Hobennan Sa Puntra . . .

Con Mi Por Ta Selectivo cu Videoclip?

“Asina mi mira e nomber di un banda of cantica dudoso, mi ta cambia canal.”—Casey.

VIDEOCLIP—hopi hoben ta gusta nan sin fin. Pero manera un articulo anterior den e serie aki a mustra, tin hopi videoclip cu ta presenta esenanan hopi ofensivo di inmoralidad sexual y violencia.a Claro cu un cristian no mester wak ningun forma di entretenimento cu ta promove loke Dios ta condena. Sinembargo, no ta tur videoclip ta abiertamente inmoral. Algun di nan ta basta sano. Otronan kisas ta parce di no ta presenta maldad abiertamente. Pero podise na un manera masha fini nan ta transmiti ideanan di moralidad cu ta na conflicto cu e Palabra di Dios.

Si bo mayornan ta haya cu bo tin mag di wak videoclip, lo bo mester ta selectivo, es decir, bo mester scohe cu cuidou y uza bo mente entrena door di Bijbel, ya asina bo por distingui loke ta bon of loke no ta apropia pa wak. (Hebreonan 5:14) Cua ta algun principio di Bijbel cu por yuda bo scohe? Awor ta sigui algun texto y comentario biblico cu lo por ta util pa bo.

Proverbionan 4:23: “Warda bo curason riba tur cos, pasobra e ta e fuente di bida.” Bo tin un ekipo di haci deporte of un instrumento musical cu bo ta considera balioso? Casi sigur bo ta haci hopi esfuerso pa ten’e den bon condicion y na un luga sigur. Lo bo no pon’e pafo riba caya sin un hende pa tira bista riba dje, ni sikiera pa un rato, pa e no wordo horta of daña. Si, bo ta proteh’e of ward’e. Di mesun manera bo tin cu tuma un decision cu lo proteha of warda bo curason. No pone bo curason ni sikiera pa un rato den peliger door di expon’e na entretenimento cu no ta sano.

Efesionan 2:1, 2, NW: “Ta boso Dios a haci bibo aunke boso tawata morto den boso ofensa y picanan, den cua boso na un tempo a cana conforme cu e sistema di cosnan di e mundo aki, conforme cu e gobernante di e autoridad di aire, e spirito cu awor ta obra den e yiunan di desobediencia.” E aire ta referi na e spirito di mundo, e manera di pensa y e actitudnan cu ta promove comportacion malbado. Hopi videoclip ta refleha e spirito aki y e ta completamente contrario na e spirito di Dios, cu ta produci cualidadnan manera goso, pas y dominio propio.—Galationan 5:22, 23.

2 Timoteo 2:22: “Hui pa e pasionnan di hubentud.” Wakmento di esenanan sexual—asta si nan ta masha cortico—solamente lo stimula pasion. Hopi hoben ta admiti cu ta dificil pa nan lubida e esenanan ei; tin biaha nan sa asta sigui ripiti nan den nan mente bes tras bes. Un mucha homber cu yama Dave, kende a wak un video probocativo, a confesa: “Despues di esei, cada biaha cu mi tende e cantica ei mi ta corda riba e videoclip.” Pues anto, si bo wak videoclipnan asina, nan por lanta deseo pa relacion sexual inmoral.—1 Corintionan 6:18; Colosensenan 3:5.

Proverbionan 13:20: “Un compañero di hende bobo lo sufri daño.” Puntra bo mes: ‘Lo mi invita personanan cu ta practica violencia, spiritismo, buracheria of inmoralidad den mi cas?’ Asociacion cu personanan asina via television ta mescos cu invita nan den bo cas. Di berdad esei lo por pone bo “sufri daño”? Kimberly a comenta lo siguiente: “Mi a mira situacionnan caminda mucha mohenan, na un get together, ta imita e bisti of manera di balia probocativo cu nan a mira resientemente den un videoclip.” Kisas bo tambe a yega di mira esei. Door di imita personanan cu no tin respet pa e normanan di Dios, e hobennan aki ta mustra cu ya caba nan a cuminsa “sufri daño.” Pesei definitivamente, evita tur forma di “mal compania.”—1 Corintionan 15:33.

Salmo 11:5: “SEÑOR ta pone e husto y e malbado na prueba, ma esun cu ta gusta violencia Su alma ta odia.” Si nos ta wak videoclip cu ta promove violencia degrada y sin sentido, esei lo no duna hende e impresion cu nos “gusta violencia”?

