E Gran Migracion

DI E CORESPONSAL DI SPIERTA! NA KENIA

EZONIDO di un miyon pata na careda tawata manera strena. E trupa grandi di curpa den movecion tawata bai dilanti, y a lanta un nubia grandi di stof cora. E bestianan pia fini na careda, a pasa riba vaye- y seronan cu ta subi baha, y nan a crusa sabananan habri y riunan grandi y chikito. Nan a move den un ola grandi, lagando atras un caminda hancho di yerba corta te na raiz. E inmenso tou di criaturanan cu tawata grita y core den panico ta forma un di e espectaculonan natural di mas impresionante di bestia di mondi riba tera: e gran migracion di wildebeest of gnu.

Africa Su Hofi di Eden

Serengeti ta un area salbahe. Situa den e paisnan di Tanzania y Kenia, e ta un inmenso sabana di tereno cu ta subi y baha, y ta encera un area di mas o menos 30.000 kilometer cuadra. E suela ta cubri cu un capa di tera volcanico nutritivo, loke ta crea condicionnan ideal pa e tapijt di yerba berde cu ta tapa e luga. Tambe tin areanan di mondi di palo di hubada y palo di sumpiña di sabana cu ta percura

blachi pa olifantinan cu ta cana na trupa busca cuminda. Trupanan di zjiraf ta cana elegantemente riba e sabana cu stapnan largo y lento.

Den algun area tin formacion di baranca di granit—cu a bira lizo door di biento y awasero—meimei di e sabana, y nan ta luganan ideal pa leon cu leopardo drumi vigila e tereno. Riunan cu stroom di awa fuerte ta crusa door di e tereno, y nan ta patapata di hipopotamo y crocodil. Riba e sabananan habri bo por mira trupa di masha hopi sorto di antilop ta come yerba, entre nan, wildebeest, hartebeest y topi. Zebranan yen di sed ta reuni na e plasnan di awa y nan ta keda manera un coyar di cralchi preto cu blanco rond di e plasnan. Cu masha facilidad gazel cu impala ta crusa e sabana cu saltonan halto durante nan careda. Trupanan grandi di bufalo (kafferbuffel), cu nan cachonan masivo y lora y curpa muscular, ta come trankilamente, rancando boshi di yerba cu nan boca grandi.

Serengeti tin masha hopi famia di leon. Durante e cayente di dia nan ta haci floho den sombra di palo y mata, wardando pa ora bira mas fresco anochi pa nan yag. Leopardonan tur pinta ta casi invisibel ora nan ta drumi, colga elegantemente den e takinan halto di palo, y camufla door di e rayonan di lus cu ta penetra door di e blachinan. Cheetah (un tipo di leopardo) ta haya e sabananan habri un luga ideal pa e por core cu speed di jet. Su curpa delega ta bira wazig ora e ta core riba sabana tras di un victima.

En berdad, e sistema ecologico di Serengeti ta un paradijs di bestia, y ta algo maraviyoso pa observa. Pero ta e trupanan inmenso di wildebeest ta produci un di e maraviyanan natural di mas impresionante den mundo di bestia.

E Payaso di Sabana

Segun calculo tin 1,5 miyon wildebeest ta cana rond na Serengeti. Wildebeest ta un criatura cu un aparencia straño. Su cabes ta largo y su wowonan cu ta lombra ta situa leu for di otro te na e parti ariba di su cabes. Su cachonan manera di baca ta haci un curva leve bai abou, caba ta bai di banda y despues ta bolbe lora ariba. Su lomba ta bai scuin abou na su patanan patras, cu ta parce debil y fuera di proporcion cu su scouder y garganta fuerte. Pianan fini ta carga e peso di e curpa pisa di wildebeest. E barba largo y poco blanco cu e tin bou di su cachete, su lananan preto na garganta y su rabo manera di cabai, ta pone cu e wildebeest parce un combinacion di varios bestia.

Ta un gracia pa mira e payasadanan di wildebeest. Ora nan ta den trupa grandi, nan ta saca un zonido cu ta parce un coro di miles di dori. Ora nan ta para riba e sabananan habri, nan tin manera un mirada confundi y sorprendi segun cu nan ta wak kico ta pasa rond di nan.

Tin biaha un wildebeest macho ta saca un careda riba e sabana, saltando di banda y coriendo den ronchi. Sagudiendo su cabes e ta lanta riba su pianan patras y ta keda bula bai bini teniendo su patanan stijf, y lantando stof na un manera masha pret. Tin hende ta bisa cu e accionnan aki ta pa impresiona e embranan of pa spierta e otro machonan door di duna un show di su habilidad extraordinario. Pero tin biaha ta parce cu e macho simplemente tin gana di haci wega.

Wildebeest Ta Nace den un Mundo Hostil

Ora ta e tempo apropiado, wildebeest ta cuminsa werp. Nan tin e habilidad unico di sincronisa nacemento di nan yiunan, di manera cu 80 pa 90 porshento di nan yiunan ta nace den un periodo di tres siman. Durante e tempo aki e tou ta aumenta cu miles di yiu di wildebeest cu ta grita. Cada mama mester sera lihe cu su yiu, pasobra si e tou cuminsa core den panico, mama cu yiu por separa facilmente, y e yiu lo tin masha tiki chens di sobrevivi riba su mes.

E yiunan ta nace den un mundo hostil di bestianan yagdo cu ta semper alerta. E embranan ta warda te ora cu no tin ningun señal di peliger pa nan werp. Sinembargo, si un bestia yagdo sorprende nan, nan tin e habilidad increibel di para e proceso di werp y core bai. Anto mas despues, ora no tin menasa di peliger, nan por completa e nacemento di nan yiu.

