Hobennan Sa Puntra . . .

Con Mi Por Trata cu e Dificultadnan di Ser un Yiu Adopta?

“Eigenlijk mi no sa nada tocante mi mayornan biologico, y esei ta molestia mi hopi.” —Barbara, di 16 aña.

“Mi no sa mes unda mi a nace ni ken ta mi mama ni tata. Tin biaha mi sa pensa riba esei anochi.” —Matt, di 9 aña.

“Ora mi discuti cu mi mayornan, mi ta pensa cu podise mi ‘berdadero’ mayornan lo ta mas comprensivo. Mi sa cu esei ta masha malagradicido di mi parti, y nunca mi no a bisa nan esei.”—Quintana, di 16 aña.

UN COS ta sigur: bida di un mucha adopta por tin su dificultadnan. Tin basta hoben ta lucha cu sintimentonan manera esnan describi ariba. Hopi di nan ta puntra nan mes si nan mester busca pa sa ta ken ta nan mayornan biologico, of nan tin gana di sa si nan bida lo ta mas felis si nan tawata serca nan. Y no ta esakinan so ta e dificultadnan.

Den e articulo anterior di e serie aki nos a trata algun di e cosnan negativo cu algun hoben adopta sa pensa di nan mes pasobra nan ta adopta.a Pa bo por resisti tal pensamentonan negativo ta importante pa bo haya goso den bida siendo un yiu adopta. Pero kico ta algun di e otro dificultadnan cu lo por presenta, y ki pasonan practico lo bo por dal pa trata cu nan?

Esnan Cu A Adopta Mi Ta Mi “Berdadero” Mayornan?

Jake di 13 aña ta bisa cu e tawata pensa hopi riba su mama biologico. Esei a pon’e haya algun problema cu su mayornan cu a adopt’e. Segun e ta corda: “Ki ora cu mi rabia mi tawata bisa: ‘Abo no ta mi berdadero mama. Bo no por straf mi asina!’”

Pues manera bo ta mira, Jake mester a trata cu un pregunta serio: Ken tawata su “berdadero” mama? Si bo ta un yiu adopta, kisas bo tambe ta luchando cu e mesun asunto, specialmente si bo sa puntra bo mes si bo mayornan biologico kisas lo no a trata bo miho cu bo mayornan cu a adopta bo. Pero ta e simpel proceso biologico di causa bo nacemento so ta haci dos hende bo “berdadero” mayornan?

Jake su mama cu a adopt’e no a pensa asina. Jake ta conta: “Mi mama tawata bisa: ‘T’ami ta bo berdadero mama. Y maske bo tin un mama cu a pari bo, awor ami ta bo mama.’” Ora adultonan tuma un mucha den nan cas y bai di acuerdo pa ta responsabel pa duna e mucha un cas, pa aliment’e y cri’e y percura pa su necesidadnan, nan en berdad ta bira su “berdadero” mayornan. (1 Timoteo 5:8) Y probablemente ta asina e autoridadnan legal di bo pais tambe ta mir’e. Pero Dios tambe ta mira nan como bo berdadero mayornan?

Laga nos analisa loke kisas ta e caso di adopcion di mas famoso den historia: esun di Hesucristo. Hesus no tawata e yiu biologico di Hose e carpinte, pero toch Hose a adopt’e como su yiu. (Mateo 1:24, 25) Hesus a rebeldia contra e autoridad di Hose segun cu el a crece? Al contrario, Hesus a compronde cu Dios su boluntad tawata pa e obedece su tata di criansa. Hesus tawata bon conoci cu e lei cu Yehova a duna na yiunan di Israel. Cua lei esei tawata?

Honra Bo Tata y Bo Mama

E Scritura ta bisa hobennan: “Honra bo tata y bo mama.” (Deuteronomio 5:16) Hopi bes Bijbel ta uza e palabra “honra” pa indica respet, gran aprecio y consideracion. Bo por demostra tal honra na bo mayornan cu a adopta bo door di ta cariñoso cu nan, respeta nan posicion, scucha nan punto di bista y ser cla pa cumpli cu cualke cos rasonabel cu nan pidi bo.

Pero kico bo mester haci ora cu bo ta haya cu bo mayornan di criansa ta parce irasonabel? Nos mester admiti cu esei lo sosode. Tur mayor ta imperfecto, sea cu nan ta di criansa of no. Nan defectonan por pone cu ta dificil pa obedece nan. Y no ta un sorpresa cu na ocasionnan asina bo ta inclina na pensa riba e echo cu bo ta adopta, y kisas ta puntra bo mes si esei di un manera of otro no ta haci bo menos obliga di obedece nan. Pero di berdad esei ta asina?

Kisas ta bon pa bo pensa riba e situacion di Hesus. Corda cu e tawata perfecto. (Hebreonan 4:15; 1 Pedro 2:22) Pero ni su tata di criansa ni su mama biologico no tawata perfecto. Probablemente anto, tawatin ocasion cu Hesus por a mira cu su mayornan tawata kiboca. El a rebeldia contra Hose su manera imperfecto di sirbi como cabes di famia of contra Maria su guia defectuoso como mama? No. Bijbel ta bisa nos cu segun cu Hesus a crece “el a keda someti” na su mayornan.—Lucas 2:51.

