Biba Compaña Ta un Bon Fundeshi pa Matrimonio?

DOS hende di e sexo opuesto cu ta biba compaña “a bira un fenomeno comun den sosiedadnan industrialisa rond mundo”, segun e revista Journal of Marriage and Family. Anto “alrededor di mitar di parehanan cu ta compaña ta mira esei como un manera pa evalua nan compatibilidad prome cu casa.” Supuestamente anto, biba compaña “mester elimina incompatibilidad y haci matrimonionan cu ta tuma luga despues mas stabil”, segun e Journal.

“Sinembargo, evidencia ta indica e conclusion contrario”, Journal a sigui bisa. “Entre parehanan casa, esnan cu a biba compaña prome cu nan casa sa tin menos satisfaccion den matrimonio, ta pasa menos tempo hunto den e mesun actividadnan, tin desacuerdonan matrimonial mas intenso, tin menos sosten di nan pareha, menos exito den soluciona problema, [y] mas informe di problemanan matrimonial . . . Ademas, compara cu parehanan cu a drenta directamente den matrimonio, parehanan cu a biba hunto prome, ta core mas riesgo di desintegracion matrimonial [diborcio].”

Manera e estudio aki ta demostra, loke por parce sabi for di un punto di bista humano kisas en realidad ta masha imprudente. E echo aki ta enfatisa e berdad di e palabranan di Yeremias 10:23: “No ta keda na hende pa dirigi su pasonan.” Ta mucho mas sabi pa acudi na Dios su Palabra, Bijbel, cu ta percura hopi conseho excelente riba e tema di matrimonio! (2 Timoteo 3:16) Por ehempel, Bijbel ta bisa tocante e relacion matrimonial: “Un homber lo bandona su tata y su mama y lo uni cu su esposa. Y nan lo bira un carni.”—Genesis 2:24; Mateo 19:5.

Door di obedece e instruccion dibino ei—en bes di sigui tras di rasonamento humano eroneo y hopi bes inconsistente—parehanan tin hopi chens cu nan matrimonio lo ta berdaderamente felis y duradero.—Proverbionan 3:5, 6.