Pronto un Fin na Explotacion di Mucha!

“DEN e Declaracion Universal di Derechonan Humano, Nacionnan Uni a proclama cu durante e periodo di infancia mucha tin derecho riba cuido y yudansa special”, segun e introduccion di e Tratado di Derechonan di Mucha. Relaciona cu e importancia di famia, e introduccion ta agrega: “Pa e mucha su personalidad por desaroya plenamente y harmoniosamente, e mester lanta den un ambiente di famia, den un atmosfer di felicidad, amor y comprension.” Sinembargo, hende ta leu di alcansa e ideal aki.

Papia so tocante un miho mundo pa mucha no ta basta. Degeneracion moral ta reina tur caminda, y hopi hende ta haya e situacion normal. E aparato hudicial no por controla e decadencia moral y golosidad pa placa cu ta plama tur caminda. Asta mayornan, en bes di mustra amor y proteha nan yiunan, hopi bes ta contribui na e ambiente cu ta tolera loke ta incorecto. Ki speransa nos tin anto cu lo bin un fin na prostitucion di mucha?

Aunke e sistema di cosnan corupto aki no a percura pa tur mucha haya un hogar amoroso y un futuro sigur, nos Creador pronto lo elimina tur tipo di actonan malbado y relacion sexual pa loko, incluso prostitucion di mucha. Mundo lo haya un sorpresa, pasobra pronto Yehova Dios lo interveni den asuntonan humano mediante su Reino. Esnan cu ta instiga inmoralidad y esnan cu ta probecha inhustamente di otronan lo no scapa Dios su huicio. Solamente hende cu ta stima nan prohimo lo sobrevivi pa biba den Dios su mundo nobo. “E rectonan lo biba den e tera, y e perfectonan lo keda den dje; ma e malbadonan lo wordo corta kita for di tera, y e traidonan lo wordo ranca for di dje cu raiz cu tur.”—Proverbionan 2:21, 22.

Imagina bo ki un alivio lo reina ora cu tanto mucha como hende grandi lo por biba sin humiliacion y abuso sexual! Asta e daño emocional y fisico causa door di explotacion y violencia lo no existi mas. Personanan cu anteriormente tawata victima di explotacion sexual lo biba sin e mal recuerdonan of trastorno mental cu ta keda despues. “E cosnan di antes lo no wordo recorda mas ni bin na memoria.”—Isaias 65:17.

E ora ei ningun mucha cu nace lo sufri maltrato of abuso sexual. Felicidad, amor y comprension lo no ta simplemente un soño. Isaias 11:9 ta bisa di e habitantenan di Dios su mundo nobo: “Nan lo no causa daño ni destruccion.”

Realmente lo ta un gran goso ora cu pobresa, uzo di droga, famianan infelis y inmoralidad lo no existi mas! Pas, husticia y siguridad lo reina. “Mi pueblo lo biba den un luga caminda pas ta reina, y den casnan sigur y den luganan caminda tin sosiego y trankilidad.”—Isaias 32:18.

[Cuadro/Plachinan na pagina 9]

Interes di Mayornan Por Preveni Cu Famia Ta Kibra

● “Mi mayornan a anima mi masha pa mi probecha di mi añanan escolar y siña un profesion. Nan no a purba obliga mi siña loke nan a gusta, sino mas bien nan a yuda mi scohe e scol cu a duna e curso cu mi tawatin mester.”—Tais.

● “Ora ami cu mi ruman mohe tawata bai haci compras, nos mama tawata compaña nos. El a yuda nos cumpra paña barata pero tambe el a yuda nos evita e estilonan extrabagante of mucho sunu.”—Bianca.

● “Ora nos tawata bai fiesta, mi mayornan semper a puntra ken mas lo tin einan, ki tipo di musica lo tin, y ki ora e fiesta ta cuminsa y caba. Mayoria fiesta nos tur a bai hunto como famia.”—Priscila.

● “Ora mi tawata mucha y teenager, semper ami cu mi mayornan tawatin masha bon comunicacion. Un mucha mohe di mi scol a ripara esei y a bisa: ‘Mi ta yalurs riba e manera facil cu bo por combersa tocante cualkier asunto cu bo mayornan. Mi no ta sinti mi liber pa papia asina cu mi mama, y hopi di e cosnan cu mi kier sa mi ta purba siña nan for di otro hende.’”—Samara.

● “Mi tawata un teenager alegre. Mi no tawata mira nada malo den hende y semper mi tawata hari. Mi tawata gusta papia tocante cos pret cu mi amigonan y a sinti mi bon hunto cu nan. Mi mayornan a compronde cu ta asina mi caracter ta, y nan no a purba cambia mi manera di ser. Pero na un manera bondadoso nan a yuda mi compronde cu ora di trata cu e sexo opuesto, mi mester tene cuidou y comporta mi decente.”—Tais.

● “Mescos cu mayoria hoben, mi a cuminsa interesa den e sexo opuesto. Mi tata a fiha un cierto edad cu mi tawatin mag di cuminsa namora. Mi no a keda malcontento, al contrario, mi a sinti cu mi mayornan tawata precupa pa mi y kier a proteha mi pa despues mi no yora malai.”—Bianca.

● “Mi a mira matrimonio como algo bon, specialmente debi na e ehempel di mi mayornan. Nan semper tawatin un bon relacion y un bon comunicacion. Mi ta corda cu ora mi tawatin enamorado, mi mama a duna mi conseho con pa actua bou di cierto circunstancia y a splica mi con esaki lo a influencia mi matrimonio.”—Priscila.

[Plachi na pagina 10]

Den Dios su mundo nobo ningun mucha hamas lo sufri maltrato