Wel, ora abo cu bo mayornan di criansa tin un diferencia di opinion, por sosode cu bo ta combenci cu nan ta robes. Pero bo tin cu admiti cu bo tambe ta imperfecto. Pesei semper tin e posibilidad cu ta abo ta robes. Di tur manera, no ta miho pa sigui Hesus su ehempel? (1 Pedro 2:21) Esei lo yuda bo ta obedesido. Pero tin un motibo asta mas importante ainda pa obedece bo mayornan.

Bijbel ta bisa: “Yiunan, sea obedesido na boso mayornan den tur cos, pasobra esaki ta agradabel na Señor.” (Colosensenan 3:20) Si, bo obediencia ta haci bo Tata celestial contento. (Proverbionan 27:11) Y e kier pa bo siña ta obediente pasobra e kier pa bo tambe ta contento. Su Palabra ta anima hobennan pa obedece, y ta agrega: “Pa bai bo bon y pa bo tin bida largo riba tera.”—Efesionan 6:3.

Con pa Fortalece e Relacion cu Bo Mayornan di Criansa

Un bon relacion cu bo mayornan di criansa ta encera hopi mas cu solamente honra y obedece nan. Probablemente bo kier pa na cas tin un ambiente di cariño y amor. Bo mayornan di criansa ta responsabel pa crea un ambiente asina. Pero bo tambe por hunga un papel importante den esei. Con asina?

Na prome luga, busca maneranan pa bira mas sera cu bo mayornan. Puntra nan tocante nan background, nan bida, y nan interesnan. Busca conseho serca nan pa problemanan cu ta molestia bo, y scohe un momento cu nan ta trankil y habri pa papia. (Proverbionan 20:5) Na di dos luga, busca maneranan pa participa den e funcionamento di cas, por ehempel, door di yuda cu trabou di cas y otro tareanan sin cu nan tin cu roga bo.

Pero kico di bo mayornan biologico? Si bo dicidi cu bo ta bai busca pa sa ken nan ta, of si nan dicidi di busca pa sera conoci cu bo, esei ta nifica cu automaticamente bo relacion cu bo mayornan di criansa ta na peliger? Den pasado, agencianan di adopcion hopi bes tawata nenga di revela informacion pa yuda mayornan biologico haya yiu cu nan a duna pa adopcion of pa yiu haya nan mayornan. Awendia, e reglanan den algun pais ta mas liberal, y hopi mucha adopta a topa personalmente cu nan mayornan biologico cu nan no tawata ni corda mes. Claro cu e reglanan di adopcion kisas no ta mescos caminda abo ta biba.

Di tur manera, ta abo tin cu dicidi si lo bo busca pa sa ta ken ta bo mayornan biologico, y esei no ta un decision facil. Hobennan adopta tin hopi sintimento mixto riba e asunto. Tin ta anhela pa haya nan mayornan biologico; otronan ta determina pa no haci esei. Sinembargo, bo por tin sigur cu hopi hoben adopta a haya contacto cu nan mayornan biologico sin perde e relacion stabil cu nan tawatin cu nan mayornan cu a adopta nan.

Busca conseho serca bo mayornan di criansa y kisas serca amigo- of amiganan maduro cu tin den e congregacion cristian. (Proverbionan 15:22) Evalua bo opcionnan cuidadosamente, y tuma bo tempo pa pensa e asunto bon prome cu bo cuminsa actua. Manera Proverbionan 14:15 ta bisa: “E homber prudente ta wak bon unda e ta bai.”

Si bo dicidi cu bo kier purba haya contacto cu bo mayornan biologico, haci esfuerso pa sigura bo mayornan di criansa cu lo bo sigui stima nan y respeta nan. Di e manera ei, segun cu pocopoco bo ta siña conoce bo mayornan biologico cu a causa bo nacemento y a entrega bo hopi tempo pasa pa ser adopta, toch lo bo sigui mantene e banchi stabil cu e mayornan cu a cria bo y entrena bo.

Fortalese Bo Relacion cu Bo Tata Celestial

Hopi hoben adopta ta lucha cu e miedo di ser bandona. Nan ta precupa cu kisas nan lo perde nan famia di criansa mescos cu nan a perde nan famia biologico. E miedo ei ta comprendibel. Pero ta bon pa corda e palabranan sabi aki: “Amor no conoce miedo; ma amor perfecto ta core cu miedo.” (1 Huan 4:18) No laga e miedo insaludabel di perde bo sernan keri domina bo. Mas bien, desaroya amor pa otro hende, incluso pa tur hende di bo famia di cas. Pero mas cu tur cos, desaroya amor pa bo Tata celestial Yehova Dios. E ta perfectamente confiabel, y nunca ta bandona su yiunan fiel. E por calma bo miedo.—Filipensenan 4:6, 7.

Catrina, cu tawata un yiu adopta, ta bisa cu lesamento di Bijbel a yud’e masha hopi pa hala mas serca Dios y hiba un bida felis y productivo. E ta bisa cu un relacion sera cu Yehova “ta masha importante pasobra nos Tata celestial sa con nos ta sinti.” Catrina su texto faborito ta Salmo 27:10, cu ta bisa: “Maske mi tata y mi mama bandona mi, SEÑOR lo recohe mi.”

[Nota]

[Plachi na pagina 20]

Busca maneranan pa bira mas sera cu bo mayornan cu a adopta bo