Bestia Ta un Regalo di Dios

BO A yega di bishita un dierentuin of un circo? Bo a haya gana di carga of pasa man riba un di e bestianan bunita, kisas un leon mahestuoso of un inmenso tiger di Siberia? Podise tawata masha emocionante pa mira un entrenado di bestia of un di nan cuidadonan haci esei. De echo, un escritor di Bijbel a bisa casi 2.000 aña pasa: “Tur sorto di bestia salbahe y parha, di bestia cu ta lastra y bestia di lama ta wordo mansa y a wordo mansa caba door di e rasa humano.”—Santiago 3:7.

Tur tipo di bestia ta reacciona faborabel riba cuido amoroso y atencion. En realidad por ta un goso pa mira con nan ta anda cu hende interesa den nan bienestar y cu a mansa nan. E escritor Romano Plinio, kende a skirbi rond di mesun tempo cu e escritor di Bijbel Santiago, a menciona cu hende a mansa olifanti, leon, tiger, aguila, crocodil, colebra y asta pisca.

Pero eigenlijk, mansamento di bestia pa nan bira bestia di cas a cuminsa hopi mas prome. Hopi siglo prome cu Santiago y Plinio a skirbi, e Egipcionan tawata mansa bestia salbahe y uza nan como mascota of bestia di cas. Awendia bo por haya hopi bestia cu bo ta mira den dierentuin, na cas di hende den algun pais.

Bestia Su Relacion cu Hende for di Principio

Bijbel, e registro mas bieu di historia humano, ta informa cu e prome homber, Adam, a duna e bestianan nomber. Bijbel ta bisa: “Manera e homber a yama cada ser bibo, asina su nomber tawata. Y e homber a duna nomber na tur bestia di cria y parha di shelo, y tur bestia di sabana.” (Genesis 2:19, 20) Aparentemente, Adam a familiarisa su mes bon cu e bestianan pa e por a duna nan un nomber cu ta pas cu nan. Pero e no tawatin mester di proteccion, ni sikiera contra bestianan salbahe. Nan tawata na pas cu ne, y ta sigur cu el a disfruta sin fin di nan compañerismo!

Dios a encarga tanto Adam como su casa, Eva, cu e cuido di e bestianan. Segun Dios su proposito, manera e ta para skirbi den Bijbel, hende mester a “goberna riba e piscanan di lama y riba e parhanan di shelo y riba e bestianan di cria y riba henter e tera, y riba tur bestia cu ta lastra riba tera.”—Genesis 1:26.

Un Relacion Intimo y Duradero

Ora hende ta eherce dominio corecto riba bestia, e resultado por ta masha agradabel. Hende sa considera un bestia stima como un compañero precioso, asta como un parti di nan famia. Anto for di e relato di Bijbel tocante “un lamchi chikito” di un homber pober nos por asta mira cu esaki tawata e caso tambe miles di aña pasa. Profeta Natan a conta Rei David tocante e lamchi, y a bisa di e homber pober: “E [lamchi] tawata come di su pan y bebe di su copa y drumi na su pecho, y tawata manera un yiu mohe p’e.”—2 Samuel 12:1-3.

Hopi hende awe por compronde dicon un bestia por bira un compañero stima, manera un miembro di famia. Tuma por ehempel un famia cu ta biba serca di Harare, ciudad capital di Zimbabwe. E mayornan a cumpra pa cada un di nan yiunan un cacho pa sirbi como un compaño. Un biaha cu un di e yiu hombernan cu e tempo ei tawatin ocho aña tawata cana cu su cacho, diripiente un mamba, un colebra venenoso grandi, a cai abou su dilanti for di un palo. E mamba a ataca e mucha, pero manera lamper e cacho a interveni, y a scapa e mucha su bida. Bo por imagina bo con precioso e cacho ei tawata pa e famia?

Hende sordo tin un aprecio special pa cacho cu a ser entrena pa yuda nan. Un señora a conta: “Ora Twinkie tende e bel di porta, e ta bini serca mi y ta mishi cu mi pia y ta hiba mi na e porta dilanti. Asina tambe, ora Twinkie tende e timer di mi forno ring, e ta core bin serca mi, y mi ta siguie. Den caso di un alarma di candela, Twinkie ta entrena pa hala mi atencion anto caba cai drumi abou pa indica cu tin un posibel peliger.”

