Obtene Informacion Completo y Exacto

Tin varios asunto cu ta dificil pa haya informacion completo y exacto riba nan. Gobiernonan y companianan ta papia mita berdad. Medionan di comunicacion hopi bes ta priminti di duna informacion imparcial, sinembargo nan no ta cumpli cu nan palabra. Docternan no ta splica tur biaha a fondo kico ta e efectonan secundario di e remedinan cu nan ta duna nos. Tin un manera pa obtene informacion confiabel?

Hopi hende a elogia e yegada di Internet como e medio pa obtene informacion di fuentenan confiabel for di tur parti di mundo. Claro cu esei ta posibel, pero basta bo sa precis unda pa busca riba Internet. Un editorial den The New York Times a bisa: “E bentaha mas grandi di Internet ta cu e por educa hende mas lihe cu cualkier otro medio di comunicacion. Su desbentaha mas grandi ta cu e por haci hende mas bobo, mas lihe cu cualkier otro medio di comunicacion.”

E editorial a sigui bisa: “Como cu Internet ta impresiona hende cu su ‘tecnologia’, esnan cu no ta bon informa ta bai mas lihe tras di loke e ta contene. Nan no ta realisa cu e mayor desbentaha di Internet ta cu e ta manera un beerput: un canal electronico cu ta contene informacion cu no a ser controla ni filtra.” Pero manera e escritor a mustra, desafortunadamente no tin un programa di computer cu ta delete loke ta porkeria.

Ken cu ta por pone kico cu ta riba Internet, den un revista of den un buki. Pues, nos tin cu uza nos capasidad di distingui y educa nos mes di manera cu nos no ta kere sin mas tur loke nos lesa. Nos cu kier informacion exacto tin cu haci sigur prome cu nos fuente ta confiabel. Esaki por tuma tempo. Pero unabes nos haci esei y haya informacionnan completo y exacto, nos por tin un manera di pensa sano, nos por husga cosnan corectamente y tuma decisionnan importante cu confiansa.