Hobennan Sa Puntra . . .

Ta Consehabel pa Mi Wak Videoclip?

“Videoclip ta great. Tin di nan ta manera un pelicula cortico. Nan ta conta un historia, y mi ta gusta wak e pasonan di e bailenan.”—Casey.

“Nan ta un bon manera pa descubri muzik nobo. Nan ta laga bo sera conoci cu mas cantica cu solamente e top 40 normal. Tambe videoclip por ta un bon cos pa combersa di dje.”—Josh.

“Detayenan di un videoclip ta importante pa mi: ken ta e cantante, kico e tin bisti, con e ta actua. Tur e cosnan aki hunto ta splica e nificacion di e letranan.”—Kimberley.

“Mi gusta wak kico mi bandanan faborito ta bai haci e biaha aki. Mi stima e efectonan special. Y tin videoclip pret. Pero, bo tin cu tene cuidou.”—Sam.

KISAS abo tambe ta gusta wak videoclip. Tempo cu nan a cuminsa pasa nan na television, nan tawata produccionnan basta simpel y barata. Pero ora a resulta cu videoclip no tawata un moda pasahero y cu nan tawatin un tremendo impacto riba benta di disco, rapidamente nan a bira mas y mas sofistica, tanto riba tereno artistico como tecnico. Awe nan ta un parti importante di mundo di muzik y a resulta masha popular mes serca hobennan. Den algun pais tin canalnan di television cu ta pasa videoclip so henter dia!

Pero dicon hobennan manera Sam, cita na banda, ta bisa cu mester tene cuidou? Acaso videoclipnan por tin un efecto negativo riba bo? Nan lo por perhudica bo manera di pensa y bo balornan moral of asta daña bo relacion cu bo Creador? E preguntanan ei kisas ta parce un tiki exagera. Pero pensa riba esaki: Si bo ta bayendo lama pa landa, y canto di caminda bo ta mira borchinan cu ta bisa cu ta peligroso pa landa einan, lo ta sabi pa ignora e spiertamentonan ei? No. Wel pesei, lo ta sabi di bo parti pa analisa algun spiertamento relaciona cu videoclip.

E Areanan di Peliger

Na prome luga, bo tin cu reconoce e echo cu loke bo ta wak y tende por influencia bo! Bijbel ta bisa nos cu Saul, e prome Rei di Israel, a uza muzik pa un bon proposito: pa calma su emocionnan. (1 Samuel 16:14-23) Ta posibel cu muzik tin un efecto negativo tambe? E buki Rock and Roll—Its History and Stylistic Development (Historia y Desaroyo di Estilo di Rock and Roll) ta enfatisa e punto aki: “Esun no ta bai sin e otro. Si nos ta admiti cu musica di rock tawatin efectonan positivo (manera ta e caso), nos mester ta dispuesto pa admiti tambe cu e tawatin efectonan negativo (manera ta e caso). E persona cu orguyosamente ta declara: ‘Ai, ami ta scucha e muzik, pero e no ta haci mi nada’, sea ta hopi kens of hopi mal informa.”

Bes tras bes Bijbel ta hala atencion na e influencia cu nos wowo tin riba nos manera di pensa y riba nos emocionnan. (Proverbionan 27:20; 1 Huan 2:16) Pesei door di agrega elementonan visual potente na muzik, productornan di videoclip ta aumenta drasticamente e efecto cu muzik tin riba e oyentenan. Ki sorto di elementonan visual nan ta uza normalmente?

Segun un investigacion, un 57 porshento di video di rock ta contene actonan violento. Un 76 porshento ta presenta actividadnan sexual. Un otro analisis resien a saca afo cu 75 porshentu di videoclip cu ta conta un historia, tin tambe imagennan sexual, y mas cu mita ta trata di violencia, por lo general contra hende mohe. Pues, wakmento di e tipo di videonan ei realmente por perhudica bo? Un revista a mustra cu “investigacionnan di experimento a saca afo cu wakmento di videoclip eigenlijk por influencia adolecentenan su actitud pa cu actividad sexual na un edad jong of actividad sexual cu no ta safe.” Y ningun hende no por nenga cu segun cu musiconan ta purba presenta algo cu ta mas escandaloso cu di tur otro musico, videoclipnan en general ta bira mas y mas bibo y detaya.

Un experto riba tereno di educacion a comenta: “Hopi hende ta bisa cu loke nan ta tende—y mira, danki na videoclipnan—no ta diferente for di e influencia musical di generacionnan di antes . . . Pero ta parce cu mayoria artista djawe di un manera arogante ta uza palabra malo y cosnan sumamente straño y extremo como medionan aceptabel pa aumenta nan benta di disco.” Y e revista Chicago ta bisa di e hendenan cu ta wak un cierto canal di videoclip: “Nan ta ser bombardia nonstop cu pornografia leve pero sumamente probocativo.”

