ta distrae y entretene. Payaso ta entretene hende. Chiste por ta dibirtido. Siñamento ta algo cu ta envolve bo, absorba bo, sorprende bo, desorienta bo, y hopi bes sumamente agradabel. Si e ta dibirtido, ta bon. Pero no cu e mester ta dibirtido.” Tambe el a bisa: “Pa un hende duna les e tin mester di un variedad amplio di conocemento, habilidad, capasidad, discernimento y comprendemento—y mas importante ainda, e ta rekeri pa e ta un persona bondadoso cu ta mustra interes.”—To Teach—The Journey of a Teacher.

Sumio di e stad di Nagoya, Hapon, a ripara cu su alumnonan tin e siguiente problema: “Hopi alumno di scol secundario no ta interesa den nada otro cu dibirti nan mes y haci loke no ta rekeri ningun esfuerso.”

Rosa, consehero di studiante na Brooklyn, New York, ta bisa: “E actitud general di alumnonan ta cu siña ta laf. E maestro ta laf. Nan ta pensa cu tur cos mester ta dibirtido. Nan no ta comprende cu loke bo ta saca for di siñamento ta depende di e esfuerso cu bo ta haci pa siña.”

E obsesion cu mucha jong tin pa dibirticion ta pone cu ta dificil pa nan haci esfuerso y sacrificio. Sumio, cita ariba a bisa: “E problema ta cu nan no por discerni kico lo influencia nan futuro. Tin masha poco alumno di scol secundario cu ta pensa cu si nan traha duro pa algo aworaki, esei lo beneficia nan den futuro.”

[Plachi na pagina 7]

DIANA, MERCA.

[Plachi na pagina 8]

‘Bendemento y uzo di droga ta comun pero masha poco e ta ser descubri.’—MICHAEL, ALEMANIA

[Plachi na pagina 8, 9]

“Nos ta enfrenta problema di violencia y adiccion na droga den famia.”—AMIRA, MEXICO

[Plachi na pagina 9]

‘Mester trata maestronan mas manera otro profesionalnan y menos manera babysitternan glorifica.’—SANDRA FELDMAN, PRESIDENTE DI E FEDERACION MERICANO DI MAESTRO