Desplegando Amor den Tempo di Angustia
DI E CORESPONSAL DI SPIERTA! NA NIGERIA
DIADOMINGO, 27 di januari 2002, a ser yama Diadomingo Preto na Lagos, Nigeria. Un explosion den un deposito di arma bou di tera a sagudi henter e stad violentamente y a ilumina shelo djanochi. Durante varios ora explosionnan a causa un yobida di proyectil, piedra y otro cosnan te cu tres kilometer leu, ocasionando panico den e stad.
Rumornan straño a causa mas miedo. Multitudnan di hende morto spanta a core subi caya, sin sa di kico nan tawata hui ni na unda nan tawata bai. Den e scuridad djanochi, centenares di hende, incluso hopi mucha histerico, a core drenta den un canal cu awa trubel y a hoga. Cas-, scol- y establecimentonan comercial a ser destrui of a sufri daño considerabel, lagando miles di hende sin cas y sin trabou. Nan ta calcula cu mas o menos 1.000 a perde nan bida den e tragedia. Calculonan mas despues ta menciona un cantidad asta mas halto.
Un cantidad di 1.350 bom, raket y granada di man cu no a explota a ser recupera for di areanan residencial rond di e instalacion militar caminda e explosionnan a tuma luga. Un homber a haya un obheto di metal den su sala. Sin realisa cu tawata un bom, el a coh’e, pon’e den bahul di su auto, y hib’e bek pa autoridadnan.
Ora cu e oficina di sucursal di Nigeria di Testigonan di Yehova a tende e noticia di e explosionnan, nan a tuma contacto mesora cu un anciano na Lagos y a manda e 16 superintendentenan biahero den e area pa evalua e situacion di e 36.000 Testigonan na Lagos. E sucursal a manda un miyon naira (mas o menos 18.000 florin Rubiano), hunto cu instruccion pa forma un comite di ausilio pa duna yudansa.
Di e Testigonan di Yehova, ta un homber a resulta seriamente herida door di fragmentonan di bom; lamentablemente, dos señora hoben a perde nan bida; y dos Salon di Reino y cas di 45 famia a sufri daño.
Dia 2 di februari 2002, seis dia despues di e explosion di municion, a lanta un conflicto etnico den un otro parti di e stad. Segun Crus Cora, e bringamento ei tawatin un saldo di 100 morto, 430 herido, 50 cas kima y 3.000 hende a haya nan obliga di bandona nan cas. E comite di ausilio cu tawata atende e necesidadnan di e victimanan di e “Diadomingo Preto”, rapidamente a bai busca drechi di nan rumannan cristian den e area ei.
Na e ocasion ei ningun di e Testigonan no a perde nan bida, ya cu mayoria di nan tawata na un asamblea di sircuito ora cu e bringamento a cuminsa. Sinembargo, hopi miembro di e cinco congregacionnan den e area no a haya nan cas ora nan a regresa. Mesora nan rumannan cristian a tuma nan den cas. Un Testigo docter cu su casa a duna alohamento na 27 persona cu a haya nan obliga di bandona nan cas.
E Testigonan na Lagos cu no a ser afecta door di e explosion ni door di e bringamento etnico, generosamente a contribui cu alimento, paña y articulonan di cas. E superintendente di ciudad a informa: “Loke e rumannan di e area di Lagos ta contribui cu ne ta hopi mas di loke esnan afecta tin mester.” E sucursal mester a skirbi e congregacionnan i pidi nan pa no manda mas contribucion. Asina mes a yena tres truck cu articulonan cu a resta, y a manda nan sucursal pa warda den deposito.
Ancianonan di congregacion a bishita hopi victima y tambe famia di esnan cu a muri. Nan a purba duna consuelo biblico. E comite di ausilio a organisa reparacion di e casnan cu a ricibi daño. Nan a percura pa e victimanan di ambos desaster haya articulonan di cas, paña y alimento y a yuda esnan cu mester a bandona nan cas, pa nan haya alohamento mas safe. Na total e comite a yuda 90 famia y persona individual.
Hopi victima a keda masha emociona cu e yudansa cu nan a ricibi. Un Testigo a bisa e comite di ausilio: “Tanten mi ta na bida, lo mi haci Yehova mi ‘refugio y fortalesa’!”—Salmo 46:1, 2.
Personanan cu no ta Testigo a tuma nota di e manera cu Testigonan di Yehova a percura pa otro durante e crisisnan aki. Omo di un di e Testigonan cu a fayece a bisa e ancianonan di e congregacion caminda e ruman mohe tawata asisti: “Lo mi bin bek pa gradici boso manera mester ta y pa siña mas.” Y el a bisa su famianan: “Loke mi a mira na Lagos ta maraviyoso. Ni famianan no a haci loke e hendenan aki a haci.”
[Plachi na pagina 29]
Un truck carga cu articulonan di ausilio
[Plachi na pagina 29]
Algun persona cu a ricibi yudansa
[Plachi na pagina 30]
E pareha aki a duna alohamento na 27 persona
[Plachi na pagina 30]
Testigonan trahando riba un cas cu a sufri daño
[Reconocemento pa Potret na pagina 29]
Ariba: Sam Olusegun – The Guardian