E Reto pa Ta Selectivo

Como cu “henter mundo ta bou di control di e malbado”, ta birando mas y mas dificil pa haya entretenimento cu no ta contamina cu e manera di pensa y cu e actitudnan di mundo. (1 Huan 5:19) Algun canal di television cu ta pasa videoclip so, kisas ta mustra un cantidad grandi di videoclip inaceptabel. Pero asta ora e programacion no ta abiertamente inmoral of violento, hopi bes toch e ta promove e spirito di mundo. Un musico profesional a comenta cu un canal di videoclip hopi conoci, “a cambia for di un canal di muzik bira ‘un canal cu ta promove cierto estilo di bida.’”

E solucion por parce simpel: Si un videoclip ta malo, cambia e canal. E problema ta cu lo bo tin cu keda mesun alerta ora bo ta wak otro canalnan di television. Hopi di nan ta presenta programanan cu ta mustra violencia y indecencia sexual cu luho di detaye, of nan ta mustra personanan den circunstancianan moralmente cuestionabel. Nos tin cu admiti cu por ta iritante, kisas asta frustrante, ora bo ta purba disfruta di poco entretenimento y a la bes mester ta semper cla pa cambia di canal. Y tin biaha, pa ora bo a cambia e canal, ya e daño a ser haci caba. Ya cuadronan mental inmoral a keda graba den bo mente. No obstante, bo por tin sigur cu Yehova Dios lo bendiciona cualkier esfuerso sinsero cu bo ta haci pa proteha bo curason.—2 Samuel 22:21.

Tin otro pasonan practico cu por resulta util. Casey, menciona anteriormente, a splica kico e ta haya ta yud’e: “Normalmente nan ta mustra e nomber di e banda y e tema di e cantica na cuminsamento di e videoclip. Bandanan tin nan reputacion, pesei casi semper bo sa cua banda y cua cantica probablemente lo ta malo. Pues asina mi mira e nomber di un banda of cantica dudoso, mi ta cambia e canal. For di cuminsamento.”

‘Papia e Berdad den Bo Curason’

Asta si bo tin un bon conocemento di principionan biblico, por sosode cu bo ta cuminsa tolera loke ta ofensivo. Con? Door di permiti bo mes hustifica loke bo ta wak. (Santiago 1:22) Bijbel ta bisa nos cu Yehova su amigo ta e persona cu ta “papia berdad den su curason.” (Salmo 15:2) Pesei sea honesto cu bo mes. No gaña bo mes. Si bo ripara cu bo ta hustificando pakico bo ta wak algo dudoso, puntra bo mes: ‘Di berdad Yehova lo a aproba e cos aki cu mi ta wak?’ Corda, hopi bes e reto no ta simplemente sa loke ta bon of loke ta malo, sino dicidi cu lo bo haci loke ta bon! Bo mester mira bo relacion cu Yehova como mas precioso cu cualkier forma di entretenimento.—2 Corintionan 6:17, 18.

Normalmente no ta suficiente pa bo djis propone bo mes cu en general lo bo bai ta mas selectivo. Bo determinacion por disparce masha lihe si e no ta firme. Bijbel ta conta nos con e homber di Dios cu yama Job tawata determina pa keda fiel na su casa. Job a bisa: “Mi a sera un aliansa cu mi wowonan; con anto mi por a wak un birgen?” (Job 31:1) Imagina bo! Job a sera un aliansa, un contract serio, cu su mes pa limita loke lo e permiti su wowonan wak. Eigenlijk, bo por haci e mesun cos. Determina firmemente—haci un promesa serio na bo mes—cu lo bo no wak cos cu ta malo. Pone limitenan spesifico. Haci oracion tocante e asunto. Anto cumpli cu bo acuerdo. Bo por asta pon’e riba papel, si esei ta yuda. Si bo tin mester di un tiki mas apoyo, dicon bo no ta papia e asunto cu un hende grandi cu bo ta confia, por ehempel bo mayornan?

Tin algun hoben cristian cu, en bista di e peligernan, a dicidi cu gewoon nan no ta wak ningun videoclip mas. Sea cual sea bo decision den e asunto aki, uza bo mente pa bo distingui. Mantene un consenshi limpi. Door di disfruta solamente di entretenimento cu ta sano y refrescante, bo por evita di perhudica bo mes y tambe lo bo keda cu bo amistad cu Yehova.

[Nota]

[Plachi na pagina 12]

Algun videoclip cu no ta abiertamente inmoral, toch ta promove ideanan perhudicial

[Plachi na pagina 13]

Sea determina pa no wak cosnan cu Dios ta desaproba