Dicon e Problema Ta Sigui Crece? — Watchtower BIBLIOTHEEK ONLINE

Dicon e Problema Ta Sigui Crece?

BO TAWATA sa cu traficacion di hende ta na di tres luga como e actividad criminal mas grandi na mundo, y cu ta solamente traficacion di droga y di arma ta surpas’e? Segun UNESCO (Organisacion di Nacionnan Uni pa Educacion, Ciencia y Cultura), tin un aumento constante di tur tipo di prostitucion.

Den un pais Latino Americano, un Comision Parlamentario di Investigacion a informa cu aunke prostitucion ta ilegal, tin mas cu 500.000 mucha mohe prostituta den e pais.

Den un otro pais, tin alrededor di 300.000 mucha prostituta riba caya, specialmente den barionan caminda tin traficacion di droga.

Segun informe, den paisnan Asiatico rond di un miyon hobensita ta ser uza como prostituta bou di condicionnan similar na sclabitud. Algun pais tin e reputacion di ta centronan di prostitucion di mucha y di turismo sexual.

Como cu tin asina hopi caso di malesanan transmiti sexualmente (manera AIDS), clientenan ta dispuesto pa paga prijsnan hopi mas halto pa mucha. Nan ta pensa cu tin mas chens cu e muchanan ta birgen y pues menos chens cu nan como cliente lo wordo infecta cu malesa. Luíza Nagib Eluf di e Departamento di Husticia di Brazil a splica: “E miedo di AIDS ta pone cu hombernan ta busca mucha mohe y mucha homber mas y mas hoben, y di e manera ei ta empeora e problema.” El a agrega: “Explotacion sexual di mucha y teenager ta e problema social mas grave bou di hende mohe pober na Brazil.”

Pobresa y Prostitucion di Mucha

Prostitucion di mucha ta florece den un ambiente di miseria y pobresa. Segun un funcionario gubernamental, den su pais explotacion y prostitucion di mucha ta “claramente liga cu desintegracion di famia, y ta e fruta di miseria y hamber.” Algun mayor ta bisa cu ta pobresa a pone nan bende nan yiunan den prostitucion. Muchanan cu ta biba riba caya ta recori na prostitucion como cu nan ta mira esei como e unico manera pa nan por sobrevivi.

E corant O Estado de S. Paulo a splica cu un mucha mohe cu join un gang, cu tempo por bira un prostituta. Na principio kisas e ta horta of bende su curpa solamente de bes en cuando pa e come. Despues, e ta bira un prostituta profesional.

Tin biaha famianan ta manda teenagernan otro pais pa nan traha einan como prostituta. UNESCO Sources ta informa: “Si bo tuma na cuenta e pobresa di algun pais Asiatico y Africano, e placa cu prostitutanan cu ta biba den un otro pais ta manda pa nan famia hopi bes ta sumanan considerabel. E echo cu turistanan di paisnan rico ta bin expres pa probecha di e ‘servicionan’ di hobennan y mucha ta stimula prostitucion den e paisnan aki tambe.”

Describiendo e peligernan cu mucha cu ta biba riba caya y cu ta prostituta ta expone na dje den un ciudad Latino Americano, e revista Time a informa: “Algun di e prostitutanan tin apenas 12 aña. Hopi bes nan ta mucha cu ta bini di famianan kibra; den dia nan ta drumi caminda nan haya un pida luga, y anochi nan ta bishita discotecanan caminda tin marinero, en busca di un partner.”

Bou di influencia di droga, un mucha prostituta por hay’e ta soporta humiliacionnan cu normalmente lo e no a acepta nunca. Por ehempel, segun e revista Veja, polis a haya 92 videocassette cu un docter a graba di actonan hopi baho cu mas cu 50 mohe (algun di nan menor di edad) mester a soporta na su man.

Apesar di e realidad horibel aki, un prostituta hoben a declara: “Si mi bai busca trabou normal, lo mi no por gana suficiente pa cumpra cuminda pasobra mi no tin un ofishi. Mi famia sa kico mi ta haci, y mi no kier laga e bida aki. Ta mi curpa, y mi ta haci cu ne loke ami kier.”

Sinembargo, e mucha mohenan aki nunca a pone prostitucion como nan meta den bida. Segun un trahado social, hopi prostituta hoben “kier casa” y ta soña cu un “principe azul.” Aunke ta asina cu tin situacionnan complica cu ta pone un mucha cuminsa un bida di prostitucion, un investigado a bisa: “E cos di mas escandaloso ta cu mayoria di nan a ser viola sexualmente den nan propio cas.”

Lo Bin un Fin na Prostitucion di Mucha?

Pero tin speransa pa e muchanan desafortuna aki. Prostitutanan di tur edad a yega di cambia nan bida. (Wak e cuadro “Hende Por Cambia”, na pagina 7.) E Palabra di Dios, Bijbel, a yuda miyones di hende rond mundo bira bon prohimo y fiel miembro di famia. Den Bijbel nos ta lesa lo siguiente di hendenan cu anteriormente tawata fornicado, adultero, ladron, golos pa placa y burache: “Asina algun di boso tawata; ma boso a wordo laba, ma boso a wordo santifica, ma boso a wordo hustifica den e nomber di Señor Hesucristo y den e spirito di nos Dios.”—1 Corintionan 6:9-11.

