E Poder di un Sonrisa

AUNKE e ta dura djis un momento, kisas bo ta keda cord’e pa resto di bo bida. E ta bal masha hopi, pero ningun hende no ta asina pober cu e no tin pa dun’e ni asina rico cu e no tin mester di dje. Di kico nos ta papia? Di un smile of sonrisa.

Un hende ta smile door di un contraccion di musculo cu ta pone su wowonan briya y ta laga e hukinan di su boca bai ariba levemente, expresando satisfaccion. Un baby ta smile for di e prome simannan despues di nacemento, y naturalmente e mayornan nobo ta keda encanta cu esaki. E prome smilenan ei ta conoci como sonrisa imboluntario of di reflex. Expertonan ta splica cu e tipo di smile aki ta aparece hopi bes ora cu e baby ta soñando y parce cu e ta relaciona cu su sintimentonan y cu actividad di su sistema di nervio. Asta ora nos bira adulto, e sonrisa imboluntario aki por presenta despues di un cuminda of ora cu nos ta scuchando muzik.

Sinembargo, di seis siman pariba, un baby ta smile como reaccion riba un cara of un stem. E ‘sonrisa social’ aki—un sonrisa conciente y boluntario—ta haci nos contento, sea cu nos ta baby of adulto. Nan ta bisa cu e sonrisa ei asta tin un influencia positivo riba nos salu fisico. Segun e terapistanan di abla Mirtha Manno y Rubén Delauro, kendenan ta dirigi un clinica cu yama Sonrisa y Salu, e solo gesto di smile ta produci un estimulo electrico cu ta influencia e klier cu yama hipofise. E klier aki na su turno ta produci endorfina, un substancia kimico den e celebro cu ta laga nos sinti contento.

Un otro motibo importante pa smile ta e efecto positivo cu e tin riba otro hende. Un sonrisa sinsero ta comunica nos sintimentonan sin cu nos tin cu papia, sea e ta un sonrisa di saludo, di comprension of di animacion. Tin biaha, si nos djis wak un potret di un mucha cu un bunita smile, esei por pone nos smile.

Ora un persona smile cu nos na un manera amabel, esei por laga nos sinti nos mas relaha. Tambe esei por yuda nos trata miho cu frustracion of cu situacionnan dificil. Bijbel ta recomenda: “No laga di haci bon na esnan cu merece esaki, si ta den bo poder pa hacie.” (Proverbionan 3:27) Si, cu un simpel sonrisa, nos por beneficia nos mes y otro hende. Pakico no haci un esfuerso pa comparti e regalo sumamente balioso aki: un sonrisa amabel?