E Punto di Bista Biblico

Kico Ta Haci Hende Materialista?

H ENDE ta nace cu e capasidad pa cultiva spiritualidad y cu e necesidad di adora Dios. Sinembargo, hende a ser crea for di materia y nan tin necesidad material y e capasidad pa disfruta di cos material. Algun cristian ta hopi rico. Esei riba su mes ta nifica cu nan ta materialista y cu nan ta falta spiritualidad? Di otro banda, hende pober tin menos chens di ta materialista y mas chens di tin inclinacion spiritual?

Sin duda bo ta di acuerdo cu ser materialista ta encera mucho mas cu djis posee hopi rikesa of propiedad. Considera e siguiente ehempelnan di Bijbel cu ta mustra kico realmente ta nifica ser materialista y con pa evita e peligernan cu e ta causa pa bo spiritualidad.

Nan Tawatin Rikesa y Gloria

Entre e fiel sirbidonan di Dios den tempo di Bijbel tawatin algun cu a posee rikesa y gloria. Por ehempel, Abraham “tawata masha rico na bestia di cria, na plata y na oro.” (Genesis 13:2) Job tawata conoci como “esun di mas grandi di tur e hombernan di oriente” pa motibo di e gran cantidad di bestia cu e tawatin y su grupo grandi di cria. (Job 1:3) Reinan di Israel, manera David y Salomon, tawatin rikesanan enorme.—1 Cronicanan 29:1-5; 2 Cronicanan 1:11, 12; Eclesiastes 2:4-9.

Den congregacion di prome siglo tawatin algun cristian rico. (1 Timoteo 6:17) Bijbel ta yama Lidia di e stad Tiatira “un bendedo di tela purpura, un adorado di Dios.” (Echonan 16:14) Tiña purpura y tela colo purpura tawata caro y, por lo general, ta hende cu moda y cu tawatin bon nivel di bida so por a afford nan. Pues, podise Lidia tawata un persona rico.

Na contraste, algun adorado fiel di Yehova den tempo di Bijbel tawata masha pober. Desaster natural, accidente y morto a pone algun famia cai di un dia pa otro den pobresa. (Eclesiastes 9:11, 12) Lo mester tawata masha dificil pa esnan den necesidad tuma nota con otro hende tawata disfruta di nan rikesa of pocesion material. Toch, lo no tawata corecto pa nan pensa cu hende rico ta materialista of pa conclui cu esnan cu no tawatin rikesa, ta sirbi Dios mas completo. Pakico? Ban wak kico ta e causa basico di materialismo.

Amor pa Placa

Diccionarionan ta defini materialismo como “precupacion cu cos material of enfasis riba cos material en bes di cosnan spiritual of intelectual.” Cu otro palabra, ta nos deseonan, nos prioridadnan y loke nos ta busca den bida ta determina si nos ta materialista. Esaki ta masha bisto den e siguiente dos ehempelnan di Bijbel.

Yehova a duna conseho firme na Baruk, kende a sirbi como secretario di profeta Yeremias. Probablemente Baruk tawata pober debi na e condicionnan den Herusalem y su asociacion estrecho cu Yeremias, kende tawata un profeta impopular. Toch, Yehova a bis’e: “Ma abo, bo ta busca cosnan grandi pa bo mes? No busca eseinan.” Kisas Baruk a cuminsa bira materialista y a laga e rikesa of siguridad material di otro hende precup’e. Yehova a recorda Baruk cu lo E libr’e di e benidero destruccion riba Herusalem, pero cu lo E no conserva su pocesionnan.—Yeremias 45:4, 5.

Hesus a duna un ilustracion di un homber cu tambe tawata precupa cu cos material. E homber aki a consentra mucho riba su rikesanan en bes di uza loke e tawatin pa aumenta su sirbishi na Dios. E homber rico a bisa: “Lo mi basha mi mangasinanan abou y traha otro mangasinanan mas grandi ainda, . . . y lo mi bisa mi alma: ‘Alma, bo tin hopi bienes montona pa hopi aña; tuma sosiego, come, bebe y fiesta.’” Anto Hesus a bisa: “Ma Dios a bis’e: ‘Abo, bobo! Awenochi mes bo alma lo wordo exigi for di bo; y awor ken lo bira doño di loke bo a prepara?’ Asina ta e hende cu ta montona tesoro pa su mes, y no ta rico pa cu Dios.”—Lucas 12:16-21.

Ki les nos por saca for di e dos relatonan aki? Nan ta yuda nos mira cu un persona ta materialista, no pa motibo cu e tin hopi, sino pa motibo cu e ta pone prioridad riba cosnan material. Apostel Pablo a bisa: “Esnan cu kier bira rico ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, door di desea esaki, a desvia for di e fe, y a traspasa nan mes cu hopi dolor.” (1 Timoteo 6:9, 10) Ta e determinacion pa ta rico y amor pa cos material ta causa problema.

Cristiannan Tin Cu Analisa Nan Mes

Sea cual sea nan situacion economico, cristiannan mester tene cuidou cu e trampa di materialismo. E poder di rikesa ta engañoso y por hoga of caba cu nos spiritualidad. (Mateo 13:22) Kisas, sin cu nos sa, nos por cuminsa consentra riba cos material en bes di riba cos spiritual, y e consecuencianan por ta lamentabel.—Proverbionan 28:20; Eclesiastes 5:10.

Pesei, cristiannan mester analisa nan prioridadnan y enfoke den bida. Sea nan tin tiki of hopi den sentido material, hende cu inclinacion spiritual ta haci esfuerso pa sigui e spiertamento di Pablo pa pone nan speransa no “riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.”—1 Timoteo 6:17-19.