Awe, mescos cu den tempo di Bijbel, tin personanan cu ta haciendo cambionan positivo den nan bida y cu bon resultado. Pero toch mester di mas cos pa por para e ola di explotacion sexual. Algun gobierno y otro organisacionnan ta luchando contra turismo sexual y prostitucion di mucha. Pero pa ta realista mester bisa cu no tin mucho cos cu hende por haci pa elimina miseria y pobresa. Legisladonan no por stroba e mal pensamentonan y actitudnan cu ta e raiz di inmoralidad.

Sinembargo, en bes di esfuersonan humano, lo tin un otro medio cu si lo soluciona tur e problemanan aki: e Reino di Dios. E siguiente articulo lo splica esei.

[Comentario na pagina 6]

Pobresa hopi bes ta contribui na prostitucion di mucha

[Cuadro na pagina 6]

Un Prijs Halto

Tempo Daisy tawatin apenas seis aña, un di su ruman hombernan a abusa di dje sexualmente. Pesei el a bai keda serca su ruman homber mayo te ora cu el a cuminsa traha den un nightclub cu 14 aña. Despues di un par di dia Daisy a bira malo. Ora el a recupera, e doñonan di e luga a bis’e cu e debe nan, y nan a oblig’e traha como prostituta. Mas o menos un aña despues ainda e tawata debe nan, y a parce cu nunca lo e no por a sali for di e debe ei. Sinembargo, un nabegante a paga e resto di su debe y bai cu ne na un otro stad caminda el a trat’e manera catibo. Daisy a bai lag’e, y despues a biba cu un otro homber pa tres aña, caba nan a casa. Debi na hopi problema serio den su matrimonio, el a purba mata curpa tres biaha.

Cu tempo Daisy cu su casa a cuminsa studia Bijbel. Pero Daisy a sinti cu e no tawata digno di bira un Testigo di Yehova. Ora nan a mustr’e den Bijbel cu Yehova Dios ta acepta hende cu haci e cambionan necesario, el a dedica su bida na dje. Daisy tawata haci hopi esfuerso pa haci loke ta corecto, pero e tawata sinti cu esei no ta suficiente y pesei tawata sufri cada bes di depresion. Pero felismente el a acepta yudansa pa vence e traumanan causa door di abuso sexual y door di su bida como mucha prostituta, y tambe pa logra y mantene stabilidad emocional.

[Cuadro na pagina 7]

Hende Por Cambia

Ora Hesucristo tawata riba tera, el a sinti duele di hende pecaminoso cu tawata sufri. El a sali for di e punto di bista cu prostitutanan, sin importa ki edad nan tin, por a cambia nan estilo di bida. Hesus a asta bisa e lidernan religioso: “Di berdad mi ta bisa boso cu e publicanonan y e prostitutanan lo drenta e reino di Dios prome cu boso.” (Mateo 21:31) Aunke e personanan ei di curason sinsero a ser desprecia pa e bida cu nan a hiba, nan a haya pordon debi na nan fe den e Yiu di Dios. Pecadonan repenti tawata dispuesto na bandona nan bida di prostitucion pa nan por ricibi e bendicionnan di e Reino di Dios. Despues di esei, nan a biba na harmonia cu e normanan husto di Dios. Awe tambe, tur clase di hende ta acepta e berdad di e Palabra di Dios y ta cambia nan manera di biba.

Considera loke a pasa cu Maria, Carina y Estela, menciona den e prome articulo. Maria mester a resisti e presion cu su mama tawata pone riba dje pa sigui como prostituta, y tambe lucha duro pa stop di uza droga. El a splica: “Mi tawata uza droga pa domina e sintimento cu mi tawatin cu mi no bal nada debi na e bida di prostitucion cu mi a hiba.” Maria a conta con e congregacion cristian di Testigonan di Yehova a ricibie: “E amor cu e miembronan di congregacion a mustra na mi, a impresiona mi. Tur hende—mucha y hende grandi—a trata mi cu respet. Mi a ripara cu hombernan casa tawata fiel na nan esposa. Mi ta masha contento cu e rumannan a acepta mi como nan amiga.”

Ora Carina tawatin 17 aña, Testigonan di Yehova a bishit’e. El a cuminsa studia Bijbel, maske pa un tempo el a sigui traha como prostituta. Pocopoco el a cuminsa aprecia berdadnan biblico. Pesei el a dicidi di bai biba na un stad leu, y einan el a bira un Testigo di Yehova.

Estela, kende for di chikito tawata meti den prostitucion, paranda y bebemento pisa, a haya interes den Bijbel. Sinembargo, el a pensa cu nunca Dios lo pordon’e. Pero cu tempo el a bin compronde cu Yehova Dios realmente ta pordona hende repenti. Awor Estela ta un miembro di e congregacion cristian, casa y ta lantando tres yiu. El a bisa: “Mi ta masha contento y gradicido na Yehova pasobra el a saca mi for di lodo y acepta mi den su organisacion limpi.”

E relatonan aki ta confirma loke Bijbel ta declara, esta, cu Dios ta desea pa “tur [“clase di”, NW] hende wordo salba y yega na conocemento di e berdad.”—1 Timoteo 2:4.

[Plachi na pagina 7]

Muchanan prostituta hopi bes ta meti den droga

[Reconocemento pa Potret na pagina 5]