Un Homber Cu A Scohe pa Obedece Dios

DEN e dianan scur di aña 1937, ora cu ideologianan na conflicto cu otro tawata causa tension den hopi pais Europeo, cristiannan berdadero a confronta decisionnan dificil. Nan mester a obedece Dios of hende? (Echonan 5:29) Mucha hombernan cu tawatin edad pa drenta servicio militar, tawata sa cu obedece Dios por a costa nan nan bida.

Antonio Gargallo tawata un mucha homber Spaño di 19 aña cu a confronta un decision asina. E guera civil na Spaña ya tawatin mas o menos un aña andando ora cu e ehersito nacionalista di General Franco a manda yama Antonio pa servicio militar. E aña anterior Antonio a batisa como Testigo di Yehova, y el a lesa e conseho biblico cu ta bisa cu sirbidonan di Dios mester keda neutral y ni sikiera train pa guera. (Isaias 2:4; Huan 17:16) Antonio no kier a bira solda y mata su compatriotanan, pesei el a purba hui bai Francia. Pero nan a arest’e y hib’e un barak di ehersito na Jaca, Huesca, serca di frontera Frances.

Un tribunal militar sin misericordia a bis’e cu e tin cu scohe: Drenta ehersito of ser ehecuta. Antonio a dicidi di obedece Dios. Un poco prome cu su ehecucion, el a skirbi e siguiente carta pa su mama y su ruman mohe, kendenan no tawata Testigo di Yehova.

“Nan a aresta mi, y sin sikiera scucha mi, nan a sentencia mi na morto. Awenochi lo mi stop di existi riba mundo. No bira tristo ni yora . . . , pasobra mi a obedece Dios. Di tur manera, mi ta perde masha poco pasobra, si Dios kier, lo mi tin un bida nobo y miho . . . Mi ta sinti mi masha trankil segun cu mi ultimo ora ta yega. Ricibi un ultimo abraso di boso yiu y ruman cu realmente stima boso.”a

Tres solda a raporta cu riba caminda pa ser ehecuta, Antonio tawata canta canticanan di alabansa na Yehova. Dios ni su Yiu no ta keda sin tuma nota di e tipo di sacrificionan ei. Nos por tin sigur cu cristiannan fiel, manera Antonio, lo ricibi nan recompensa mediante un resureccion.—Huan 5:28, 29.

[Nota]