Bailarinnan cu Pluma Briyante

DI E CORESPONSAL DI SPIERTA! NA KENIA

HOPI lawai. Gritamento nonstop y excita ta resona riba superficie di e lago aisla. Miles di parha ros ta cana den e awanan briyante, berde bibo. Den laira, shelo tur dorna cu hopi di nan ta un delicia pa bista. Segun cu nan ta bira y drei rond riba e lago y ta bati nan halanan largo y fini, partinan cora bibo bou di nan hala ta bira visibel. E cantidad inmenso di parha, cu nan colo briyante, ta masha impresionante! Pa loke ta trata parha, esaki probablemente ta e maraviya mas grandi na mundo: e flamingonan ros di e Gran Rift Valley di Africa.

Pianan Largo y Elegante

For di antiguedad hende a admira flamingo pa su estatura bunita y fini. Nan a graba imagennan di e parha garganta largo riba piedra y tambe den e hieroglifnan Egipcio. E parha su aparencia tawata masha peculiar y a ser admira asina tanto cu e Egipcionan a vener’e como personificacion di e dios Ra. Pinturanan primitivo den cueba tambe ta presenta flamingo cu su garganta curva y delega y pianan fini y elegante.

Awe nos por haya cuater sorto di flamingo den areanan di Africa, Caribe, e continente di Europa y Asia, y Sur America. Flamingo chikito ta esun di menos estatura. Su colonan ta bunita, su plumanan ta ros scur y su pianan ta cora bibo. Flamingo grandi of chogogo ta dos biaha e tamaño di e flamingo chikito y ta bira 1,40 meter halto. Tur flamingo tin un caracteristica en comun: e pik cu na mita ta curva bai abou, creando un bunita bista.

P’e flamingo cuminsa bula, e ta bati su halanan elegantemente y ta core door di awa riba su pianan agil, pa e haya e empuhe cu e mester pa e subi bai laira. Cu su garganta largo y cabes stret dilanti y su pianan manda stijf patras, e ta bula elegantemente den laira. Segun calculo tin cuater miyon flamingo ta biba den e Gran Rift Valley di Africa.

Parha Delicado, Ambiente Inhospitalario

E cantidad inmenso di flamingo cu ta habita Rift Valley ta bai bon den e cadena di lago di soda realmente unico den nan sorto. E awa tin asina tanto carbonato sodico (natriumcarbonaat) cu ora bo mishi cu ne e ta manera azeta y ta kima bo cuero levemente. Temperatura rond di e lagonan di soda di Rift Valley por subi te na 65 grado Celsius. E awa ta scuma y manda un holo fuerte di sulfur y salpeter cu ta keda colga den e aire cayente. E awa tin un consentracion asina halto di componentenan alcalino y salo, cu nan ta cristalisa forma un casca blanco a lo largo di e costa.

Masha poco criatura por biba den awa acido asina. Sinembargo, tin algun criatura hopi chikito cu ta sobrevivi den dje: zeewier microscopico colo blou berde. E calor di solo tropical ta keinta e awa alcalino, creando condicionnan ideal pa e zeewier crece na gran cantidad. E consentracion di zeewier ta asina halto cu nan ta pone e awa di e lago bira berde. Mescos cu piedranan di esmeralda den un coyar fini, asina e cadena di lagonan di soda ta dorna e vaye- y seronan cu ta core a lo largo di e Gran Rift Valley.

Ta remarcabel con un criatura delicado manera flamingo por existi den un ambiente asina inhospitalario y desfaborabel. Sinembargo t’aki e ta rende. Su pianan fini ta resisti e awanan acido, y e zwemvlies na su pia ta evita cu e ta sink den e lodo suave y pegapega. Flamingo chikito ta hopi bon ekipa pa biba den e ambiente desfaborabel aki. Den su pik e tin un tehido fini cu por chupa y sefta e micro organismonan cu ta consentra den e prome 5 pa 7 centimeter di e capa di awa. Ora e flamingo ta come e ta tene su pik cabes abou, cu e punta manda patras djis bou di superficie di awa. Cu su lenga e ta chupa awa aden y ta push’e afo door di e tehido cu ta filtra e awa y keda cu e organismonan microscopico.

