Donnan Special Cu Ta Haci Nos Unico

‘E cientifico ta studia naturalesa pasobra e ta disfruta di dje, y e ta disfruta di dje pasobra e ta bunita.’—JULES-HENRI POINCARÉ, CIENTIFICO Y MATEMATICO FRANCES (1854-1912).

POINCARÉ a admira e beyesa di naturalesa masha hopi mes, particularmente e “beyesa mas profundo” di orden y harmonia cu ta atrae e mente di un cientifico. Sinembargo, bo no mester ta un cientifico pa bo aprecia e beyesa y orden cu tin rond di nos. Un 3.000 aña pasa, e salmista David a ser conmovi profundamente pa e diseño cu el a mira den creacion, specialmente e diseño di e curpa humano. Pesei el a resa: “Mi ta alaba bo, pasobra mi ta traha na un manera temerosamente maraviyoso; maraviyoso ta bo obranan, y mi alma sa esei masha bon.”—Salmo 139:14.

E sintimentonan ei di asombro y respet profundo ta algo unico cu hende so ta sinti, nan ta fuera di e capasidad di e bestia di mas inteligente. Sinembargo, nos interes den naturalesa ta bai mas profundo ainda. Hende di tur edad cu sa para keto na cosnan di bida, a yega di puntra: Kico ta e fuente di e diseño asombroso cu tin den tur loke ta biba? Si, con bin ta existi sernan bibo? Y kico ta nos debido luga den e areglo aki? Ni ciencia ni nos propio rasonamento al respecto no por contesta e preguntanan aki. Pero Bijbel, cu ta inspira door di Dios, si ta duna contestanan realmente satisfaciente.—2 Pedro 1:20, 21.

E antiguo buki sagrado aki ta splica cu nos caracteristicanan unico como hende ta door cu nos a ser crea “segun e imagen di Dios.” Esei kiermen cu nos tin e capasidad di refleha (aunke na un grado menor) e caracteristicanan di e personalidad di nos Creador. (Genesis 1:27) Pesei aunke nos no tin wowo di aguila, nos por desplega sabiduria penetrante. Nos oido no por para banda di esun di un raton djanochi, pero nos por disfruta di combersacion, muzik y zonidonan agradabel di naturalesa. Y aunke nos no tin un compas interno, nos por haya e miho guia den bida door di acudi na Bijbel Santo, e Palabra di Dios.—Proverbionan 3:5, 6.

E echo cu nos a ser crea segun e imagen di Dios ta e motibo tambe dicon ta nos so tin un necesidad spiritual. “Hende lo no biba di pan so, ma di tur palabra cu ta sali for di boca di Dios.” (Mateo 4:4) Abo ta ingeri e expresionnan refrescante ei cu regularidad door di lesa Bijbel?

Si nos ta alimenta nos mes spiritualmente cu e Palabra di Dios, nos lo por compronde cosnan mucho mas aya di loke nos sentidonan fisico ta permiti nos. Con asina? Door di edifica nos fe. Fe berdadero, basa riba Bijbel, ta haci posibel cu nos por “mira” e Dios invisibel—mescos cu Moises a mir’e—y tambe distingui kico ta Su proposito pa futuro.—Hebreonan 11:1, 27.

Un Futuro Glorioso pa Esnan Cu Ta “Mira” Dios

Bijbel ta siña nos cu e Creador, Yehova Dios, ta stima e tera y tur criatura cu ta biba riba dje, specialmente hende cu ta teme Dios. Pesei e ta priminti di trece un fin na tur e malbadonan, incluso esnan cu na un manera haragan ta “destrui e tera.” (Revelacion 11:18; Salmo 37:10, 11; 2 Tesalonicensenan 1:8) Despues di esei, Dios lo duna bida eterno na hende cu ta stim’e y obedec’e. Ademas, nan lo yuda comberti henter e planeta den un paradijs cu lo ta yen yen di bida. Ki un prospecto maraviyoso!—Lucas 23:43.

Imagina tur loke lo bo por haci y descubri ora cu lo no tin fin na bida ni na bon salu! Un cientifico a skirbi: “Semper naturalesa lo tin cos nobo, cos na abundancia y beyesa cu ta inagotabel.” Bijbel ta expres’e asin’aki: “[Dios] a traha tur cos apropiado na su tempo. Tambe el a pone eternidad den nan curason, sin cu hende por haya sa e trabou cu Dios a haci for di principio te na fin.”—Eklesiastes 3:11.

Con bo por forma parti di e Paradijs cu Bijbel ta describi? Door di siña tocante Dios su proposito awor y practica loke bo ta siña. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”—Huan 17:3.

[Plachi na pagina 10]

Uza bo sentidonan pa cultiva aprecio pa e Creador

[Plachi na pagina 11]

E miho manera pa siña conoce bo Creador ta door di lesa Bijbel