E Atraccion di Number Mistico

IMAGINA bo un mundo cu no ta uza number. Lo no tin placa. Comercio lo keda limita na transaccionnan cara cara. Y kico di deporte? Sin number, nos lo no por tene scor ni bisa cuanto hungado mester tin den cada team!

Sinembargo, fuera di e echo cu numbernan ta practico, tin hende ta considera cu nan tin cualidadnan misterioso. Esaki ta pasobra number no ta algo concreto. Bo no por mira, mishi ni fula number. Por ehempel: un apel tin su colo, textura, tamaño, forma, holo y sabor unico. Door di cada un di e rasgonan aki bo por haya sa si un cierto obheto realmente ta un apel, un lamunchi, un bala of algo otro. Pero un number no ta asina. Kisas e unico cos cu un coleccion di shete articulo tin en comun cu un otro coleccion di shete articulo ta e echo cu nan ta shete. Pues, pa comprende e nificacion di number—por ehempel, pa distingui e diferencia entre seis cu shete—ta nifica comprende algo masha teoretico. Y ta esaki ta pone hende specula cu posiblemente numbernan tin un nificacion of poder misterioso.

Di Pitagoras te na Ciencia Falso

Den comunidadnan antiguo tawata comun pa hende duna nificacion special na number. Pitagoras, un filosofo y matematico Griego cu a biba un 600 aña prome cu nos era, a siña hende cu bo por analisa tur cos segun patronchi di number. E cu su disipelnan a rasona cu henter universo ta un ehempel di ordo y proporcionnan balansa. Pues anto, no ta posibel cu den tur cos material tin un relacion matematico fundamental?

For di tempo di Pitagoras, hende a uza interpretacion di number pa haci pronostico, splica soño y tambe como un yudansa pa corda cos. Griegonan, moslemnan y miembronan di cristiandad tur a uza interpretacion di number. Hudiu di e secta cabala a uza un sistema di numerologia cu yama gematria. Nan a asigna un number na cada un di e 22 letternan di alfabet Hebreo y nan a pretende cu mediante esei nan a descubri codigonan secreto den e Scritura Hebreo.

Numerologia moderno ta casi mescos. Hopi bes nan ta cuminsa cu bo nomber y fecha di nacemento. Nan ta asigna un number na cada letter di bo nomber. Despues cu un experto di numerologia conta e numbernan aki hunto cu e numbernan di bo fecha di nacemento, e ta determina bo numbernan clave. Caba e ta atribui un nificacion special na e numbernan aki, cu segun e, ta duna un descripcion completo di bo: bo personalidad, bo deseonan inconciente, bo destino, etcetera.

Podise e loke realmente ta haci numerologia atractivo ta cu e analisis ta parce masha exacto. Edward Albertson a skirbi den su buki Prophecy for the Millions (Profecia pa Miyones di Hende): “Hopi hende a cuminsa kere den numerologia ora nan a ripara con e numbernan ta cuadra casi precis cu e caracter di personanan cu nan a analisa a base di e numbernan aki.” Sinembargo, numerologia a ser cataloga tambe como un ciencia falso. Dicon? Tin motibo pa bo duda di su pretencionnan?

[Cuadro/Plachinan na pagina 5]

BIJBEL TIN MENSAHENAN SCONDI?

Den su buki The Bible Code (Codigo di Bijbel), e reportero Michael Drosnin ta bisa cu uzando un computer pa analisa e Scritura Hebreo, el a descubri mensahenan scondi. Segun Drosnin, e “codigo” a produci e palabranan “asesino cu lo asesina” hunto cu e nomber Yitzhak Rabin—y el a haya e mensahe aki un aña prome cu nan a asesina e prome minister Israeli Rabin.

Manera por a spera, e buki The Bible Code a crea basta controversia. Dave Thomas, un matematico y experto di natuurkunde, a demostra cu si bo uza un computer pa analisa cualkier texto skirbi, lo bo haya loke ta parce mensahenan secreto. Analisando e mesun texto cu Drosnin a examina, Thomas a haya e palabranan “codigo”, “kens” y “engaño.” Segun Thomas: “Bo por haya mensahe scondi tur caminda, basta bo ta dispuesto na inverti tempo y esfuerso pa busca resultado for di e inmenso campo di probabilidad cu tin.”

Un computer, cu su capasidad di conta bai gol, muy probablemente lo haya algun combinacion di letter cu un hende lo por uza como un sorto di pronostico. Pero esaki ta simplemente coinsidencia y no ta duna prueba cu Bijbel ta contene mensahe scondi.a

[Nota]

[Plachi na pagina 4]

Pitagoras a siña hende cu tur cos tin un patronchi di number

[Reconocemento]

Cortesia di National Library of Medicine