Bo Por Ta Feliz for di Awor

AKI poco tempo, niun hende lo no bira malo, bira bieu y muri. Abo tambe por haya e futuro maraviyoso ey. Pero awendia hende ta yen di problema y dificultad. Kico por yuda bo pa bo por tin un bida feliz for di awor? Wel, Bijbel por duna bo e guia cu bo tin mester. Laga nos considera algun dificultad cu nos ta haya den bida y con Bijbel por yuda nos.

KEDA CONTENTO CU LOKE BO TIN

Conseho di Bijbel: “Laga boso manera di biba ta liber di amor pa placa, y keda contento cu loke boso tin.”—Hebreonan 13:5.

Awe tin yen di cos cu hende ta bisa cu nos tin mester. Pero Bijbel ta conseha nos pa “keda contento cu loke [nos] tin.” Con nos por haci esaki?

Evita “amor pa placa.” “Amor pa placa” por pone hende haci cualkier cos; nan ta dispuesto pa sacrifica nan salud, famia, amistad, norma y balor y hasta nan dignidad. (1 Timoteo 6:10) Pero esey no ta bale la pena. Dicon? Pasobra al fin y al cabo, esun cu ta stima placa “lo no keda satisfecho.”—Eclesiastes 5:10.

Hende ta mas importante cu cos material. Aunke cos material por ta necesario, e cosnan ey no por stima of aprecia nos. Solamente hende por haci esey. Un berdadero amigo por duna nos mas felicidad den bida.—Proverbionan 17:17.

NOS POR TA FELIZ FOR DI AWOR SI NOS SIGUI BIJBEL SU GUIA

CON PA DEAL CU MALEZA

Conseho di Bijbel: “Un curason contento ta un bon remedi.”—Proverbionan 17:22.

Mescos cu “un bon remedi”, alegria por yuda nos deal cu maleza. Pero con nos por ta contento ora nos ta malo?

Sea agradecido. Si nos ta keda pensa riba nos salud, “tur e dianan” lo parce malo. (Proverbionan 15:15) En bes di esey, Bijbel ta bisa pa “mustra cu boso ta agradecido.” (Colosensenan 3:15) Sea agradecido pa hasta e cosnan chikito den bida. Por ehempel, un bunita bahada di solo, aire fresco of un sonrisa di un ser keri. E cosnan aki por haci bo mas feliz.

Haci cos pa otro hende. “Tin mas felicidad den duna cu den ricibi”, y esey ta conta hasta si nos tin problema cu salud. (Echonan 20:35) Ora otro hende mustra aprecio pa loke nos a haci pa nan, nos ta sinti hopi feliz y nos lo no pensa mucho riba nos maleza. Ora nos yuda otro hende pa nan ta feliz, nos tambe lo ta feliz.

FORTALECE BO LASO MATRIMONIAL

Conseho di Bijbel: “Sigui haci sigur kico ta e cosnan mas importante.”—Filipensenan 1:10.

Parehanan casa cu no ta pasa suficiente tempo hunto por aleha for di otro. Nan mester mira nan matrimonio como un di e cosnan di mas importante den bida.

Haci cos hunto. En bes di busca nan mes interes so, ta bon pa parehanan casa plania pa haci cos hunto. Bijbel ta bisa cu “dos ta mihor cu un.” (Eclesiastes 4:9) Boso por haci varios cos hunto, entre otro, cushina, haci ehercicio, bebe algo of haci un otro actividad.

Demostra bo casa cu bo ta stim’e. Bijbel ta anima esposo cu esposa pa stima y respeta otro. (Efesionan 5:28, 33) Un sonrisa caluroso, un abraso of un regalo chikito por yuda fortalece un matrimonio. Y claro, parehanan casa mester mustra interes sexual solamente den otro.—Hebreonan 13:4.

“PORFIN MI A HAYA PROPOSITO DEN BIDA!”

—Segun e relato di Ryoko Miyamoto di Japon.

Bida tabata duro. Mi esposo tabata un alcoholico y cada bes e tabata perde su trabou. E no tabata kier a cumpli cu su responsabilidad como tata y cuida nos cuater yiunan. Ni maske con duro mi a traha, tabata comosifuera nos tabata den un callejón sin salida. Mi a puntra mi mes: Esaki ta mi destino of esaki ta mi castigo pa e picanan cu mi a comete den mi bida anterior?

Despues, un testigo di Jehova a bati na mi porta. Cu un smile riba su cara, el a papia yen di entusiasmo cu mi tocante e Reino di Dios y bida eterno. El a ofrece mi un curso di Bijbel y mi a acepta. Den poco tempo mi a siña cu Dios ta existi, y cu e ta sabi, husto y amoroso. Tambe mi a siña tocante kico ta pasa cu nos ora nos muri y cu mi sufrimento no ta pa motibo di destino.

Mas importante ainda, mi a siña cu e unico manera cu mi por ta feliz ta si mi tin un bon relacion cu Dios. Ora mi a siña e berdad cu tin den Bijbel, mi a haya animacion, libertad y satisfaccion. Porfin mi a haya proposito den bida!