Un Refugio Unico pa Fauna di Mediteraneo

DI E CORESPONSAL DI SPIERTA! NA SPAÑA

P A MILES di aña, paisnan a lo largo di Lama Mediteraneo a rosa nan mondinan, laga bestia come tur yerba di sabana y a yag riba algun bestia di mondi te casi caba cu nan. Tin masha poco area den e region ei cu ainda ta den nan condicion natural. Sinembargo, den un parti di Spaña, debi na un combinacion di sircunstancia un area chikito a sobrevivi casi intacto. Su nomber ta Monfragüe, cu ta nifica “Sero Impenetrabel.”

Pero e isolacion di e parti aki di Spaña so lo no tawata basta pa proteha su naturalesa. Afortunadamente, e cunukeronan cu tawata biba den e region rond di Monfragüe a practica un metodo di crio di bestia cu a resulta sumamente balioso pa conserva un pida precioso di e terenonan extenso di selva nativo cu un tempo tawata cubri e ceronan di Mediteraneo. E mondi conserva tawata conoci como dehesa, es decir, “sabana di palo.”

Un Metodo Ecologico di Crio di Bestia

Siglonan pasa e cunukeronan di Extremadura (e region di Spaña caminda Monfragüe ta situa) a descubri cu e mondinan di palo di eik semperberde cu ta cubri e pais por duna nan tounan bon sombra y cuminda.a Pesei en bes di kap tur palo pa haya tereno pa e tounan come yerba, nan a conserva suficiente palo di eik pa crea un mondi di palo grandi cu seccionnan habri di sabana. Tambe nan a snui e palonan pa stimula nan takinan pa span. E sombra di e palonan di eik impresionante aki a proteha e sabana di yerba bou di nan, y e abundancia di fruta cu nan ta produci ta percura cuminda nutritivo pa baca y porco. Como cu e dehesa aki a conserva un parti importante di su palonan original, hopi sorto di parha y bestia nativo a logra sobrevivi.

Tin dos riu cu ta forma kloof y ta crusa door di e dehesa, Tajo y Tiétar, y ta topa bou di e top di Sero Monfragüe. Finalmente na 1979, e area di mondi y baranca cu ta na rand di e dos riunan aki y cu a conserva e selva Mediteraneo original miho cu na cualkier otro parti, a bira un parke natural. Nan a hacie un parke pasobra actualmente nan ta considera Monfragüe un di e refugionan miho conserva di e ecosistema di Mediteraneo.

Parhanan di Bijbel

Aunke e parke ta cubri un area relativamente chikito, e ta percura un refugio pa genet (un bestia cu parce pushi), bina comun, porco salbahe y e lynx Spaño, un di e mamiferonan cu ta masha dificil pa haya mira y cu ta core peliger grandi di ser extermina na Europa. Sinembargo, siendo cu mayoria di e bestianan aki ta bestia djanochi, un bishitante di den dia tin mas chens di mira e parhanan yagdo magnifico cu tin na abundancia den e area. Mayoria di e parhanan yagdo aki di Mediteraneo ta tambe parha tipico di paisnan di Bijbel.

Meimei di siglo 19, e naturalista H. B. Tristram a ripara cu casi tur caminda cu el a bishita den Palestina, e tawata mira buitre (vale gier) ta zweef rond den laira. Mescos ta pasa na Monfragüe, caminda tin 400 par cu neishi den e seronan stijl di baranca cu ta ofrece bista riba e riunan Tajo y Tietar. Na fin di dia, decenas di buitre ta bula den circulo riba nan neishi cu nan ta comparti, y shelo ta keda tur pinta cu nan siluetanan inmenso.b

Ooievaarnan blanco cu ta traha nan neishi riba edificionan bieu den hopi parti di Europa, ainda ta traha neishi den e palonan di eik den e area di Monfragüe, caminda nan ta aumenta. (Salmo 104:17) Otro parha cu hunto cu e ooievaar ta haci uzo di e columnanan di aire cayente cu ta subi bai laira, ta aguila imperial y aguila real (keizersarend y goudarend). Cu pasenshi nan ta zweef y laga e aire hiba nan laira, constantemente en busca di prooi cu nan ta ‘mira djaleu.’—Job 39:27-29.

Mas agil y abundante cu e aguilanan ta un tipo di falki rode wouw, cu durante zomer ta bira masha hopi. Tambe tin e zwarte wouw cu tin un bista skerpi y cu constantemente ta patruya e riunan di e parke, semper en busca di pisca cu e ta cohe for di den awa.—Job 28:7.

Otro parhanan yagdo, manera shoco real y shoco comun (oehoe y kerkuil), ta cuminsa bula ora ta birando anochi. E shoco real ta traha neishi riba e barancanan stijl isola di Monfragüe, un habitat paresido na e ruinanan desola di antiguo Babilonia, caminda Isaias a profetisa cu e shoco lo forma su cas.—Isaias 13:21.

Ta Conserva y Restaura e Refugio

Flor di mondi ta duna e parke un aparencia colorido, specialmente den lente. E flornan blanco delicado di e rosa di baranca, compaña pa flornan biña di mata di lavendel, ta cubri practicamente tur bariga di sero cu no tin palo. Y segun cu zomer ta acerca, matanan di amapola (papaver) cu ta tur caminda ta agrega un toke cora na e sabananan berde.

E interes principal di e autoridadnan di e parke ta pa conserva e habitat precioso aki. Pa logra esei, nan ta bezig ta planta matanan nativo pa remplasa e palonan di pino y eucalipto cu hende a introduci y cu no ta beneficia e parke su fauna. Tambe nan ta coopera cu cunukeronan local pa proteha e dehesanan cu tin rond di e parke, animando nan pa bolbe planta palo di eik ki ora cu ta necesario. Ta di spera cu e medidanan aki lo garantisa e sobrevivencia di e refugio unico aki pa fauna di Mediteraneo.

[Nota]

[Plachinan na pagina 16, 17]

Di robes pa drechi: Baca ta come yerba den sabana habri cu palo di mondi, un genet y un bina

[Plachi na pagina 18]

Buitre preto

[Plachi na pagina 18]

Shoco real

[Plachi na pagina 18]

Aguila real

[Reconocemento]

Fotos: Cortesía de GREFA