Number y Bo Bida

NUMBERNAN tin un nificacion secreto? “Claro cu si!” tin hende ta core bisa, y nan ta menciona un ehempel interesante: e atakenan terorista cu a tuma luga dia 11 di september 2001.

Un experto di numerologia a bisa: “For di momento cu mi a tende e noticia, mi a tuma nota di e fecha: 11-9-2001.” Expertonan di numerologia generalmente ta considera number 11 como un di e “numbernan maestro.” Pesei fanaticonan di numerologia a compila un lista di varios punto relaciona cu e atake terorista cu ta señala na e “number maestro” 11. At’aki djis un parti di loke nan a haya:

■ E tragedia a sosode riba e fecha 11/9. . . . 1 + 1 + 9 = 11.

■ 11 di september tawata e di 254 dia di aña. . . . 2 + 5 + 4 = 11.

■ E avion cu a dal den e toren nort tawata Buelo 11.

■ E buelo ei tawatin 92 persona abordo. . . . 9 + 2 = 11.

■ E avion cu a dal den e toren suit tawatin 65 pasahero. . . . 6 + 5 = 11.

■ Twin Towers tawata parce number 11.

■ E expresion Ingles “New York City” tin 11 letter.

Numerologia—e practica di duna nificacion special of mistico na cifra, combinacion di cifra y totalnan di number—ta comun na Africa, Asia y America. Dicon hende ta ser atrai na esei? Segun un Web site, e practica di descifra e letternan di alfabet cu tin den nomber—un aspecto popular di numerologia—“ta duna informacion exacto di un hende su personalidad, caracter, cualidadnan y faltanan.” E fuente aki ta bisa cu un analisis di nos “fecha di nacemento ta revela nos rumbo di bida, cu tur su gosonan y experencianan doloroso.”

E loke nan ta pretende aki ta cierto? Of lo por tin peligernan scondi den studia number pa motibonan sobrenatural?