Pronto—Un Mundo sin Droga
Bo por imagina un mundo sin uzo di droga?
SECRETARIO GENERAL di Nacionnan Uni, Kofi Annan, a haci un yamada riba tur nacion pa nan traha pa logra un mundo asina. El a declara: “Nos tin cu dal pasonan nobo y balente pa combati e maldad aki; e plaga aki cu a gara demasiado yiu di nos.”
Aunke lidernan kisas ta di acuerdo pa reduci e produccion y distribucion mundial di droga ilegal, esaki ta un tarea hopi dificil. Hennadiy Udovenko di Ucrania, sirbiendo como presidente di un sesion special di e Asamblea General di Nacionnan Uni, a declara cu “e negoshi di narcotrafico ta un di e negoshinan clandestino di mas rendable, cu un balor calcula di mas cu 400 mil miyon dollar pa aña, . . . y por corumpi of destabilisa mercadonan financiero mundial.” El a agrega cu e problema di droga “a bira un fenomeno mundial y ningun nacion no por sinti cu e menasa aki no ta conta p’e.”
Ta dificil pa imagina un mundo sin droga peligroso. Gobiernonan humano sigur a demostra di no por elimina nan. Sinembargo, ningun hende no por stop Dios Todopoderoso di cumpli cu su proposito di trece un paradijs riba tera, den cua tur necesidad emocional, fisico y spiritual lo ser satisface. (Salmo 145:16; Lucas 23:43; 2 Pedro 3:13) Segun profeta Isaias, e palabra di Dios ‘lo no bolbe bashi serca dje, sin cumpli cu loke E ta desea, y sin alcansa e proposito cu cual El a mand’e.’—Isaias 55:11.
Speransa den e promesanan ei por produci beneficionan dramatico for di awor. Por ehempel, Edmundo tawata uza droga. Pero door di acepta e promesa biblico di un husto mundo nobo, el a sintie conmovi pa reevalua su bida. Awor Edmundo ta bisa: “Esta bobo mi tawata di malgasta mi tempo.” Teniendo awor e deseo di keda cu Dios su aprobacion, e ta motiva pa keda liber di droga. Si, conocemento di Dios y di su promesanan por motiva nos awor pa “bisti e hende nobo [“e personalidad nobo”, NW], cu a wordo crea segun Dios den husticia y santidad berdadero.”—Efesionan 4:24.
Masha hopi hende mes cu antes tawata den droga, tambe ta disfruta awor di un relacion intimo cu nan Creador. Pa nan, e palabranan di e salmista tin un nificacion special: “No corda e picanan di mi hubentud, ni mi transgresionnan; conforme bo misericordia, corda riba mi, pa motibo di bo bondad, o SEÑOR. SEÑOR ta bon y recto; pesei E ta instrui pecadonan den e caminda.” (Salmo 25:7, 8) Ta ki un gran consuelo pa mayornan di yiunan cu a dual, sa cu nan yiunan por cambia! Cu esfuerso diligente, mayornan por yuda nan yiunan hoben resisti e plaga di droga y haya un ‘gara di e bida berdadero’, cu lo ser realisa den Dios su mundo nobo.—1 Timoteo 6:19.
[Plachinan na pagina 10]
E speransa di biba den Dios su mundo nobo a motiva hopi uzado di droga pa cambia nan bida