Parse cu e yiu mes tin un sentido natural di peliger y den un par di minuut despues cu el a nace e ta riba pia. Despues di un siman, e por core riba sabana na un velosidad di 50 kilometer pa ora.

Tempo pa Move

Wildebeest ta migra den trupanan grandi atrabes di Serengeti. E motibo principal pakico nan ta move masalmente ta awasero. Caida di awasero ta ser dirigi door di patronchinan di weer cu ta sigui un ciclo anual. Henter aña awasero sa cai na un of otro parti di e inmenso sabana aki.

Wildebeest tin mester di awa tur dia y un suministro constante di yerba pa come. Tanten cu tin cuminda y awa, nan ta keda den e area. Pero ora cu e temporada di secura dal aden, e yerba di sabana ta seca y e fuentenan di awa ta disparce. E trupanan di wildebeest no por warda te ora awasero bolbe cuminsa cai. Nan tin cu bai caminda awasero ta cai.

Na unda cu awasero cai, e sabananan seco ta ser transforma rapidamente. Den un par di dia, yerba berde ta spruit y produci un tapijt berde di yerba. E blachinan tierno aki tin hopi nutricion y vocht, un atraccion poderoso pa wildebeest.

E criaturanan aki tin e habilidad di detecta caminda awasero ta cai, asta for di un distancia grandi. Ningun hende no sa sigur con nan por sa cu awasero ta cai na un otro parti di Serengeti. Ta mira nan ta mira e nubianan scur den laira for di un distancia of ta hole nan ta hole e humedad den e aire seco? Di tur manera, pa e tou sobrevivi, e tin cu move. Y ta move mes nan ta move!

Un Biahe Peligroso

Na principio e salida ta pocopoco. Wildebeest ta criaturanan cu gusta compania; ora un bestia cuminsa cana bai den un cierto direccion, e otronan rond di dje ta stop di come yerba y purba siguie. Un poco despues, henter e tou ta bai dilanti den un exodo dramatico. Sed cu hamber ta pone nan move bai. Tin biaha nan ta core. Otro biahanan, nan ta lastra un tras di otro den filanan largo, creando roinan hundo den e tereno yen di stof.

Durante nan biahe nan ta confronta hopi peliger. Bestianan yagdo ta sigui e inmenso trupa di wildebeest, vigilando cualkier bestia cu ta cana pocopoco, ta cococha of ta malo. Segun cu e wildebeestnan ta avansa, nan ta drenta teritorio di famianan di leon, cu ta warda den emboscada. Scondiendo den e yerba largo, e leonnan ta core bai riba e trupa di bestia cu ta comiendo y ta pone nan plama den panico. Leopardo, cheetah, cacho salbahe y hiena, tur ta probecha di cualkier bestia cu no ta keda pareu cu e tou of cu ta dual bai for di e trupa principal. Ora nan mata un wildebeest, samuronan ta presenta. Esakinan ta pleita y bringa pa e restonan y e unico cos cu nan ta laga atras ta un skelet, cu ta para blikia den e solo cayente di Africa.

Riunan cu stroom di awa fuerte ta crea bareranan formidabel cu e trupa mester crusa. Crusamento di riu ta un evento espectacular, ora cu miles di bestia ta bula for di e canto halto te den e awa abou. Mayoria di nan ta yega sano y salvo na otro banda. Pero stroom di awa ta lastra algun bai cu ne of crocodil cu ta warda djis bou di superficie di awa, ta come nan. E biahe peligroso aki ta tuma luga tur aña. Ora nan termina, nan a cubri podise un distancia di mas o menos 3.000 kilometer.

Hende—E Yagdo di Mas Grandi

Pa miles di aña, hende tawatin masha tiki impacto riba e migracion di wildebeest. Pero awor hende ta forma e menasa di mas grandi pa e espectaculo aki. Den decadanan resien, gobierno di Tanzania y di Kenia a purba proteha e bestianan di Serengeti. Sinembargo, maske e migracion di wildebeest ta tuma luga pa gran parti denter di e fronteranan proteha di santuarionan di naturalesa, miles di bestia ta ser gara ilegalmente den trampa y mata door di yagdo. Arma cu trampanan di waya, flecha venenoso y scopet, nan ta yag riba e bestianan pa haya carni y souvenir pa bende cu hendenan cu ta ansioso pa cumpra esei. Tin un ehersito di bewaker y ranger ta patruya e areanan proteha, pero Serengeti ta asina grandi cu ta casi imposibel pa proteh’e completamente. Segun cu poblacion humano ta crece, tin tambe mas presion pa haci uzo di e sabananan fructifero aki. Un cuestion controversial cu constantemente hende ta debati ariba ta si mester aparta terenonan grandi asina pa bestia di mondi.

Un tempo, miyones di bison tawata cana rond riba e sabananan di Norte America. Awor nan tur a disparce. Tin hende ta teme cu e mesun destino ta spera e ultimo trupanan grandi di wildebeest na Oost Africa. Lo ta hopi tristo si nos mester ta testigo di e desaparicion di un maraviya natural impresionante asina. Nos ta anhela e dia ora cu bou di Dios su gobernacion husto, hende cu bestia lo biba den balansa y harmonia perfecto. (Isaias 11:6-9) Mientrastanto, e suseso espectacular aki lo sigui impresiona nos: e gran migracion di wildebeest.

[Plachi na pagina 18]

Trupanan tin cu crusa riunan cu stroom di awa fuerte