Loke ta specialmente digno di mencion ta e relacion balioso entre hende ciego y nan cacho pa guia ciego. Michael Tucker, un entrenado di cacho pa guia hende ciego y escritor di e buki The Eyes That Lead (E Wowonan Cu Ta Guia), ta di opinion cu un cacho pa guia hende ciego ta habri camindanan completamente nobo pa un hende ciego, y ta dun’e “libertad, independencia, mobilidad y compañerismo.” De echo, hopi bes ta un placer pa mira e relacion entre e cachonan ei y nan doño!

E situacion ei ta conta tambe pa hende cu tin un of otro incapasidad y cu tin un cacho di compaño. Un cacho di un señora den rolstul a siña cohe e telefon p’e y lembe stampia pa carta! Un otro cacho ta reacciona riba 120 ordo, y e ta asta cohe bleki y paki riba reki di supermarket pa su doño. E doño, kende tin un incapasidad, ta uza un pen di rayo laser pa identifica e articulonan cu e kier, y su cacho ta bai cohe nan p’e.

Bestia di cas ta beneficia hende di edad avansa tambe. Un veterinario a bisa cu bestia di cas (incluso cacho), “ta duna personanan di edad avansa un proposito y e sintimento di ta util, na un tempo cu hopi biaha nan ta biba aparta di sosiedad.” The Toronto Star a informa: “Bestia di compaño ta pone cu hende tin menos stress, ta bai docter menos y asta ta duna nan mas chens di sobrevivi despues di atake di curason.”

The New Encyclopædia Britannica ta haci e comentario interesante aki: “Tene bestia di cas ta crea e oportunidad pa siña mucha cu si nan ta responsabel nan por haya privilegio, y tambe pa splica nan algo tocante sex. No ta dura hopi cu nan ta mira cu bestia ta dek otro, cu nan ta dik pa un periodo y tambe e diferente problemanan relaciona cu nacemento y cuido di e yiunan di bestia.”

Debocion na Bestia di Cas

E fieldad remarcabel di bestia de echo ta pone algun hende stima nan bestia di cas mas cu nan ta stima miembronan di famia. Den algun pais, den casonan di diborcio tin biaha nan ta duna un di e casanan custodia di e bestia di cas como parti di e acuerdo di reparticion di bienes. Y tin hende cu a pone nomber di nan bestia den nan testament como beneficiario di rikesanan enorme.

No ta straño anto cu negoshi relaciona cu bestia di cas ta masha lucrativo awe. Tin buki y revista cu ta duna conseho tocante tur asunto relaciona cu bestia di cas. Negoshinan ta ofrece loke sea e doñonan di bestia ta desea pasobra nan sa cu algun hende ta dispuesto pa duna nan bestianan di cas cosnan extrabagante di luho.

Por ehempel, ta posibel pa bo consulta docternan sumamente specialisa cu ta trata tur tipo di malesa cu ta afecta bestia di cas. Tin psikiatra di bestia di cas cu ta prescribi remedi antidepresivo pa un bestia di cas. Ademas, tin abogado y bendedo di seguro pa bestia di cas, y tambe servicionan pa baña y pela bestia di cas y institutonan di entrenamento. Hende ta tene entiero pa bestia di cas. Y tin oferta riba mesa pa “clone” bestia di cas; pero, ta mas cu claro cu tur e cosnan aki ta costa basta placa!

Ta bisto anto cu tur caminda hende stima bestia di cas. Dra. Jonica Newby den su buki The Animal Attraction (E Atraccion di Bestia), ta yega na e conclusion: “Ora un cacho core bin serca nos, ta yanga su rabo y ta lembe nos como si fuera e echo cu nos a bin cas ta e miho cos cu a pasa cu ne henter dia, ta parce rasonabel pa yama esei ‘amor.’” Pesei ta di compronde dicon hopi doño di bestia di cas ta sinti nan motiva pa nan, na nan turno, demostra e “amor” ei.

Sinembargo, esfuersonan pa trata un bestia di cas manera un hende por tin un efecto negativo. Con cu bai bin, un bestia di cas no por satisface bo necesidadnan manera otro hende por hacie. Ademas, e echo cu a urbanisa bestia di cas, es decir cu awor nan a adapta nan mes na e ambiente di stad, ta causa problema pa algun bestia y pa nan doño. Nos lo analisa e asuntonan ei den e siguiente articulo.

[Plachi na pagina 3]

For di leu den pasado hende a cuminsa haci bestia salbahe manso

[Reconocemento]

Un detaye for di e buki The Great King of the Parthians Hunts With His Tame Panthers di Giovanni Stradanno: © Stapleton Collection/CORBIS

[Plachi na pagina 4]

Wardado di carne Israelita tawata trata lamchi cu tierno compasion

[Plachinan na pagina 5]

Bestia di cas por yuda hende cu incapasidad y esnan di edad avansa