For di Nos Lectornan

Bestianan di Cas Masha danki pa e serie “Con Bo Ta Mira Bestianan di Cas?” (8 di maart 2004) Mi a gusta specialmente e manera cu e articulonan tawata skirbi, e ta refleha amor y consideracion pa cu bestia. Lo mi duna mi veterinario un ehemplar di e revista. Articulonan manera esakinan ta motiva hende cu ta stima bestia pa hala mas serca Yehova.

O. M., Italia

Ultimamente ta mi so ta biba, pesei mi a cuminsa cria dos pushi chikito. Aunke nan ta duna mi hopi goso, mi ta compronde tambe e importancia di no trata nan como si fuera ta hende nan ta. E articulo aki a yuda mi compronde e necesidad di ta balansa relaciona cu bestianan di cas.

K. O., Japon

E articulonan tawata excelente y a yuda mi pa ta balansa den mi sintimentonan pa cu mi bestianan di cas. Lo mi kier a menciona cu ora un persona cuminsa cria un pushi of un cacho, e mester considera e posibilidad pa laga sterilis’e. Un motibo pakico ta mata asina hopi cacho y pushi tur aña ta pasobra no tin suficiente hende cu kier tuma nan pa cria na cas.

C. B., Merca

“Spierta!” ta reacciona: Danki pa hala atencion di nos lectornan riba e punto aki.

Boso articulo a bisa cu den Dios su mundo nobo, “tur bestia, tanto di cas como salbahe, lo ta na pas cu otro.” Ta rasonabel pa pensa cu bestianan yagdo lo no existi mas?

D. B., Canada

“Spierta!” ta reacciona: For di tempo cu hende a cai den pica, hopi cos riba nos planeta a sali for di balansa. Ta tempo lo bisa exactamente con e profecianan di Bijbel cu ta menciona cu lo tin harmonia entre bestia den e Paradijs, lo cumpli. Pero nos tin pleno confiansa cu nos Creador lo elimina tur loke ta dañino for di nos planeta.—Salmo 37:10, 11.

Canamento Danki pa boso articulo “Dicon Ta Bon pa Cana?” (8 di maart 2004) Ta bon pa sa cu un hende por reduci e riesgo di haya malesa di curason y hersenbloeding, door di djis cana! E articulo a laga mi realisa cu pa demasiado tempo mi tawatin un bida di sinta hopi. Lo mi sigui e conseho pa cana regularmente.

L. B., Suecia

Sex via Telefon Mi kier expresa mi gratitud pa e articulo “Hobennan Sa Puntra . . . Kico Tin di Malo den Sex via Telefon?” (8 di maart 2004) Mi tawatin e experencia amargo di enfrenta e problema serio aki. E consecuencianan a perhudica mi spiritualmente, hibando na mas pica serio cu a pone mi perde privilegionan den e congregacion cristian. Cu Yehova sigui duna boso su sabiduria segun cu boso ta percura pa articulonan cu ta yuda nos keda spiritualmente fuerte.

J. H., Spaña