“Un Crimen Hopi Baho”

MARIAa a bira prostituta ora e tawatin 14 aña. El a cuminsa cu e estilo di bida horibel aki riba insistencia di su propio mama. Su mama a bis’e cu e tawata bunita y cu hende homber lo gust’e masha hopi y cu lo e por gana hopi placa. Anochi Maria su mama tawata hib’e na un hotel caminda nan tawata topa hende homber. E mama tawata keda den cercania pa cobra. Tur anochi Maria tawata haci sex cu tres of cuater homber.

Carina di 13 aña, no ta biba mucho leu for di Maria su cas, y e tambe a ser obliga pa practica prostitucion. Mescos cu hopi otro famia cu tawata biba den su comunidad di obreronan di plantacion di sucu, Carina su famia a fors’e bende su curpa y asina aumenta e tiki entrada cu nan tawatin. Estela, kende ta biba den un otro bario, a stop di bai scol na un edad hoben, sin sa skirbi ni lesa, y a cuminsa traha como prostituta riba caya. Anto Daisy tawatin mas o menos seis aña ora cu un di su ruman hombernan a abusa di dje sexualmente; despues hopi mas di e actonan ei di incest a tuma luga cu ne. El a bira prostituta cu 14 aña.

Den hopi parti di mundo e problema di prostitucion di mucha ta un realidad alarmante. E resultadonan ta tragico. Hopi bes mucha cu ta practica prostitucion, sea de bes en cuando of dia aden dia afo, ta meti tambe den criminalidad y uzo di droga. Hopi di nan ta sinti nan mes frustra y indigno, y casi no ta mira ningun posibilidad di scapa di e bida deplorabel cu nan ta hiba.

Personahenan di gran influencia ta reconoce e efectonan desastroso di prostitucion di mucha. Fernando Henrique Cardoso, ex Presidente di Brazil, a declara aptamente: “Prostitucion di mucha ta un crimen hopi baho.” Un corant Brasileño a publica e comentario serio aki tocante prostitucion di mucha: “Paisnan caminda e practica ei ta comun y e ta ser tolera, acepta y asta promove debi na e [placa] cu e ta produci, ta experencia tur dia e daño cu e ta causa. Si e produci cualkier ganashi financiero mes, inevitablemente tur cos ta bai perdi door di e desasternan personal, di famia y social cu e practica ei ta causa.”

Sinembargo, apesar di e intencionnan noble di esnan cu kier pone un paro na prostitucion di mucha, e problema ta sigui crece. Ta kico ta hiba na e situacion horibel aki? Dicon asina tanto hende ta tolera of asta promove un actividad criminal asina?

[Nota]

[Comentario na pagina 3]

“Prostitucion di mucha ta un crimen hopi baho.”—FERNANDO HENRIQUE CARDOSO, EX PRESIDENTE DI BRAZIL

[Comentario na pagina 4]

“Tur forma di explotacion sexual ta bai contra dignidad humano, y pesei ta viola derechonan humano fundamental, sin importa e edad, sexo, rasa, grupo etnico of nivel di bida di e victima.”—UNESCO SOURCES