Bo Mester di Bo Soño!

Ken lo no ta di acuerdo cu un bon sosiego anochi ta un factor esencial pa mantene bon salu? Pero toch hopi hende no ta worry masha cu drumimento. “Ma e siguiente dia bo ta sufri e consecuencianan”, segun Shawn Currie, psicologo y profesor asistent na Universidad di Calgary na Canada. Ora bo no drumi suficiente bo tin hopi chens di lanta cu mas mal beis y tin biaha asta deprimi.

E corant Calgary Herald a bisa: “Cientificonan ta kere cu drumimento tin e funcion di refresca e celebro, y cu durante bo soño bo ta sigui siña.” Profesor Currie a remarca: “Anochi bo ta fortalece bo recuerdonan, y tur loke bo a siña den dia ta ser poni na nan luga anochi. Eigenlijk, un hende cu no tin e periodo ei di sosiego no por siña na drechi.” Ademas, el a bisa cu “ora bo drumi suficiente, esei probablemente ta yuda bo stabilisa bo emocionnan.”

Pues anto, cuanto bo tin cu drumi pa ta suficiente? Aunke hopi experto ta duna ocho ora como un regla general, Currie a bisa: “Cada hende su necesidad di soño ta diferente.” Pesei e ta sugeri pa purba logra un soño di calidad, es decir, un soño profundo y trankil. Pero con hende por logra esaki, specialmente esnan cu no por drumi anochi? At’aki algun sugerencia:

◼ Dal un baño cu awa lou prome cu bo bai drumi.

◼ Haci ehercicionan modera varios biaha pa siman; pero no haci ehercicio pisa prome cu ora di drumi.

◼ Tene bo camber keto, scur y un tiki fresco.

◼ Purba lanta tur mainta na e mesun ora pa asina bo establece un ritmo regular di drumi.

Ya cu ta proba cu un bon soño ta beneficia bo salu, sea prudente y dun’e e debido importancia.