E Punto di Bista Biblico

Con Nos Mester Uza Nos Libertad di Scohe?

DIOS a crea e prome pareha humano, Adam cu Eva, cu e capasidad di por scohe loke nan kier. El a laga e hofi di Eden na Adam su encargo. Un di Adam su debernan tawata di scohe nomber pa e bestianan. (Genesis 2:15, 19) Mas importante ainda, Adam cu Eva por a dicidi si nan ta obedece Dios of no.—Genesis 2:17, 18.

For di e tempo ei en adelante, hende a tuma miles di miyones di decision. Hopi di nan tawata bon decision, algun tawata inapropiado, y tambe tawatin decisionnan totalmente malbado. Algun mal decision cu hende a tuma a produci resultadonan desastroso. Toch, Dios no a interferi nunca cu nos derecho di scohe. Como un Tata amoroso, Dios a percura e paginanan di Bijbel pa yuda nos tuma bon decision. Tambe e ta spierta nos pa e consecuencianan di mal decisionnan cu nos tuma. Bijbel ta bisa cu nos lo cosecha loke nos sembra.—Galationan 6:7.

Decision den Asuntonan Personal

Tin algun asunto di cua Dios a bisa bon cla kico ta su boluntad relaciona cu nan, y riba esakinan el a duna nos instruccion spesifico. Sinembargo, den mayoria caso Bijbel no ta pone regla pa dirigi tur nos asuntonan personal. Mas bien, e ta duna guia general cu ta permiti preferencia- y deseonan personal. Por ehempel, tuma nota di loke Bijbel ta bisa di recreo.

E Scritura ta yama Yehova “e Dios felis.” (1 Timoteo 1:11, NW) Dios su Palabra ta papia di “un tempo pa hari” y “un tempo pa balia.” (Eclesiastes 3:1, 4) Bijbel ta conta nos cu Rei David a toca muzik pa otro hende. (1 Samuel 16:16-18, 23) Hesus a asisti na un fiesta di casamento, y el a haci algo special pa e ocasion ei door di comberti awa den biña.—Huan 2:1-10.

Sinembargo, Bijbel aptamente ta spierta: “Esun cu anda cu hende sabi lo ta sabi, ma un compañero di hende bobo lo sufri daño.” (Proverbionan 13:20) “Chansanan vulgar” y actividadnan inmoral ta ofende Dios y por kibra nos relacion cu ne. (Efesionan 5:3-5) Ora cu alcohol ta core libremente na evenementonan social, esei por resulta den problemanan serio. (Proverbionan 23:29-35; Isaias 5:11, 12) Yehova Dios ta odia violencia tambe.—Salmo 11:5; Proverbionan 3:31.

E versiculonan di Bijbel aki ta yuda nos mira recreo manera Dios ta mir’e. Ora di scohe, cristiannan ta tene cuenta cu loke Bijbel ta bisa. Claro cu na final di cuenta nos tur lo ricibi e bon of mal consecuencianan di nos propio decisionnan.—Galationan 6:7-10.

Di mesun manera cristiannan ta ser anima pa tuma decisionnan sabi di acuerdo cu principionan biblico den asuntonan manera bistimento, casamento, responsabilidad como mayor y tratonan di negoshi. Tin aspectonan di esakinan cu no ta ser menciona spesificamente den e Scritura, sinembargo e principionan cu tin den Bijbel ta yuda cristiannan tuma decisionnan basa riba nan consenshi. (Romanonan 2:14, 15) E siguiente norma mester conta pa tur decision personal cu cristiannan ta tuma: “Sea cu boso ta come of bebe of kico cu boso ta haci, haci tur pa e gloria di Dios.”—1 Corintionan 10:31.

Relaciona cu e asunto di scohe y tuma decision, ta bon tambe pa nos corda e principio di ‘atende cu nos mes asunto.’ (1 Tesalonicensenan 4:11) Hopi bes cristiannan por scohe entre varios opcion cu no ta na conflicto cu e boluntad di Dios. Pesei loke un cristian ta prefera por ta distinto for di e gusto di un otro cristian. Dios lo no keda contento si e mira su sirbidonan ta husga otro. (Santiago 4:11, 12) Bijbel ta duna e conseho sabi aki: “No laga ningun di boso sufri como . . . un cu ta mete den asunto di otro.”—1 Pedro 4:15.

E Decision di Sirbi Dios

Bijbel ta enfatisa e beneficionan di obedece Dios. Pero toch Dios no ta forsa hende ador’e. Mas bien, e ta invita su criaturanan humano pa bira su adorado. Por ehempel, Bijbel ta bisa: “Laga nos ban adora y buig te na suela; laga nos hinca rudia dilanti di SEÑOR, Esun cu a traha nos.”—Salmo 95:6.

Ta un invitacion asina antiguo Israel a haya. Mas cu 3.500 aña pasa, e nacion di Israel a para dilanti di Sero Sinai, y Dios a sera e miyones di hendenan ei conoci cu e sistema di religion berdadero incorpora den e Lei di Moises. Awor nan mester a scohe: Nan lo a sirbi Dios of no? Con nan a contesta? Unidamente nan a bisa: “Tur loke Yehova a papia, nos ta dispuesto pa haci, y nos lo ta obedecido.” (Exodo 24:7, NW) Ta nan mes a dicidi di adora Yehova.

Den prome siglo, Hesus a cuminsa cu e predicacion di e evangelio, e bon nobo di e Reino di Dios. (Mateo 4:17; 24:14) Nunca e no a forsa ningun hende haci e trabou aki. Mas bien el a invita nan bondadosamente, bisando: “Sigui mi.” (Marco 2:14; 10:21) Hopi hende a acepta su invitacion y a cuminsa predica hunto cu ne. (Lucas 10:1-9) Despues di un tempo, algun a scohe pa bandona Hesus. Hudas a scohe pa traicion’e. (Huan 6:66; Echonan 1:25) Mas despues, bou di guia di e apostelnan, hopi hende mas a bira disipel, no cu cuchiu na nan garganta, sino door di haci uzo di nan boluntad liber. Nan tawata “corectamente dispuesto” y “a bira creyente.” (Echonan 13:48, NW; 17:34, NW) Awe tambe cristiannan berdadero boluntariamente ta obedece e Palabra di Dios y ta sigui e siñansanan di Hesus.

Pues anto, ta bisto cu Dios kier pa nos uza nos capasidad di scohe y dicidi. Tambe el a percura guia den Bijbel cu ta yuda nos tuma decisionnan sabi. (Salmo 25:12) Ora di tuma decisionnan personal, cada cristian mester analisa cuidadosamente e principionan cu Dios a duna. Ta asina so nos por rindi na Dios ‘sirbishi sagrado cu nos facultad di rasona.’—Romanonan 12:1, NW.