Bo Sapatonan Ta Realmente Comodo?

“Cada ken sa unda su sapato ta pret’e.” —SUPUESTAMENTE DI UN SABIO ROMANO.

KI DIA tawata e ultimo biaha cu bo a cumpra sapato? Nan a fit bo bon? Nan tawata comodo? Cuanto bo a dura pa scohe nan? Con bon e bendedo a yuda bo? Bo a cumpra nan djis pasobra nan tawata nechi of pasobra nan tawata comodo? Con nan ta fit awor cu bo tin un par di dia ta bisti nan? Nan ta primi bo?

Cumpra sapato no ta facil. Y pa haya e size corecto ta mas kibramento di cabes. Dicon ta asina?

Con pa Haya e Size Corecto

Prome cu tur cos, cua pia ta mas grandi, bo pia rechts of esun links? Si bo ta pensa cu tur dos ta mescos, bo ta hopi kiboca! Un otro factor pa tene cuenta cu ne ta cu cada pia tin cuater tipo di fit: fit statico, fit para, fit dinamico y fit termal. Kico ta e diferencia?

E buki Professional Shoe Fitting (Midi Sapato Profesionalmente) ta bisa tocante e fit statico: “Esaki ta e manera cu e sapato ta fit ora cu e pia ta den posicion di sosiego (e cliente ta sinta).” Manera e expresion “fit para” ta indica, nan ta midi e pia ora cu e persona ta para. E posicion aki ta cambia e tamaño y forma di bo pia. E buki menciona ariba ta bisa: “Ora e pia ta den posicion di sosiego, e ta manera un saco hancho cu weso y kraakbeen aden cu diripiente ta ‘span’ ora e persona lanta para, y pesei e pia ta rekeri un otro fit e ora ei.” Pero tin dos fit mas.

E fit dinamico ta e fit di bo pia ora bo ta move: cana, core, bula of haci cualkier otro ehercicio. Esaki “ta crea un pia cu ta cambia constantemente di size, forma y proporcion.” E di cuater fit ta esun termal, cu ta referi na e cambionan cu ta tuma luga a consecuencia di cayente y humedad. E cosnan aki por aumenta e volumen di pia cu 5 porshento. Nada straño anto cu bo ta sinti un alivio ora bo kita bo sapatonan na final di dia, specialmente si bo no ta bisti e size corecto! Y hopi bes esei ta e caso.

Con Nan Ta Midi Bo Pianan?

Pa añanan largo Eric tawata cumpra sapato size 10 y mei of 11 (45-45¹⁄2), hanchura mediano. Durante e mesun periodo ei, e tawatin constantemente un lekdor ta molesti’e riba su dede krom y tambe un huña cu a crece den carni na su dede grandi links. Su pedicurista a sugerie pa laga un midido profesional di pia midi su size di sapato. Pa Eric su sorpresa, e size comodo p’e mester tawata 12 y mei (47¹⁄2), hanchura E! “E” ta indica un pia smal.a Pero djis midi e largura y hanchura di bo pia so ta basta pa garantisa cu un sapato ta keda comodo? Con bo mester midi bo pia?

E aparato di Brannock ta un instrumento popular den algun pais pa midi size di pia. (Wak e potret.) Por uz’e pa haya tres midi basico: e largura general di bo pia, e distancia di hilchi te na comienso di bo tonchi (e parti cu ta cuminsa despues di bo tenchinan), y e hanchura di bo tonchi. Claro cu cada un di bo pianan tin su propio forma y volumen. Ta pa e motibo ei nos ta pas sapato prome cu nos cumpra nan. Pero tin biaha nan por nek nos. Bo ta pas un sapato cu realmente bo a gusta, pero e ta un tiki preta. E bendedo ta bisa bo: “E sapatonan ta hancha.” Bo ta cumpra nan, y despues di un par di dia of siman ta duel bo cu bo a haci esei. Y ta asina bo siguiente lekdor, wanete na tenchi grandi of huña cu ta crece den carni ta cuminsa!

Bo Por Haya un Sapato Cu Ta Pas Perfectamente?

Ta posibel pa haya un sapato cu ta pas perfectamente? E buki Professional Shoe Fitting ta bisa simplemente cu no. Dicon no? “Debi na varios obstaculo insuperabel. . . . Ningun hende no tin dos pia di exactamente mesun size, forma, proporcion ni cu ta funciona mescos.” Pesei si un sapato ta perfecto pa bo pia mas grandi, lo e no fit mes bon na e otro pia. “Esaki no kiermen cu no ta posibel pa haya un sapato cu ta fit bon, pero solamente nos mester tene cuidou cu e palabra of idea di sapato cu ta pas ‘perfectamente.’”