E revista Chicago ta describi tambe un videoclip den cua “un homber hoben sinta na bali di un restaurant ta leun su cabes mucho patras. Un corta grandi cora cora ta sali na su garganta y su cabes ta kita cai.” Un otro video supuestamente ta mustra un homber haciendo un striptease sangriento, durante cua e ta kita tambe su carni y su musculonan. E video tawata mustra tambe otro cosnan demasiado escandaloso pa menciona.

Wel, algun hende kisas ta rechasa e echonan aki, pretendiendo cu e videonan describi aki ta exagera y cu mayoria di nan no ta dje malo ei. Tin hende asta ta bisa cu nan no ta haya e videoclipnan echt escandaloso of ofensivo. Pero esei kisas no ta indica simplemente cu e personanan ei a perde heful door di a wak e videonan ei bes tras bes? Casey, e yoncuman cita den e introduccion, ta admiti: “Si bo no pone limite na kico bo ta wak, loke na principio tawata sumamente extremo y ofensivo, cu tempo ta bira normal. Inconcientemente, bo kier algo mas extremo y pasivamente bo ta acepta loke antes bo tawata haya masha ofensivo.”

Kico lo por ta e resultado? Lo e por daña bo capasidad di tuma decisionnan moralmente sano. Debi cu ta masha facil pa nos mente ser influencia den un manera negativo, Bijbel ta anima nos pa “proteha sabiduria practico y habilidad di pensa.” (Proverbionan 3:21, NW; 5:2, NW) Un otro resultado negativo ta cu esei por daña bo amistad cu Yehova Dios. Esei no ta e cos di mas balioso cu bo tin? Pesei bo tin cu proteha e amistad ei door di tuma medida pa evita tur tipo di dibirticion inapropiado. Con bo por haci esei?

Con pa Proteha Bo Mes

Na prome luga, por fabor acepta cu ta malo pa wak esenanan cu abiertamente ta ignora loke Bijbel ta condena claramente. (Salmo 11:5; Galationan 5:19-21; Revelacion 21:8) Ora cu un videoclip ta glorifica cosnan cu no ta ‘pas pa hende santo’, bo mester ta dicidido pa stop di wak. (Efesionan 5:3, 4) Ta berdad cu kisas no ta facil pa cambia canal—of paga e television—ora tin un videoclip excitante ta pasa. Pesei podise bo tin cu resa manera e salmista cu a skirbi: “Kita mi bista for di banidad.”—Salmo 119:37.

Kisas di mes bo ta hororisa pa wak videonan cu ta ofensivo manera esnan cu nos a describi mas prome. Sinembargo, algun video ta parce di uza un presentacion mas fini. Esenanan di sexualidad kisas ta cortico of pasahero. E letranan y e imagennan kisas ta aregla y combina na un manera masha astuto mes pa promove algun punto di bista malbado sin cu hamas nan ta bisa of mustra esei abiertamente. No obstante, si bo ta sinti bo maske ta un tiki culpabel pasobra bo a wak un cierto video, probablemente e tawatin un of otro aspecto cu no tawata sano of cu no a cuadra cu normanan cristian. Pesei con bo por dicidi kico pa wak y kico pa evita ora cu no ta masha bisto cu e ta decente of no?

Claro cu ta bo mayornan tin e responsabilidad di dicidi kico bo por wak y kico no, y ta abo cu nan tin cu dicidi si bo ta wak videoclip of no. (Efesionan 6:1, 2) Pero si bo mayornan ta laga bo wak videoclip, bo mester ser guia door di mas cu simplemente loke abo ta sinti ta corecto. Hebreonan 5:14 ta anima nos pa ‘entrena nos mente pa discerni loke ta bon y loke ta malo.’ Nos por entrena nos capasidad di discerni (of di distingui cosnan) door di studia principionan di Bijbel, cu ta duna nos un sistema pa determina loke ta bon y loke ta malo for di e punto di bista di Yehova. Door di medita riba e principionan di Bijbel ei, lo bo por reconoce loke ta peligroso pa bo salu spiritual, asta ora cu no tin un regla biblico spesifico pa guia bo.

Pero, cua principionan di Bijbel spesificamente por guia bo relaciona cu wakmento di videoclip? Den un siguiente articulo nos lo trata esaki.

[Comentario na pagina 13]

“E persona cu orguyosamente ta declara: ‘Ai, ami ta scucha e muzik, pero e no ta haci mi nada’, sea ta hopi kens of hopi mal informa”

[Plachinan na pagina 14]

Di berdad bo por wak algo cu no ta sano, sin cu e ta influencia bo?