Un Biahe Espectacular Riba Ruta 1
DI E CORESPONSAL DI SPIERTA! NA NORWEGA
TUR anochi, durante henter aña, un barco ta sali for di e stad Bergen, na costa suitwest di Norwega, y ta tira cabes pa nort riba un biahe di 11 dia y di mas o menos 4.500 kilometer. E barco ta pasa banda di miles di isla y door di masha hopi bahia y fjord (entrada smal meimei di barancanan steil) segun cu e ta bishita e stadnan y pueblitonan a lo largo di e bunita costa salbahe di Norwega.
Aunke hopi hende ta considera e ruta di lama di e compania Coastal Express di Norwega como e biahe di mas bunita na mundo, Coastal Express tin un papel practico: transporta mercancia, post y pasahero te na e ultimo parada na e haf di Kirkenes, casi pa yega Polo Norte.
Con barco ta logra nabega e lama polar ei, specialmente den winter ora cu ijs ta stroba barconan di yega na gran parti di e region polar? Caminda Norwega ta situa ta pone cu e ta cai bou di influencia di e awanan cayente di e Coriente Nort Atlantico y di bientonan suave for di west. E dos cosnan aki ta haci Norwega su clima mas modera di loke lo bo spera asina serca di Polo Norte. Si, casi bo no ta haya ijs na Norwega su hafnan, ni sikiera den winter.
Un Ruta di Lama Ta Nace
Na final di siglo 19, ora hende tawata evalua pa conecta e pais su habitantenan canto di costa cu otro via caretera, trein of lama, nan a dicidi na fabor di un ruta via lama. Sinembargo e tempo ei, asta e ruta via lama a presenta problema, pasobra maske e lama no tawata vries, tawata peligroso pa nabega anochi y den mal tempo.
Pero debi principalmente na e imaginacion y determinacion di capitan Richard With, nan a inaugura un servicio maritimo regular dia 2 di juli 1893. Riba e dia ei, e prome barco di Coastal Express a sali for di Trondheim cu como ultimo parada Hammerfest, e stad mas nort di Europa. Apesar di pronosticonan negativo, e servicio a resulta un exito. De echo, despues nan a expand’e y tawata bishita 34 haf for di Bergen te na Kirkenes, cu te awe ta e ultimo parada. Podise e indicacion di mas grandi di e exito—y importancia—di e ruta maritimo aki ta ser refleha den e nomber inoficial cu hende cu ta biba a lo largo di costa a dun’e: Ruta 1.
Awendia, tin un flota di 11 barco moderno ta nabega Ruta 1, y cada 24 ora un di nan ta sali. Pero como cu awor tin un red mucho mas miho di caretera y trein ta conecta hopi di e pueblonan canto di costa, e funcion di Coastal Express a bira mas un funcion turistico, locual bo ta ripara tambe na e diseño di e barconan.
Un Panorama Cu Ta Cambia Gradualmente
E barconan ta nabega un ruta cu ta hiba nan principalmente door di lama trankil. Pues, e pasaheronan ta haya chens di disfruta 11 dia largo di algun di e paisahenan di mas bunita cu Norwega tin: pueblitonan agradabel situa meimei di sabananan berde, poblacionnan di piscado canto di lama, gletsjernan, fjordnan, topnan di sero cubri cu sneu, barancanan halto caminda bo ta mira masha hopi parha di lama mes, watervalnan mahestuoso y asta bayena.
Un bentaha adicional ta cu ora e barconan mara na un haf, e pasaheronan tin mag di baha pa bai keiro. Por ehempel, e pueblo Molde ta duna bo un bista magnifico di e 87 topnan di sero cubri cu sneu den e Montañanan di Romsdal. Na Ålesund y Trondheim, bishitantenan tin asta tempo pa haci un excursion cortico, cu lo por inclui un caminata den cayanan cu casnan cu tin un arkitectura local unico. Na algun pueblo, pasaheronan ta huur auto anto bolbe subi nan barco na e siguiente haf caminda e ta mara.
Despues di sali for di e pueblo Bodø, Coastal Express ta pasa Vest Fjord y ta coi rumbo pa Islanan Lofoten, un archipielago di 175 kilometer largo cu tin masha hopi top di sero y pueblito di piscado agradabel. Algun di e islanan mas exterior di Lofoten ta simplemente rif, islanan chikito di baranca y clip cu ta sali diripiente for di lama; den algun caso tin faro of boei ta indica unda nan ta. Tambe e archipielago aki tin algun di e colonianan di mas grandi na mundo di parha di lama. Entre e parhanan tin varios tipo di meuchi y bubi, pato di eider, papegaaiduiker, zeekoet, decla, meuchi Atlantico di tres tenchi, alk boca skerpi y de bes en cuando bo ta haya stormvogels. Tin varios miyon parha.
Tur winter e lama alrededor di Lofoten ta yena cu actividad ora cu botonan di piscado ta sali pa bai coi skrei, un tipo di bakiyou. E area aki ta conoci tambe pa bayena. Pasaheronan ta keda encanta ora nan mira e mamiferonan gigante aki dal salto y spuit awa no mucho leu for di e barco!
Den zomer, Coastal Express ta desvia pasa door di Troll Fjord. E entrada di e fjord aki ta asina smal y steil cu bo ta sinti como si fuera bo por rek over di rand di e barco y mishi cu e barancanan na banda. Akinan e homber na timon no ta tribi pita, pa e no ocasiona un schuifmento di baranca! E seccion aki di costa cu den background su topnan di sero cubri cu sneu, ta e soño di un sacado di potret!
