E Punto di Bista Biblico

Tin un Pica Impordonabel?

TIN un castigo mas piyo cu morto? Si, morto sin e speransa di haya un resureccion pa motibo di un pica impordonabel. Hesus a bisa cu tin un tipo di pica cu “lo no wordo pordona.”—Mateo 12:31.

Sinembargo, Bijbel ta mustra cu Dios ta dispuesto pa pordona. Aunke hende kisas ta inclina na carga rencor y keda sin pordona, Dios si ‘ta pordona abundantemente.’ (Isaias 55:7-9) De echo, Dios a haci un gran sacrificio mandando su Yiu stima na mundo pa e sirbi como un sacrificio asina balioso cu esei por kita nos picanan.—Huan 3:16, 17; Echonan 3:19; 1 Huan 2:1, 2.

Na Dios su debido tempo lo e resusita hopi hende cu tawata culpabel di picanan grave pero cu lo no ta responsabel mas pa loke nan a haci den pasado. (Echonan 24:15; Romanonan 6:23) De echo, Hesus a bisa cu “tur pica y blasfemia lo wordo pordona”, cu excepcion di e pica impordonabel. (Mateo 12:31) Pesei kisas bo ta puntra bo mes: ‘Kico lo por ta asina teribel cu Dios lo no por pordona?’

Ora No Ta Posibel Mas pa Repenti

Hesus su spiertamento a referi na “blasfemia [delibera y boluntario] contra e spirito.” Un hende no ta wordo pordona pa e tipo di pica aki. “Ni den e siglo aki, ni den e siglo cu ta bin”, Hesus a agrega. (Mateo 12:31, 32) Esnan culpabel di e pica ei lo no ser resusita.

Kico ta blasfemia contra e spirito? Esei ta sali di curason, y ta revela un actitud y intencion malicioso. E intencion delibera pa bai contra e spirito santo di Dios ta haci e pica aki mas grave. Pa ilustra esaki: Den algun parti di mundo, lei ta haci un distincion entre asesinato den prome grado y asesinato den segundo grado a base di e intencion y e manera cu e asesinato a ser cometi. Pena capital (castigo di morto) ta solamente pa asesinato intencional of premedita.

Apostel Pablo tawata antes un blasfemado, pero el a bisa: “Mi a haya misericordia, pasobra mi a actua ignorantemente.” (1 Timoteo 1:13) Peca contra spirito santo ta nifica bai contra dje deliberadamente. E ta encera un curason malbado cu ta yega na un punto caminda no ta posibel pa bira bek.

Evidentemente Pablo tawata referi na e tipo di pica aki ora el a skirbi: “Den caso di esnan cu un tempo a wordo ilumina y cu a purba e don celestial, y cu a bira participantenan di spirito santo, y cu a purba e bon palabra di Dios y e podernan di e siglo cu ta bin, y despues a cai, ta imposibel pa trece nan bek na repentimento.” (Hebreonan 6:4-6) Tambe e apostel a bisa: “Si nos sigui peca boluntariamente despues di a ricibi e conocemento di e berdad, no ta keda sacrificio pa pica mas.”—Hebreonan 10:26.

Tawata e conducta di algun lider religioso den Hesus su tempo cu a pon’e duna e spiertamento contra e pica impordonabel. Pero nan no a haci caso di su spiertamento. De echo, nan a laga mat’e. Despues nan a tende evidencia innegabel cu spirito santo a haci algo milagroso. Nan a haya e noticia cu Hesus a ser lanta for di morto! No tawatin ningun duda cu Hesus tawata e Cristo! Pero toch nan a actua cu malicia contra spirito santo door di paga e soldanan Romano pa nan gaña tocante e resureccion di Hesus.—Mateo 28:11-15.

Spiertamento pa Cristiannan Berdadero

Pakico cristiannan berdadero ta tuma e spiertamento tocante e pica impordonabel masha na serio? Pasobra aunke nos tin conocemento exacto di Dios y di e actividad di su spirito, nos lo por desaroya un curason malbado. (Hebreonan 3:12) Nos mester tene cuidou pa nos no pensa cu nunca esaki lo por pasa cu nos. Tuma por ehempel Hudas Iscariot. Un tempo e tawata un fiel siguido di Hesus. El a ser scohe como un di e 12 apostelnan, kiermen e mester tawatin bon cualidad. Pero na dado momento el a cuminsa laga pensamento- y deseonan malbado desaroya den dje, y cu tempo eseinan a domin’e. Durante e tempo cu e tawata testigo di e milagernan increibel di Hesus, e tawata horta placa. Anto pa placa, el a traiciona e Yiu di Dios concientemente.

Algun hende cu un tempo tawata cristian fiel, deliberadamente a bira lomba pa Dios, podise debi na rencor, orguyo of golosidad, y awor nan ta apostata cu ta lucha contra e spirito di Dios. Deliberadamente nan ta bai contra loke ta bisto cu e spirito ta logrando. E personanan aki a comete e pica impordonabel? Ta Yehova ta e Hues final.—Romanonan 14:12.

En bes di husga otro hende, ta bon pa nos vigila nos mes pa nos no comete pica den secreto cu pocopoco por haci nos curason duro. (Efesionan 4:30) Un cos cu ta consola nos ta e echo cu Yehova lo pordona nos abundantemente—asta si nos a comete picanan serio—basta nos repenti.—Isaias 1:18, 19.

[Plachi na pagina 14, 15]

Algun Farizeo a comete e pica impordonabel