Ceremonianan Colorido pa Busca Pareha

Ora solo di mainta sali riba e awanan berde y briyante di e lago, ta como si fuera a hala un cortina grandi. E lus colo di oro ta revela un trupa inmenso di flamingo cu ta briya mescos cu vlam di candela riba superficie di e lago. E parhanan ta gepak riba otro. Esnan cu ta duna show pa busca pareha ta marcha na grupo cu nan garganta stret, y nan ta zuai nan pik di un banda pa otro.

Segun cu gruponan di parha ta marcha pasa banda di otro den direccion contrario, solo ta refleha riba e plumanan delicado di e parhanan, formando un cuadro di varios contraste di colo cora y ros. E parhanan ta bula bula rond y baila, habriendo nan halanan completamente pa mustra e plumanan cora bibo di nan hala. Como si fuera bromando cu nan colonan vibrante, nan ta core door di e awa y cuminsa bula mes, pa djis despues nan bolbe aterisa y ripiti e ritual. E flamingonan ta asina gepak riba otro cu esnan meimei no por cuminsa bula prome cu esnan na rand di e trupa bula bai. Nan ta grita y saca zonido tur excita, produciendo un bochincha di otro mundo.

Anto diripiente un dia, despues cu bira scur, e parhanan ta lanta buelo masalmente y bula bai. Nan ta bula den filanan largo of forma di V pa cientos di kilometer te ora cu nan yega nan destinacion: un lago di soda cu ta ideal pa traha neishi y cria nan yiunan. Un cos straño ta cu e migracion aki ta sosode pareu cu esun di otro flamingonan na otro lagonan di soda di Rift Valley.

Di Mahos pa Bunita

Flamingo ta scohe pa traha nan neishi den lagonan cu ta hopi aisla y dificil pa yega na dje. Ta importante pa nan ta aisla asina, ya cu e colonia di neishi ta sumamente delicado. Si molestia e mayornan, nan por bandona nan webonan sin bolbe nunca mas.

E colonia di neishi tin masha hopi actividad. Cu gran excitacion mayornan ta cuminsa traha neishi. Nan ta dobla nan garganta largo, y cu nan boca nan ta coi lodo, pupu di parha y un par di pluma pa traha un serito di 40 centimeter halto cu forma di cone. Riba e top nan ta forma un hol chikito cu ta proteha e webo for di awa y alcalino. Nan ta pone un solo webo. Poco despues cientos di miles di puyito ta cuminsa brui. Un cantidad inmenso di mayor ta bula bai y bini na e sitio, ocupa cu e trabou agotador di alimenta y cuida nan puyitonan hambra.

Anto ora e yiunan ta suficiente grandi pa cana, e mayornan di un dia pa otro ta laga nan y bula bai na un otro parti di e lago, caminda tin mas tanto zeewier blou berde. Einan, leu for di nan yiunan exigente, nan lo por come y restaura nan energia. Un par di parha adulto cu a keda atras ta reuni e numeroso yiunan hunto manera den un crèche. Bou di e cuido atento di e parhanan adulto aki, e hobennan bochinchero ta ser dirigi atrabes di e saliñanan di salu te ora nan bolbe topa cu nan mayornan. Sorprendentemente, den tur e confusion aki, cada mayor ta logra reconoce su yiu y sigui cuid’e.

E puyitonan ta mahos y no parce nan mayornan bunita den casi nada. Nan garganta y pianan ta cortico, nan pik ta recht y nan plumanan ta gewoon colo blanco. Despues di poco tempo nan pianan cortico ta cuminsa crece, nan garganta ta cuminsa rek y haya curva, y nan pik ta cuminsa dobla bai abou, hayando e forma delicado y tipico pa flamingo. Ta dura un dos pa tres aña prome cu e puyito mahos bira un bunita flamingo cu pluma briyante. E ora ei lo e busca su pareha y join e trupanan grandi di flamingo ros cu ta duna e lagonan di soda di Rift Valley un bista asina maraviyoso.

E flamingo su elegancia y bunitesa ta un ehempel asombroso di diseño inteligente. Observando e bunita criatura aki den naturalesa ta un placer pa nos bista y oido. Pero mas cu esei, e ta profundisa nos aprecio y amor pa su maraviyoso Creador, Yehova Dios.

[Plachi na pagina 17]

Flamingo grandi

[Plachi na pagina 17]

Flamingo chikito

[Plachinan na pagina 18]

E puyitonan no parce nan mayornan bunita den casi nada