Bestia Lo Ta un Placer pa Semper

KI UN inmenso variedad di bestia tin, y cada un aparentemente cu un otro personalidad! Amor y compasion pa bestia por ta un factor cu ta hala hende serca di nan Creador. Un ehempel di esaki tawata e caso di Maria.

Rond di tres aña pasa, tempo cu Maria tawata biba na Lisboa, Portugal, su cacho stima a perde, y el a laga anuncia esaki na radio. Un señora Testigo di Yehova, cu tawatin sigur cu el a mira un cacho cu ta cuadra cu e descripcion cu nan a duna, a tuma contacto cu Maria. Ora nan dos a topa, nan a haya e cacho, y e Testigo a bisa Maria cu como cu Maria tawata stima bestia asina tanto, sigur lo e disfruta di biba den e mundo nobo cu Dios a priminti. E Testigo a splica cu e tempo ei hende lo ta na pas cu tur bestia.

Maria a acepta e invitacion pa asisti na un reunion di Testigonan di Yehova. Loke el a tende y mira einan a stimula su interes te cu e tawata kier un studio di Bijbel personal. Segun cu e studio a sigui, Maria a keda profundamente conmovi door di loke el a siña tocante Yehova Dios y su promesa di bida eterno riba tera den un mundo nobo di husticia. (Salmo 37:29; Huan 17:3) Dia 16 di februari 2002, Maria a simbolisa su dedicacion na Yehova mediante bautismo den awa.

Dios Su Proposito Original

Mescos cu Maria, tin hopi hende cu a keda masha emociona cu e evidencia den Bijbel cu Dios lo cumpli cu su proposito original pa hende biba pa semper riba e tera comberti den un paradijs y cuida tur e bestianan riba dje. (Genesis 1:28) Bijbel ta bisa cu Dios “no a crea [e tera] pa e keda bashi, ma el a form’e pa e wordo habita.” Aparentemente, hende lo mester a disfruta di e tera y su bestianan pa semper.—Isaias 45:18.

Ademas Bijbel ta enfatisa Dios su determinacion pa cumpli cu su proposito original di comberti e tera den un paradijs. Dios a declara: “Di berdad mi a papia.” Anto el a agrega: “Siguramente lo mi hacie.” Un biaha mas Yehova a decreta: “Asina mi palabra cu ta sali for di mi boca lo ta; e lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 46:11; 55:11.

Pues ta bisto anto cu Dios su proposito original tawata pa hende disfruta di un paradijs riba tera pa semper. Nos por ta absolutamente sigur cu na su debido tempo e proposito ei lo ser realisa. Laga nos analisa algun descripcion breve cu Bijbel ta duna di e manera cu bida lo ta den Dios su mundo nobo. Nos lo mira cu de echo tur bestia, tanto di cas como salbahe, lo ta na pas cu otro y cu hende.—Isaias 65:17, 21-25; 2 Pedro 3:13.

Bestia di Cas den Dios Su Mundo Nobo

Den Yehova su mundo nobo, hende lo por mishi cu e cabeinan largo di un leon, caricia e cuero strepia di un tiger y, si, drumi pafo den mondi sin miedo cu cualkier bestia lo hacie daño. Tuma nota di e promesa aki di Dios: “Lo mi . . . elimina tur bestia salbahe for di e tera, asina cu nan [hende] por biba trankil den desierto y drumi den e mondinan.”—Ezekiel 34:25; Oseas 2:18.

De echo, e tempo ei bestia salbahe lo ta sumiso, asta na mucha chikito! Bijbel ta bisa: “Lobo lo ta hunto cu lamchi di carne, leopardo lo cai drumi banda di lamchi di cabrito, y bishe, leon chikito y bestia gorda lo ta hunto, y un mucha chikito lo guia nan.”

Pero esei no ta tur cos! E texto ta sigui bisa: “Baca y beer lo come yerba hunto; nan chikitonan lo drumi banda di otro, y leon lo come yerba seco manera buey. Yiu na pecho lo hunga banda di buraco di colebra, y yiu kita for di pecho lo hinca su man den cueba di vibora. Nan lo no causa daño ni destruccion den henter mi sero santo, pasobra tera lo ta yen di e conocemento di SEÑOR, manera awa ta tapa lama.”—Isaias 11:6-9.

Den Yehova su mundo nobo, lo no tin e problema di hende cu ta biba riba otro den stadnan grandi, cu no ta dushi ni pa hende ni pa nan bestianan biba aden. Ta cierto cu asta awe hopi hende ta disfruta di nan bestia, y hopi ta balansa den nan actitud y cuido pa cu bestia. Pero djis pensa un rato riba e prospecto maraviyoso di disfruta di bestia di cas pa semper den un husto mundo nobo! E cuido amoroso cu nan lo haya lo ta un berdadero honor pa e Magnifico Creador di tur ser bibo.

Si bo no sa ainda kico ta Dios su proposito maraviyoso—mescos cu Maria cu ta un amante di bestia no tawata sa sino te cu poco tempo pasa—nos ta invita bo calorosamente pa tuma contacto cu e publicadonan di e revista aki of cu un Testigo di Yehova, kende gustosamente lo yuda bo siña tocante esei.

[Plachi na pagina 10]

Den Dios su mundo nobo, nos lo disfruta di bestia pa semper