Si bo kier sa unda bo pianan ta primi mas tanto den un sapato, samina algun di bo sapatonan bieu y uza. Wak e furo den e sapato. Unda bo ta mira cu ta mas gasta? Hopi biaha, e ta mas gasta na e hilchi, patras di e hilchi y na e tonchi. Kico esaki ta nifica? E ta nifica cu “cierto seccionnan di e sapato no ta pas bon cu e seccion corespondiente di bo pia. Algun seccion ta gasta di mas mientras cu casi bo pianan no ta mishi cu otro seccionnan.”

Asta e gargant’i sapato ta importante pa bo comodidad. Bo a yega di ripara cu tin diferente estilo? Cu e estilo balmoral, bo ta hala e dos klepnan hunto na e punto mas abou dje feternan. Sinembargo, si bo pia ta diki, anto e estilo blucher ta mas comodo, pasobra e punto mas abou dje feternan ta keda habri. (Wak e plachi.) Dicon e detaye aki ta importante? E mesun fuente ta bisa: “Mayoria biaha cu bo hilchi feila ta pasobra un sapato ta mucho preta na e gargant’i sapato, locual ta pusha e hilchi patras contra e sapato.”

Kico di Sapato Hilchi Halto di Hende Mohe?

E echo cu hende mohe ta gusta bisti sapato hilchi halto ta pone diferente forma di presion riba e curpa. Hilchi halto tin e tendencia di cambia e postura di curpa. Hopi bes e ta pone e curpa leun dilanti, locual na su turno, ta obliga e rudia dobla mas tanto pa e curpa por keda stret. Tambe hilchi halto ta haci e musculonan di e batata di pia mas cortico, y nan ta bira mas riparabel.

Pues, e hilchi di un hende mohe su sapato ta hopi bes e parti crucial cu ta determina si e sapato ta sinta comodo of no. Professional Shoe Fitting ta bisa cu tin tres motibo principal pakico tin sapato hilchi halto: ‘(1) “status”, por ehempel pa haci un hende mas halto, (2) motibonan estetico, pa e sapato tin un diseño of estilo adicional y (3) miho aparencia, pasobra sapato hilchi halto di hende mohe ta duna nan pal’i pia mas forma.’

Hende mohe mester tene cuenta specialmente cu e posicion di e hilchi, pasobra esei ta determina na unda e peso di curpa ta primi riba e hilchi. Si tur e peso ta cai na e parti patras of parti dilanti dje hilchi, esei lo por causa problema. Dicon? Pasobra e por pone e hilchi bira, y asina causa un mal caida.

For di e analisis cortico aki, ta bisto cu pa haya e sapato cu ta fit bo pia bon ta tuma tempo y kisas asta mas placa, ya cu ta costa mas tempo pa produci un bon sapato. Pero bo sapatonan por tin gran influencia riba bo bienestar general y asta riba bo salu. Pesei tuma bo tempo. Percura haya e midi corecto. Tene pasenshi. No laga moda of e manera cu e sapato a keda, nek bo.

[Nota]

[Cuadro na pagina 20]

Puntonan pa Tene Cuenta cu Ne ora di Scohe Sapato

William A. Rossi y Ross Tennant ta ofrece e siguiente sugerencianan den nan buki Professional Shoe Fitting.

“E proposito di midi pia no ta, manera algun hende ta kere, pa determina ki size exacto bo mester bisti.” Dicon no? Pasobra e size di sapato ta ser influencia door di hopi factor, manera haltura di e hilchi, estilo, patronchi, material uza y marca di e sapato. Esaki ta specialmente cierto awe cu sapatonan ta ser fabrica den asina hopi pais cu normanan distinto.

Ora un hende ta midi bo pia, hala e punta di e meña dilanti pa asina bo tenchinan no keda dobla, sino bo ta haya un midi cu no ta cuadra.

Con bo mester midi bo pia? Sinta of para? “Midi pia di un cliente cu ta sinta, ta e manera floho di hacie.” Y e resultado ta un midi robes. Pesei, lanta para pa laga nan midi bo pianan. Si, ambos pia. No asumi cu e pia robes ta mas grandi. Midi tur dos!

“Ta solamente un grupito di persona hopi bon entrena ta duna e servicio exclusivo di midi pia na un manera profesional. Nan ta traha den cooperacion estrecho cu un cantidad di negoshi igualmente selecto cu tambe ta compronde y aprecia e importancia di midi pia door di un profesional.”

[Diagramnan na pagina 19]

(Pa e texto den su formato completo, wak e publicacion)

zool

material parti pafo

gargant’i sapato

hielpand

parti dilanti di e hilchi

tapita

wreefnaad

material parti pafo

cosi di leng’i sapato

Componentenan di un sapato

furo

boca

cosi

cusinchi di hilchi

hilchi

[Plachinan na pagina 20]

Aparato di Brannock

[Plachi na pagina 21]

Tur diseño di sapato ta basa riba e shete estilonan basico aki

[Plachinan na pagina 21]

Estilo di gargant’i sapato

Blucher

Balmoral