Despues di haci parada na varios otro stad y pueblo di piscado, e barconan ta coi rumbo pa oost, bayendo den direccion di un seccion di costa cu pa hopi hende ta e culminacion di e biahe. Por ehempel, for di e haf di Honningsvåg pasaheronan por tuma un excursion pa bai Kaap Nort, caminda tin clipnan di alrededor di 300 meter halto cu ta sali casi vertical for di Oceano Polar, locual ta forma un paisahe espectacular.
Coastal Express ta mara na Kirkenes, su parada di mas nort, pa solamente un par di ora prome cu nan cuminsa cu e biahe di regreso pa Bergen. E biahe di regreso pa suit ta duna e pasaheronan un chens di disfruta di e paisahenan cu kisas nan a perde ora nan tawata na soño riba e biahe bayendo nort. Por ehempel, na e Circulo Polar bo por mira e imponente capa di ijs Svartisen, cu ta abarca mas o menos 370 kilometer cuadra. Despues e barconan ta pasa banda di e bunita careda di sero cu yama e Shete Ruman Mohenan y banda di Torghatten, un sero cortico pero rondo cu un tunnel natural cu ta pasa duars door di dje, di manera cu e ta parce un sombre cu un buraco den e parti ariba. Entre e stad Måløy y Florø, e barconan ta pasa Hornelen, un sero di 860 meter halto cu ta sali asina steil for di lama cu akinan tambe esun na timon no ta pita pa e no causa un schuifmento di baranca.
Solo di Meianochi y Anochi Polar
Turistanan cu biaha den zomer por keda cu lus di dia sin interupcion durante casi henter e biahe. De echo, gran parti di Ruta 1 ta den “e pais di solo di meianochi”, nort di e Circulo Polar. Einan solo ta briya henter anochi den zomer. Por ehempel na Kaap Nort, pa casi 12 siman solo no ta baha!
Hende cu ta biaha den winter ta experencia net lo contrario: un anochi polar largo. Pero winter tin su propio beyesa ora cu shelo, oceano, seronan y sneu ta keda cubri cu e colonan suave di ora ta scurito, ya cu solo ta yega serca di horizonte pero no ta sali. Ademas, e shelo di winter ta forma e fondo perfecto pa un di e shownan di mas grandioso cu tur: e famoso aurora borealis, of lusnan di nort. Biento cu ta bini di solo y cu ta contene particulanan carga cu coriente ta drenta den e atmosfer di e region di polo, y esei ta pone cu bo ta haya lus ta cuminsa balia den shelo. Lusnan berde y hel cu berde, tin biaha tambe cu tononan di cora, ta move door di shelo yen di streya den formanan impresionante di strepi y cortina cu ta bola, sende paga y subi baha riba nan propio ritmo cosmico.
Claro cu bo no mester ta riba un barco di Coastal Express pa bo disfruta di hopi di e esenanan magnifico aki. Debi cu awor nan tin un red di caretera y di trein hopi mas extenso, bo por disfruta di gran parti di Norwega mirando door di bentana di auto of di trein. Pa personanan cu tin un budget limita, e medionan aki di transporte kisas ta hopi mas economico. No obstante, sea cual sea e ruta cu bo scohe, un cos ta sigur: nunca lo bo no fada di e paisahenan bo dilanti cu ta cambia cada kilometer cu pasa y cada temporada di aña a lo largo di e costa espectacular di Norwega.
[Mapa na pagina 13]
(Pa e teksto den su formato kompleto, wak e publikashon)
FINLANDIA
SUECIA
NORWEGA
OSLO
Ruta via lama
▿ ▵ Bergen
▿ ▵ Florø
▿ ▵ Måløy
▿ ▵ Ålesund
▿ ▵ Molde
▿ ▵ Trondheim
CIRCULO POLAR
Monumento na Circulo Polar
▿ ▵ Bodø
▿ ▵ Islanan Lofoten
Troll Fjord
▿ ▵ Tromsø
▿ ▵ Hammerfest
▿ ▵ Honningsvåg
▿ ▵ Kirkenes
[Reconocemento]
Basa riba mapa: Hurtigruten
[Plachi na página 15]
Den Troll Fjord, rondona pa top di sero
[Reconocemento]
TO-FOTO AS, Harstad
[Plachinan na pagina 15]
Tin hopi parha di lama ta biba riba Islanan Lofoten, entre nan, meuchi, zeekoet y papegaaiduiker
[Plachi na pagina 16]
Ruta 1 ta cuminsa na Bergen
[Plachi na pagina 16]
Monumento na Circulo Polar
[Plachi na pagina 16]
Solo di meianochi
[Reconocemento]
TO-FOTO AS, Harstad
[Plachi na pagina 16, 17]
E Shete Ruman Mohenan
[Reconocemento]
Per Eide
[Plachi na pagina 17]
Pueblito canto di costa den scuridad di winter
[Plachi na pagina 17]
Aurora borealis, lusnan di nort
[Reconocemento]
© TO-FOTO AS, Harstad
[Plachi na pagina 17]
Biahe ta termina na Kirkenes
[Reconocemento]
Hallgeir Henriksen
[Reconocemento pa Potret na pagina 13]
Nancy Bundt